Көмүс сааска - көхтөөх олох
Көмүс сааска - көхтөөх олох диэн санаанан салайтар үһүс көлүөнэ оскуолатын кыттааччылара. "Сайдам саас" литература куруһуогун дьарыга. Манна үлэ уонна социальнай сайдыы миниистирэ Ирина Волкова кэлэн оскуола үлэтин-хамнаһын билсэ сылдьар. Бу куруһуокка кинигэлэри, хоһооннору ааҕаллар, ырыталлар. Араас көрсүһүүлэри, быыстапкалары тэрийэн ыыталлар, хоһоон, кэпсээн да айааччылар бааллар.
Маргарита Габышева, "Сайдам саас" литературнай куруһуок кыттыылааҕа: "Бу көрсүһүүлэри бары олус күүтэбит. Төгүрүк сыл көрсүһүүлэри ыытабыт. Бэйэ бэйэбитин суохтаһабыт. Ол курдук биир дьиэ кэргэн курдук истиҥник сылдьабыт".
Дьокуускайдааҕы Үһүс көлүөнэ оскуолата тэриллибитэ быйыл 11 сыла. Пандемия кэмигэр тохтуу сылдьан баран дьарыктарын былырыын күһүҥҥүттэн сөргүппүттэрэ. Уопсайа отут икки куруһуок үлэлиир. Нэдиэлэҕэ иккитэ-үстэ кэлэн интэриэстэринэн дьарыктаналлар. "Талбаана" үҥкүү ансаамбыла куорат, өрөспүүбүлүкэ, Россия, ону тэҥэ норуоттар икки ардыларынааҕы куонкурустарга, фестивалларга ситиһиилээхтик кыттар, уон биэс киһи нэдиэлэҕэ үстэ кэлэн үҥкүүлүүр. Лилия Ефимовна Иванова уҥкүү дьарыгар 2017 сыллаахтан ыла сылдьар.
Лилия Иванова, "Талбаана" үҥкүү ансаамбылын салайааччытын солбуйааччы: "Үҥкүүнү олус сөбүлээн дьарыктаналлар. Арааһынай саастаах дьон бааллар. Саамай аҕам саастаахпыт Зинаида Аркадьевна 82 хаарын уулларда. Бары үөрэ-көтө дьарыктанабыт".
Кырдьаҕастар декадалара үһүс көлүөнэ оскуолаҕа ааспыт нэдиэлэттэн саҕалаан ыытылла турар. Сүрүн тэрээһиннэрэ бү күннэргэ буолаллар. Ол курдук алтынньы төрдүс күнүгэр харах балыыһатын быраастара кэлэн көрүөхтэрэ. Ону тэҥэ илиинэн оҥоһуктарын атыы-эргиэн быыстапкатын тэрийиэхтэрэ.
Пелагея Прядезникова, Дьокуускайдааҕы үһүс көлүөнэ оскуолатын дириэктэрэ: "Сүрүн тэрээһиммит Оҕо дыбарыаһыгар буолуоҕа. Онно илиинэн оҥоһуктар быыстапкалара туруоҕа уонна улахан кэнсиэр буолуохтаах".
Урут үөрэммэтэхпитин үөрэнэн, сатаабаппытын сатыыр буолан, ону тэҥэ бэйэ-бэйэбитин кытта алтыһан бэрт туһалаахтык иллэҥ кэммитин атаарабыт диэн манна сылдьааччылар санааларын үллэстэллэр. Александра Шахурдина бэйэтэ декоратор, уруһуйдьут идэлээх. Үйэтин тухары тыйаатырдарга, оҕо айымньытын дьиэтигэр үлэлээбитэ. Быйылгыттан бу Үһүс көлүөнэ оскуолатыгар кэлэн уруһуйга, живописка үөрэтэр.
Александра Шахурдина, уруһуй куруһуогун салайааччы: "Бэйэ бэйэлэрин кытта ирэ-хоро кэпсэтээри кэлэллэр. Аа-дьуо олорон эрэн уруһуйдуурбутун мин да кинилэр да наһаа сөбүлээтибит".
Аҕа саастаахтар оскуолаларыгар кырдьаҕастар аҥардас интэриэстэринэн түмсэн ырыанан-тойугунан, ииһинэн эрэ муҥурдаммакка, наадалаах үөрэх куурустарын кытта бараллар. Ол курдук компьютеры, омук тылларын, бэл сокуону, быраабы, көрүллэр чэпчэтиилэри кытта үөрэтэллэр.