Саха сирин хаартатын быыһабайдаан оҥордулар
2022 норуоттар култуурнай нэһилиэстибэлэрин сылыгар уруулуу Чуваш өрөспүүбүлүкэтэ Арассыыйа бары эригийиэннэрин хабан тигии хаартаны оҥоруохха диэн этиитин ылынан, саха маастардара биир бастыҥ үлэни көрдөрдүлэр. Арассыыйа саамай киэҥ иэннээх субъегар араас норуоттар иллэһэн, тугунан дьарыктанан олороллорун талааннаах тарбахтаахтар 1,9 мэтэрэ усталаах, 1,6 миэтэрэ туоралаах хаартаҕа тигэн көрдөрдүлэр.
Яна Игнатьева, "Симэх" норуот ускуустубатын киинин дириэктэрэ: «Биһиги өрөспүүбүлүкэбит иэнэ улахан буолан тута харахха быраҕыллар. Быыһабайдаммыт хаарта билигин Чушавашияҕа ойуулуур-дьүһүннүүр түмэлгэ хараллар».
Дойду үрдүнэн 82 регион кыттыыны ылла. Норуоттар икки ардыларыгар или-эйэни бөҕөргөтөр сыаллаах бырайыак бэйэтин тула уопсайа өрөспүүбүлүкэ 64 маастарын муста. Хаарталар бэйэ бэйэлэригэр маарыннаспат ураты ойуулаахтар, туспа ньыманан тигиллибиттэр. Маны таһынан Докуускай куорат уонна Саха өрөспүүбүлүкэтин гиэрбэлэрэ тигиллэн көрдөрүүгэ туруорулуннулар.
Анастасия Бубякина, СӨ норуодунай маастара: «Илии сиигин арааһын үөрэтэн, бөлөх тэринэммит бу хаартаны оҥорон таһаардыбыт».
Нам улууһун Хамаҕатта нэһилиэгиттэн сылдьар Мария Аманатова бөлөҕө Саха сирин хаартатын бүтүннүү сиэлинэн хатан оҥордо. Араас сылгы ньуолах түүтүн, сиэлин өҥүнэн арааран бэрт интэриэһинэйдик хатан дьон үрдүк биһирэбилин ыллылар.
Мария Аманатова, СӨ норуодунай маастара: «Саха халандаарынан быйыл Дьөһөгөй сыла. Ол иһин биһиги хаартабытын сылгы ньуолах түүтүттэн оҥордубут. Улуустары ситиинэн араартаатыбыт, онтон сүрүн чааһын сылгы кыппай түүтүнэн оҥордубут».
Кыайыылаах хаарта Саха сирин улуустарын уонна куораттарын 2030 сыллаахха диэри экономическай сайдыытын былаанын көрдөрөр. Өрөспүүбүлүкэ улуустарын бөлөҕүнэн арааран сайдыы социальнай-экономическай туругун ураты талааннаахтык тиһэн оҥорбуттар.
Ньургуйаана Игнатьева, СӨ норуодунай маастара: «Салайааччыбыт норуот маастара Анастасия Бубякина сиик арааһын барытын билэр буолан холкутук оҥорон таһаардыбыт».
Саха өрөспүүбүлүкэтин төрүт омуктара, нуучча уонна да атын омуктары кытта бииргэ алтыһан олороллорун хартыынаҕа тистилэр. Хас биирдии улуус тугунан барҕарарын түөлбэлэринэн араартаабыттара - бу биһиги киэҥ иэҥнээх дойдубут оҥорон таһаарыы бары көрүҥэр көхтөөх кыттыыны ыларын туоһута буолар.