Хаһаастаах хаһаайка

Уус Алдан улууһун Бээрийэ нэһилиэгиттэн төрүттээх Анна Копырина Хатаска олохсуйбута үйэ аҥара кэриэтэ кэм буолла. Кэргэнинээн Иван Васильевичтыын  түөрт уолларын атахтарыгар туруоран, билигин оҕолоругар, сиэннэригэр тутаах, туһа киһи буола сылдьар. Анна Ионовна урут-уруккуттан оҕуруот аһын сөбүлээн олордор. Төһө даҕаны 84 сааһыгар сырыттар ытык кырдьаҕас сыллата өлгөм үүнүүнү ылар. Быйыл даҕаны оҕурсу, хаппыыста, помидор, биэрэс, сүбүөкүлэ, моркуоп олордон, билигин ону кыһыҥҥыга хаһаанан астыыр түбүккэ сылдьар.  

Анна Копырина, Хатас нэһилиэгин, Уус Алдан улууһун Бээрийэ, Түүлээх нэһилиэктэрин бочуоттаах олохтооҕо: "Биирдии киилэ оҕуруот аһын кутан баран 200мл мас арыыта кутабыт. Биэрэһэ, эриэппэ лууга, помидора барыта киилэлии буолар. Тууһу сэттэ кыра ньусканы кутабыт".

Анна Ионовна оҕуруотун аһыттан  лечо, аджика, салат бэлэмниирин ордорор. Лечо оҥорорго луугу, биэрэһи, помидору барытын биир киилэни ылан, арыы, туус, саахар, кутан оргутар, кыра уксуустаан истикилээҥкэлэргэ кутан хаһаанар. Анна Ионовна олоххо бэрт көхтөөх сыһыаннаах. Төһө даҕаны уон кылаас үөрэхтээх буоллар, олох-дьаһах бары эйгэтигэр үтүө суобастаахтык үлэлээн-хамнаан бочуоттаах сынньалаҥҥар олорор. Нэһилиэктэригэр "Саха төрүт" аһа диэн түмсүү ааспыт сылтан үлэлиир, онно Анна Ионовна киирсэн төрүт былыргы аһы-үөлү тарҕатыыга, үйэтитиигэ ылсан дьарыктанар.

"Сүрүн дьарыгым үүнээйинэн эмтэнии буолар. Ордук үөрэ отун сөбүлээн туһанабын. Бу оту бэс ыйын ортотуттан хомуллар. Сүрүннээн урукку бааһыналар кытыыларынан үүнэр", - диэн Анна Ионовна санаатын үллэстэр. 

Үөрэ отун хомуйан, хатаран, кыра гына кырбаан, оргутан киһи доруобуйатыгар бэрт туһалаах, эмтиир эбиилик гына оҥорор. Үөрэ ото силиһиттэн тиийэ барыта туһаҕа барар диэн Анна Ионовна кэпсиир. Уутун туспа иһиэххэ сөп, онтон отун туспа сэлиэйдээн, суораттаан бутугас диэн ас оҥорон бэлэмниир. Бэйэ оҕуруотун олордорун, эмтээх оттору хомуйарын таһынан сир аһын үгүс көрүҥнэрин кыһыҥҥыга барыанньалаан хаһаанар.

"Отону тааска кутан ньыһыйабын, онтон саахарын эбэбин уонна биир суукка туруорабын. Онон бүтэр. Оргуппаппын, оччоҕо ордук иҥэмтиэлээх буолар", - диэн Анна Ионовна кистэлэҥин арыйар.

Ытык кырдьаҕас хаһаайкаларга сайын үтүөтүгэр аскытын булунан хайаан да хааччыныҥ. Бэйэ үүннэрбит оҕуруотун, төрөөбүт дойдубут айылҕатын бэлэҕин-сир аһын хото хомуйан уһун кыһыны минньигэс битэмииннээх, иҥэмтиэлээх астаах-үөллээх атаарын диэн сүбэлиир.