Орто Халымаҕа "Якутоптторг" тэрилтэ саҥа атыы-эргиэн, тарҕатар киинэ арылынна
Кыһыл лиэнтэ быһыллан, Орто Халыма киинигэр историяҕа киирэр бэлиэ түгэн тосхойор. Оттон бу күн Халымалар үөрүүлэрин Владивосток куораттан экономическай форум кыттыылахтара, Арктика сайдыытыгар үлэлии сылдьар үрдүк сололоох салайааччылар кыттыыны ылан, улуус олохтоохторун үөрүүлэрин үллэһиннилэр.
Халыма өрүс хаҥас кытылыгар саҥа баараҕай эбийиэги тутуу ааспыт сыл атырдьах ыйыттан саҕаламмыта. Уонна биир сыл иһигэр көдьүүстээх үлэ түмүгүнэн, 2 мэндиэмэннээх 500 тахса кыбадыраатынай миэтирэ иэннээх киин үлэҕэ киирдэ. Манна Орто Халыма улууһун олохтоохторугар төгүрүк сыл устата сибиэһэй оҕуруот аһа, фуруукта, үрүҥ ас арааһа, итиэннэ халбаһы-хопчуонай бородууксуйата баар буолуоҕа.
«2021 сыллаахха икки бастакы атыы-эргиэн логистическай кииннэрин Өрөспүүбүлүкэ бүддьүөтүттэн харчы көрүллэн туппут буоллахпытына, кэлиҥҥи эбийиэктэрбит федеральнай өйөбүл көрүллэн, Уһук Илин уонна Арктика сайдыытын министиэристибэтин лиинийэтинэн тутулла тураллар. Бу күннэргэ Орто Халымаҕа саҥа эбийиэкпит киирдэ, кини иэнэ 578 кв. Миэтирэ буолар уонна таһыгар өссө улахан тымныы складтаах», - диэн "Якутоптторг" тэрилтэ пресс-сулууспатын үлэһитэ Алёна Дьяконова сырдатта.
Чахчы, саҥа киин аныгы ирдэбилгэ толору эппиэттиир. Саҥа сүүрээн киллэрии - манна олохтоох нэһилиэнньэ бултуйуутун, көмүс хатырыктааҕын, күндү түүлээҕин, сир аһын туттарар кыахтаннылар. Маны таһынан, оҕуруот аһын харайар анал температурнай эрэһиимнээх ыскылаат олохтоохторго да, үлэһиттэргэ да төһүү буолуоҕа.
«Урут уруккуттан эргэ маҕаһыыҥҥа кэлэн атыылаһар этибит. Кыһын олус тымныы этэ, үлэлиир да дьоҥҥо эрэйдээх этэ. Уочаракка өр турар этибит. Билигин сабыс-саҥа наһаа үчүгэй маҕаһыын астылар, киирдэххэ сып-сырдык, ып-ыраа, итии. Уочаракка өр турбаккын, иккилии киһи үлэлиир. Баһыыбаларын, маладьыастар», - диэн Орто-Халыма улууһун олохтооҕо Прасковья Армеец үөрүүтүн үллэһиннэ.
Арыллыбыт киин Халыма бөлөх улуустарын аһынан-үөлүнэн, киһи олоҕор наадалаах табаарынан хааччыйыаҕа. Оччотугар, ыраах сытар нэһилиэктэргэ эмиэ сибиэһэй бородууксуйа удамыр сыанаҕа тиийиэҕэ. Манна чопчулаан биэрдэххэ, бу сылга өссө эбии маннык кииннэр үлэҕэ киириэхтэрэ, оттон 2025 сылга бары Арктическай улуустарга.