Халтараантан сылтаан суол быһылаана өссө элбээтэ
Түүнүн номнуо тоҥорор буолан, сатыы сылдьар дьоҥҥо кутталлаах буолла. Дьиэҕэ киирэр кирилиэстэргэ көбүөр тэлгэнэ илик сирдэригэр дьон сэрэнэн тутуһан тахсар. Оттон массыынан айаннааччыларга куттал икки төгүл суоһаата. Эмискэ инчэҕэй хаар түһэн суолу көстүбэт гына тибэр, оттон кыһыҥҥы көлүөһэҕэ көһө илик көлөлөргө суолтан туорааһыны, массыыналар харсыһыыларын үөскэттэ. Куорат бары шиномонтажтара үлэ үөһүгэр сылдьаллар. Суоппардар сарсыардаттан көлүөһэ уларытаары уһун уочаракка тураллар.
Ааспыт нэдиэлэҕэ аҥаардас биир күн иһигэр 21 суол саахала бэлиэтэннэ, биир киһи эчэйиини ылла. Мантан аҕыһа тохтоон турар көлөлөрү кытта харсыһыы, эттиктэри түҥнэри көтүү, иккитэ суолтан туорааһын уоннааҕыта тимир көлөлөр харсыһыылара буолар. Маны таһынан биир саахалга бэлисипиэттээх киһини түҥнэри көттүлэр. Эрдэ икки-үс күн иһигэр 20-тэн тахса саахал бэлиэтэнэр эбит буоллаҕына, дьыл кэмэ уларыйан барыта биир күн иһигэр бэлиэтэннэ диэн суолга куттал суох буолуу инспиэксийэтэ иһитиннэрдэ.
Владилдена Охлопкова, Дьокуускай куорат суолга-иискэ салалтатын сэрэтэр үлэҕэ салаатын иниспиэктэрэ: “Инчэҕэй хаар түһэн суол үчүгэйдик көстүбэт, онон туох баар суоппардарга, сатыы сылдьааччыларга сэрэхтээх буолуҥ диэн ыҥырабыт. Сатыы дьоҥҥо ыраахтан көстөр эттиктэри туттун диибит. Суоппардарга массыына икки ардын сөптөөхтүк тутуһун, түргэнник сылдьыман диэн этэбит”.
Суолга массыыналар сырыылара бытаарда. Ол эрээри суол быраабылатын кэһэн айанныыр суоппардар син биир бааллар. Тимир көлөнү уонна сатыы дьону халтараантан харыстыыр сыалтан куорат уулуссаларыгар, суол туорааһыннарыгар уонна автобус тохтобулларыгар кумах кутуллуоҕа.
Дмитрий Захаров, киин куорат хаһаайыстыбатын дьаһайар салаатын салайааччытын эбээһинэһин толорооччу: "Халтараан кэмҥэ кутарга анаан кумах бэлэмнээтибит. 10 тыһыынча куубу “Якутдорстрой” тэрилтэ тэлгэһэтигэр кутан бэлэмнээн сытыарабыт".
Урукку кэмҥэ суол халтарааныгар отсев диэн тутуу матырыйаалын туһанар эбит буоллахтарына, быйылгыттан олохтоохтор этиилэринэн, дьон атаҕын таҥаһын уонна массыына тас көрүҥүн харыстыыр сыалтан, төптөрү кумаҕы туһаналлар. Оттон эргиччи суол барыытыгар кумаҕы кытта отсев эмиэ кутуллуо.