Бэрдьигэстээх оҕолоро аны таһырдьа дуобаттыахтара
Бэрдьигэстээх "Эбэ" түөлбэтэ 2019 сыллаахха улуус даһалтатын граныгар кыайан 500 тыһыынча солкуобайынан үбүлэнэн оҕо былаһааккатын оҥостубута. Бу кэмтэн ыла хас сыл ахсын эбэлэр былаһааккаларыгар эбии саҥа оҥоһуктары туруоран, сибэкки үүннэрэн кыһынын хаар оҥоһуктарынан киэргэтэн кэллилэр. Ааспыт сылга Вероника Сергеева салалталаах түөлбэ "Оҕолорго дуобакка күрэс" диэн бырайыактара Ил Дархан гранын үһүс түһүмэҕин куонкуруһугар кыайан 150 тыһыынча үпкэ тиксибитэ. Бу үбүнэн оҕо былаһааккатын иһигэр дуобаттыырга анаммыт эрэһиинэ хонуу тэлгэннэ.
Вероника Сергеева, "Эбэ" ТОС бэрэссэдээтэлэ: "25 квадратнай миэтэрэ иэннээх дуобат эрэһиинэ хонуутун оҥоруохтаахпыт диэн этэ. Хонууну Дьокуускай хампаанньата бэрт түргэнник оҥордо, онтон фигураларын олохтоох урбаанньыт кыһан оҥорон биэрдэ".
Ааспыт 2022 сылга СӨ ыччат дьыалаларыгар уонна социальнай коммуникацияҕа министиэристибэтин нөҥүө Ил Дархан түөлбэлэри өйүүргэ 17 мөлүйүөн солкуобайдаах үбэ грант быһыытынан улуустарга тарҕаммыта. Манна Горнай улууһа бастаан 1 мөлүйүөн 700 тыһыынча солкуобайы ылбыта.
Ксения Васильева, Бэрдьигэстээх нэһилиэгин баһылыгын солбуйааччы: "Биһиги улууспут бастакы миэстэни ылан 1,7 мөлүйүөн ылбыта. Онтон иккис түһүмэххэ улуус бэйэтин нэһилиэктэрин иһигэр ыытар күрэҕэр Бэрдьигэстээх нэһилиэгэ кыттаммыт, маҥнайгы миэстэ буоламмыт 870 тыһыынчаны ылбыппыт. Аны үһүс түһүмэх быһыытынан бу харчыбытын түөлбэлэргэ күрэх биллэрбиппит. Онно “Эбэ” түөлбэ дуобат хонуутун оҥорор олус сэргэх бырайыагы киллэрэн 150 тыһыынчаны ылбыта".
Дуобат хонуутун арыйыы төһө да күһүҥҥү тыаллаах тымныы күҥҥэ түбэстэр, хамаанданан оонньуон баҕалаах оҕолор Бэрдьигэстээх араас муннуктарыттан муһуннулар, ол курдук уопсайа 5 түөлбэттэн кыттааччылар кэлэн өй-мэйии тургутугун аастылар
Вероника Сергеева, "Эбэ" ТОС бэрэссэдээтэлэ: "Уопсайа 8 хамаанда туран дуобат күрэҕэ олус тыҥааһыннаахтык саҕаланан бара турар. Уопсайа күрэхпитигэр 5 түөлбэ сайаапка биэрбитэ".
"Эбэ" түөлбэтин чиэһин дуобакка Россия чемпиона, өрөспүүбүлүкэҕэ үгүс ситиһиилэрдээх Кристина Захарова көмүскээтэ, кыра сааһыттан бу көрүҥүнэн сөбүлээн дьарыктаммыт кыыс, дьиэтин таһыгар хонуу тэлгэммититтэн үөрэр, сайыҥҥы өттүгэр былаһааккаҕа доҕотторбун кытары дьарыктаныахпыт этэ диэн санаатын үллэстэр.
Кристина Захарова: "5 кылааска үөрэнэбин. Дуобакка уһуйаан сааспыттан оонньуубун. Аан бастаан оонньуурга аҕам үөрэппитэ. Онтон билигин теренердэрим Чаҕыл Степанович уонна Степан Николаевич. Оонньуур былаһааккабытыгар дуобат хонуутун оҥорбуттара олус үчүгэй".
Эбэлэр оҕолорго бэлэхтэрэ манан муҥурдаммат, ол курдук "Тиэргэн футбола" диэн бырайыагынан дойду президенин гранын кыайан 996 тыһыынча солкуобай үбү ылбыттар, бу харчынан оҕо былаһааккатын кэлин өттүгэр, инчэҕэй сиргэ кумах куттараннар, тимиринэн күрүө оҥоттороллор, бу күннэргэ манна үлэ күөстүү оргуйар.
Вероника Сергеева, "Эбэ" ТОС бэрэссэдээтэлэ: "Манна футбол хонуутун оҥоробут. Уопсайа 640 куб кумах кутулунна. Билигин сыбаарка үлэтэ бара турар. Онон аҕыйах күнүнэн күрүөтэ бүтүөхтээх".
Аһаҕас халлааҥҥа бастакытын ыытыллыбыт оҕолор дуобакка күрэхтэһиилэрин түмүгүнэн "Үрдэл" түөлбэ хамаандата бастаата, иккис миэстэҕэ "Эбэ" түөлбэтин бастакы хамаандата, үһүскэ "Эбэ" түөлбэтин иккис хамаандата таҕыстылар. Бу курдук күһүҥҥү биир күҥҥэ "Эбэ” түөлбэтигэр оҕо бырааһынньыга үөрүүтэ-көтүүтэ тэрилиннэ.