10 күннээх оҥорон таһаарыы дьаарбаҥката барар

Хомсомуол болуоссакка өрөспүүбүлүкэтээҕи  тыа хаһаайыстыбатын ас-үөл атыы дьаарбанката ыытылынна. 100 тахса бэйэ аһын оҥорон таһаарар тэрилтэлэри түмтэ.Тэрээһиҥҥэ агро хайысхалаах оскуолалар эмиэ кытыннылар. Урукку сылларга дьаарбаҥка 2-3-түү күн ыытыллар эбит буоллаҕына, быйыл 10 күн ыытыллар. Бу күннэр устата 2 түһүмэҕинэн хайдыһан араас улуус бастыҥ аһа көрдөрүүгэ таҕыста. Чурапчы улууһун Мырылатыттан сылдьар Күннэй Тимофеева мүөттээх ыҥырыаны иитиинэн 3-с сылын дьарыктанар. Быйылгы дьаарбаҥка чэрчитинэн ыытыллар бастыҥ мүөт күрэҕэр кыттыыны ылла.

Күннэй Тимофеева,  "Ас-үөл-2023" дьаарбанка кыттыылааҕа: «Бэйэбит пасекабытыттан оҥорон таһаарар сүһүөх маастаахпыт. Манна ыҥырыаларбыт дьааттарын бэйэлэрэ оҥорбут буоскаларыгар кутан артроз, артрит курдук уҥуох-сүһүөх ыарыыларыгар уонна тирии бааһыгар туттуллар мааһы атыыга аҕалан турабыт».

Үгэскэ кубулуйбут дьаарбаҥка быйыл Үлэ сылыгар ананна. Өрөспүүбүлүкэ үрдүнэн бөдөҥ хаһаайыстыбалар бары быйылгы былааннарын 100% ситэн, кыстыкка киирэргэ бэлэмнэрин иһитиннэрдилэр. Сыл ахсын ыччат дьон көхтөөх кыттыыны ылан, тыа хаһаайыстыбата инникилээҕин бигэргэттилэр. Быйылгы тэрээһин балаҕан ыйын 23 күнүгэр Тыа хаһаайыстыбатын министиэристибэтин бирииһигэр АГАТУ ипподромугар ат сүүрдүүтүнэн түмүктэниэҕэ.

Артём Александров, СӨ тыа хаһаайыстыбатын миниистирин солбуйааччы: «Кыайыылаах хаһаайыстыбалары оҥорон таһаарар астарын хаачыстыбатынан сыаналыахпыт. Ол курдук Ас хаачыстыбатын киинигэр лабораторнай чинчийии оҥоһуллуо».

Мэҥэ Хаҥалас улууһун Майа агро орто оскуолатын кэлэктиибэ дьаарбанкаҕа көхтөөх кыттыыны ылла. Сайын устата оскуола оҕолоро хомуйбут эмтээх отторуттан чэй арааһа, оскуола буфетыгар атыыланар минньигэс ас эгэлгэтэ көрдөрүүгэ туруорулунна.

Анна Евсеева, В.П. Ларионов аатынан Майатааҕы агро оскуола учуутала: «Биһиги сыллата дьаарбаҥкаҕа кытта киирэбит. Ол курдук биһиги сүрдээх элбэх проектаахпыт. Холобура, араас барыанньалары оҥоробут».

Профессор Георгий Башарин аатынан Сылан орто оскуолатын кэлэктиибэ С битэмииннээх моонньоҕон сэбирдэҕиттэн эмтээх чэйдэри атыыга таһаарда. 3 сыл устата үрдүк таһымнаах научнай кэмпириэнсийэлэргэ бастыҥ көрдөрүүнү ылбыт бэйэ чэйэ тымныйыыттан уонна да атын араас ыарыылартан көмүскүүрэ дакаастаммыта.

Сардаана Баишева,  Г.П. Башарин аатынан Сылан орто оскуолатын технолога: «Саха киһитигэр саамай үчүгэй. Куртахха, оһоҕоско, сүрэххэ, харахха, быарга, бүөргэ барытыгар туһалаах. Онон чэйдэрбитин үксүн моонньоҕон сэбирдэҕиттэн оҥордубут».

Сибэкки арааһа, бэйэ этэ, халбаһыта, балыга, үрүҥ ас эгэлгэтэ. Дьокуускай куорат олохтоохторо тымныы күнү ахсарбакка, кыһыҥҥы хаһаастарын булунан хастыы эмэ суумка тутуурдаах дьиэлииллэр, оттон саҥа кэлбит атыылаһааччылар эрдэттэн испииһэктэнэн ас бастыҥын ылаары ыксыыллар.

Быйылгы тэрээһин чэрчитинэн бурдугу ыһыы култууратын уонна сылгы иитиитин экспертэрэ маастар-кылаастары уонна туһалаах лиэксийэлэри ыытыахтара. Куорат олохтоохторо тыа сиригэр үлэ-хамнас хайдах барарын сиһилии билсэр кыахтаныахтара.