Түөс искэҥин чинчийии нэдиэлэтэ

Күн бүгүн онколог учуотугар өрөспүүбүлүкэ үрдүнэн 13 тыһыынчаттан тахса киһи турар. Ордук тэнийбит ыарыыларынан түөс, тыҥа, быар искэҥэ буолаллар. Онтон түөс раагын туһунан этэр эбит буоллахха, сыллата ортотунан 250 дьахтар ыалдьар, 70%  бастакы стадияҕа булаллар, онон эрдэттэн көрдөрүнэргэ быраастар ыҥыраллар.

Өрөспүүбүлүкэтээҕи онкологическай диспансерга сылын ахсын икки тыһыынча кэриҥэ эпэрээссийэни оҥороллор, оттон диспансер саҥа дьиэлэннэҕинэ бу көрдөрүү икки бүк эбиллиэн сөп. Санатан эттэххэ, сана онкологическай киин быйыл аһыллара күүтүллэр. Этиллибитин курдук түөс рага Саха сиригэр тэнийиитинэн иккис миэстэҕэ турар. Холобура, ааспыт 2022 сылга 229 дьахтарга бу диагноһы туруорбуттара. Айсен Дмитриев онокдиспансерга лучевой диагностикаҕа рентген лаборанынан үлэлээбитэ үстэн тахса сыл буолла.  Кини рентген аппаракка түһэрэн, түмүгүн бырааска ыытар.

Айсен Дмитриев, СӨ онкодиспансерын рентген лаборана: "40 саастарын ааспыт дьахталлар сылга биирдэ хайаан да маммографияны ааһыахтаахтар. Онтон 40 иннинэ түөс УЗИ-тыгар сылдьыахтаахтар. Ааспыт сылга биһиэхэ саҥа цифровой маммограф турбута. Маны сэргэ быйыл саҥа референт киин арылынна. Онно өрөспүүбүлүкэ маммография түһэриилэрин иккис ааҕыытын биһиги быраастарбыт экспертиир түмүгүн биэрэллэр".  

Дьахтар киһи 40 сааһыттан саҕалаан сыл аайы доруобуйатын туругун бэрэбиэркэлэнэрэ ирдэнэр. Эмиийи маммография аппарат нөҥүө көрөн туох уларыйыы баарын быһаараллар. Бэлиэтээн эттэххэ, кэнники уон сылга бу куталлаах ыарыыны эрдэттэн быһаарыы көрдөрүүтэ тупсан 72% тэҥнэстэ. Дойду үрдүнэн алтынньы ыйга түөс искэҥин утары охсуһуу нэдиэлэтин тэрийэн ыыталлар. Саха сиригэр Дьокускайга уонна улуустарга ыарыыны эрдэттэн сэрэтиигэ туһуламмыт тэрээһиннэр буолуохтара.

Анастасия Неустроева, СӨ онкодиспансерын рентгенолог бырааһа: "Онкология диспансера Саха сирин олохтоохторун бу алтынньы 8 күнүгэр диэри чинчийиигэ ыҥырар. Маны сэргэ быраастарга анаан онлайн семинар ыытыллыахтаах, ону тэҥэ алтынньы 10 күнүгэр диэри Сунтаар улууһугар онко-десант диэҥҥэ барыахтара".

Ыарыыны эрдэттэн сэрэппит ордук. Онон дьахтар, ийэ киһи доруобуйатыгар болҕомто ууран туһааннаах чинчийиини хайаан да ааһара ирдэнэр. Кутталаах искэҥ ыарыытын сэрэтиигэ олорор миэстэҕэр поликлиникаҕа, биитэр улууска киин балыыһаҕа тиийэн маммолог бырааска көрдөрөн, узига түһэн анализ туттарар наада.