Олоххо туһалаах, уопсастыбаҕа наадалаах идэлэри баһылааһын
Олох-дьаһах коммунальнай хаһаайыстыбатын эйгэтин үлэһиттэрин бэлэмниир техникум быйылгы үөрэх дьылыгар саҥа сүүрээннэри киллэрэн, үлэтин саҕалаата. "Цифровая образовательная среда" диэн бырайыагынан саҥа икки толору хааччыллыылаах кабинеттары оҥостоннор, үөрэх хаачыстыбата биллэ тубуста. Ол курдук, 31 ноутбук уонна 3 интерактивнай дуосканы ыллылар.
«Бу саҥа ылыллыбыт ноутбуктар тустарынан этэр буоллахына, барыта российскай програмнай хааччыллыы турар. Туох баар офиснай систиэмэтэ турар, үөрэххэ тутатына туһанан киирэн бараҕын. Информатиканы ыытарга барыта баар», - диир Дьокуускайдааҕы дьиэ-уот коммунальнай хаһаайыстыбатын уонна тутуу техникумун үөрэххэ, производственнай үлэҕэ дириэктэрин солбуйааччы Степан Касьянов.
Техникум бары мастарскыайдара аан дойду таһымыгар эппиэттиир хааччыллыылаах буоланнар, үрдүк таһымнаах специалистары бэлэмнииргэ табыгастаах. Манна уолаттар эрэ буолбакка, кыргыттар эмиэ үөрэнэллэр. Бары олоххо туһалаах, уопсастыбаҕа наадалаах идэлэри баһылыыр баҕалаахтар. Вилена Федотова үөрэҕин бүтэрдэҕинэ араас прибордары, тэриллэри кээмэйдиир, хонтуруоллуур маастар буолуоҕа.
«Термометрдары бэрбиэркэлиир маастар буолабын. ГРЭСка үлэлии киириэхпин сөп. Бастаан ханна киирэбин диэн өр толкуйдаабытым. Ону маннык үөрэх, идэ баар диэн сүбэлээбиттэрэ. Элбэх идэ баара, бу быдан үчүгэй буолуо дии санаабытым».
Онтон Герман Бубякин уот ситимин хайысхатын талбыт. Уһун кыһыннаах Саха сиригэр уоту, итиини биэрии тутаах эйгэ. Кини идэлээх киһи өрүү наада диэн бэлиэтиир. Билигин иккис кууруска үөрэнэр, сотору кэминэн идэтин толору баһылаан, үлэ үөһүгэр киирэргэ бэлэмнэнэр:
«Электрик буолаары бу идэни талбытым. Интириэһинэй, учууталлар үчүгэйдик кэпсииллэр, үөрэтэллэр. Барытын өйдүүбүн».
Коммунальнай эйгэ үлэтин ымпыгын-чымпыгын билэргэ сатабылы эрчийии суолталаах. Практическай үөрэх кэмигэр ирдэбил быһыытынан устудьуоннар анал үлэлиир таҥастаах, сэрэхтээх буолуу быраабылаларын тутуһан үлэлииллэр.
Быйылгы үөрэх дьылын техникум 600 тахса устудьуоннаах саҕалаата, олортон бастакы куурустара 215 оҕо. Оҕолор сылын ахсын практикаларын тутуу тэрилтэлэригэр, өрөспүүбүлүкэбитигэр баар олох-дьаһах коммунальнай хаһаайыстыба эбийиэктэригэр ааһаллар. Онон бүтэрэллэригэр идэлэрин толору баһылаан тахсаллар.
«Сүрүн сыалбыт-сорукпут диэн, кинилэр практикаҕа үөрэххэ ылбыт билиилэрин тиийэннэр үлэлээн көрдөрүөхтээхтэр буоллаҕа дии. Олус үчүгэй практикалаахпыт, биһиги тэрилтэлэрбит устудьуоннар практикаҕа барар буоллахтарына, аҥардас үөрэтии эрэ буолбакка, настаабынньыктары сыһыаралларын, салайааччыны аныылларын таһынан, хамнас төлүүллэр», - диэн Дьокуускайдааҕы дьиэ-уот коммунальнай хаһаайыстыбатын уонна тутуу техникумун дириэктэрэ Евгений Попов иһитиннэрдэ.
Үөрэх кыһата Сахабыт сиригэр тутууга уонна коммунальнай хаһаайыстыбаҕа специалистары бэлэмнииргэ сүдү суолталаах. Сыллата техникум выпускниктара өрөспүүбүлүкэбит бары муннуктарыгар тиийэн, олоҕу -дьаһаҕы хааччыйыыга үлэлииллэр.