Үлэтэ суох ахсаана аччыыр

Саха сиригэр уопсай үлэтэ суох киһи ахсаана 28 аҥар тыһыынча киһи. Онтон учуокка турааччытын ахсаана түөрт тыһыынча кэриҥэ киһи. Балаһыанньа бу кэнники уустук үс сылы кытта тэҥнээтэххэ аматыйда. Ол курдук уопсайа үлэлээх киһи ахсаана сыл саҥатыттан уон биэс тыһыынча киһинэн эбилиннэ. Онтон учуокка турар киһи ахсаана  былырыыҥҥы көрдөрүүттэн икки тыһыынчаттан тахса киһинэн аҕыйаабыт. Ол эрээри улуустарынан ыллахха, үлэнэн дьону хааччыйыы кытаанах.

“Олохтоох каадырдары – бырамыысыланнаска” бырайыак олоххо киирбитэ алтыс сыла. Бу кэм тухары Саха сирин үрдүнэн уопсайа уонунан тыһыынча бэйэ дьоно бөдөҥ тэрилтэлэргэ үлэлиир кыахтанна. Бу бырайыагы Нэһилиэнньэ дьарыктаах буолуутун кэмитиэтэ 2020 сыллаахтан төрүттэммит “На вахту 14” диэн платформаны кытта тэҥҥэ ыытар. “На вахту 14” бырайыак чуолаан тыа сирин олохтоохторун бырамыысыланнаска тэрилтэлэргэ үлэҕэ киллэрэргэ ылсан бары өрүттээх үлэни тэрийэр. Бу платформа автора, бырайыак салайааччыта Петр Чехордун этэринэн, бу үс кэриҥэ сыл иһигэр уопсайа икки тыһыынчаттан тахса олохтоох ыччаты тустаах идэлэргэ үөрэтэн промышленнай тэрилтэлэргэ үлэнэн хааччыйбыттар. Билигин даҕаны бу хайысхаҕа үлэ саҕаланан барар.

Пётр Чехордун, "На вахту14.рф" бырайыак салайааччыта: «Атырдьах ыйыгар 250 саха ыччатын сэттэ бөлөххө арааран хайаны байытыы идэтигэр үөрэттэрбит. Бастакы бөлөх номнуо бардылар, иккис бөлөх нэдиэлэ бүтүүтэ барыахтара үлэлиир сирдэригэр. Буурдааччылар, сир анныгар үлэлиир исписэлиистэр бааллар. Кинилэр КОЛМАР, ЭЛЬГА курдук бөдөҥ хампаанньаларга үлэҕэ киирдилэр».

Үлэ ырыынагар рабочай идэлээх дьоҥҥо наадыйыы үрдүк. Ол курдук дьарыктаах буолуу сулууспатыгр үлэһиккэ наадыйыы уопсай ахсааныттан рабочай идэлээх дьоҥҥо наадыйыы улахан аҥарын ылар. Онон маннык идэҕэ үөрэнэниэн баҕалаахтар, итиэннэ үлэ көрдөнөөччүлэр дьарыктаах буолуу кииннэриттэн, биитэр бу Айти парка5а баар   “На вахту 14” бырайыагынан дьарыктанар тэрилтэҕэ кэлэн сиһилии билсиэхтэрин сөп. Быйылгы сылтан дойдуларыгар эргиллэн кэлбит анал байыаннай дьайыы кыттыылаахтарын кытта, чуолаан кинилэри үлэнэн хааччыйыыга ылсан дьарыктаналлар.

Пётр Чехордун,  "На вахту14.рф" бырайыак салайааччыта: «Ил Дархан көмөтүнэн дьоммутун босхо үөрэтэн, үлэҕэ киллэрэргэ дьаныһа сылдьабыт. Ааспыкка барбыт 30 киһиттэн 10 анал дьайыы кыттыылаахтара. Онтон кэлэр бөлөххө 4 киһи баар».  

Оттон үлэ миэстэтин ахсаанын ылар эбит буоллахха, бүгүҥҥү күҥҥэ өрөспүүбүлүкэ үрдүнэн уопсайа 15 тыһыынчаттан тахса үлэ миэстэтэ баар. Сүрүннээн вакансия бырамыысыланнай тэрилтэлэргэ уонна рабочай идэлэргэ элбэх. Дьокуускайга барыта 6 тыһыынчаттан тахса үлэ миэстэтэ баар.

Мария Слепцова, Дьокуускайдааҕы нэһилиэнньэ дьарыктаах буолуутун киинин салайааччы: «Араас менеджердэр, инженердэр, экономистар, медицинскэй сиэстэрэлэр ирдэнэллэр. Онтон оробуочай идэлэргэ суоппардар. Манна ордук автобус үлэһиттэригэр наадыйаллар. Ону таһынан суол оҥорооччулар, повардар наадалар».

Бэлиэтээн эттэххэ, 2024 сылга диэри 27 промышленнай тэрилтэҕэ 27 аҥар тыһыынча киһини үлэнэн хааччыйыы былааннанар.