Элбэх оҕолоох ыал спорт оскуолатын үлэлэтэллэр

Мария, Александр Степановтар ыал буолан олорбуттара  уон биэс сылтан орто, үс оҕолоохтор. Мария бэйэтэ омук тылын учуутала идэлээх, кэргэнэ улахан техникэни ыытар суоппар, бульдозериһынан үлэлиир. Ааспыт 2022 сылтан бэйэ дьыалатын тэринэн, чуолаан спортивнай оскуола аһан үлэлэтэллэр. Маннык хайысхаҕа кинилэр кыыстарыгар сөптөөх дьарык көрдөөн кэлбиттэр. Саха сиригэр суох, тэнийбэтэх, сонун көрүҥнэри аан бастакынан киллэрэргэ сорунан пилоннай спорт, воздушное кольцо уонна воздушное полотно диэн хайысхаларынан оҕолору уонна ким баҕалааҕы оскуолаларыгар дьарыктыыллар.

Мария, Александр Степановтар, спортивнай оскуола салайааччылара: "Иккитэ күрэххэ кыттан турардаахпыт. Икки ый иһигэр биир оҕону бэлэмнээт да Амурскай уобалас аһаҕас чемпионатыгар кыттан турабыт. Онно 43 оҕоттон 9 миэстэ буолбуппут. Бастакы холонууга үчүгэй көрдөрүү".

Пилоннай спорт, ол аата акробатика, хореография, гимнастика элеменнарыттан турар пилон диэн ыйанар тимиргэ оҥоһуллар, киһиттэн ураты координацияны ирдиир көрүҥ буолар.  Былырыын Россия спордун министиэристибэтэ пилоннай спорду дойду таһымыгар сайыннарар спорт көрүҥүнэн бигэргэппитэ. Онон биһиэхэ бу сонун кэскиллээх спорт көрүҥэ диэн этиэххэ наада. Оттон Россияҕа пилоннай спортка аан дойду таһымыгар биһирэнэр тренерердэр, спортсменнар, чемпионнар бааллар. Олортон бирдэстэринэн  Россияҕа пилоннай спорт уонна салгын гимнастикатын Федерациятын президенэ, Аан дойду пилоннай спортка түөрт төгүллээх чемпионката Полина Волчек буолар. Кини Степановтар дьиэ кэргэн туохтан саҕалыылларыгар, туох хааччыллыы ирдэнэригэр сүбэ-ама буолбут тутаах киһи. Бу соторутааҕыта ыҥырыыларын ылынан манна Дьокуускайга кэлэн оҕолору, тренердэри  пилоннай спортка уонна салгын гимнастикатыгар дьарыктыы сылдьар.

Полина Волчек, РФ пилоннай спорка уонна салгын гимнастикатыгар Федерациятын президенэ: "Саха сиригэр пилоннай спорт көрүҥүн хамаандатын эрчийээри анаан – минээн кэлбитим. Ону тэҥэ тренердэр таһымнарын көтөҕөргө үлэлэһэбин. Биир үөлээннээхтэрбин кытары буолаары турар Азия оҕолоро оонньууга пилоннай спорду уонна салгын гиснастикатын киллэриигэ үлэлэһэ сылдьабыт".

Инникитин барыта табылыннаҕына, пилоннай спорт уонна салгын гимнастиката Азия оҕолоро оонньууларга кэнэҕэскитин киириэн сөп. Мариялаах, Александр бу хайысхаҕа күүстээх үлэни ыыта сылдьабыт диэн этэллэр.  Номнуо Саха сиригэр бу көрүҥнэринэн дьарыктанар дьону, оҕолору түмэн федерация тэрийбиттэр. Сунтаар улууһуттан төрүттээх Айталина Андреева окуолаҕа салгын төгүрүгэр тренеринэн үлэлиир, бэйэтэ бу көрүҥҥэ быйыл Саха сиригэр чемпионнаан турар.

Айталина Андреева, спортивнай оскуола тренерэ: "Бэйэм хореографпын ол иһин ыйанан турар иигэ үҥкүүлэри туруорабын. Оҕолор гимнастика хамнаныылардаах нүөмэри көрдөрөллөр”.

Мариялаах, Александр оскуолаларыгар үрдүк таһымнаах тренердэри бэлэмнииргэ улахан болҕомтолорун уураллар. Салгыы өссө спорт икки көрүҥүн киллэрэр былааннаахтар. Кэнэҕэскитин  кыахтаах, дойду таһымыгар ситиһиилээхтик күрэхтэһэр спортсменнары,  олимпийскай чемпионнары иитэн-үөрэтэн таһаардарбыт диэн улахан ыра санаалаахтар.