ХИФУ уопсайдарыгар быйыл 1,5 тыһыынча кэриҥэ бастакы куурус устудьуона киириэҕэ

Сунтаар улууһуттан сылдьар Злата Татаринова зарубежнай филология институтун үһүс кууруһун устудьуона. Бастакы куурустан уопсайга хабыллан олорор. Хосторо үс миэстэлээх, сотору кэминэн өссө биир устудьуону киллэриэхтэрэ. Билигин бииргэ үөрэнэр кыыһын кытта иккиэйэҕин олороллор:

«Үөрэхпит саҥа саҕаланан эрэр. Мин корейскай тылы үөрэтэбин уонна сотору оскуолаҕа практикалана барыахтахпыт. Үөрэхпин бүтэрдэхпинэ баҕар переводчик буолуом, баҕар Кореяҕа барыам. Россия уонна Корея икки ардыгар үлэлиир баҕалаахпын».

Бүгүҥҥү күҥҥэ хотугулуу илин федеральнай университет “Сэргэлээх” устудьуоннар куораттарыгар 16 уопсай дьиэ баар, онтон 13  барыта 4400 устудьуон олорор.  Олортон биир тыһыынча икки сүүстэн тахсата бастакы куурус устудьуоннара буолаллар. Сайын университет тутар хамыыһыйата үлэлиир кэмигэр, дьүөрэлии уопсайга киирэр оҕолор докумуоннарын хомуйбуттара.

«Манна киирэрбэр үс буолан олорбуппут, билигин эмиэ үспүт. Бары эйэлээхпит, ырааһы тутуһабыт. Саамай сүрүнэ, быраабыланы кэспэккэ олордоххо үчүгэй», - диир ХИФУ 2 кууруһун устудьуона Андрей Пахомов.

Уопсайга киириини хас биирдии институт, факультет тустаах хамыыһыйата сүрүннүүр. Социальнай балаһыанньаларынан чэпчэтиинэн туһанааччылар, уочарата суох уопсайынан хааччыллар кыахтаахтар.

“Уопсайга киирээччилэр балаһыанньаларынан, льготанан көрүллэр. Бастакы, иккис гурууппалаах инбэлииттэр, тулаайах оҕолор, анал байыннай эпэрээссийэ кыттыылааҕын оҕолоро, эбэтэр устудьуоммут бэйэтэ СВОҕа сылдьыбыт буоллаҕына уочарата суох киирэллэр. Ол кэнниттэн толорута суох дьиэ кэргэттэр уочаратынан уонна дьиэ кэргэн хамнаһын алын кээмэйин докумуонун биэрбиттэринэн көрөн, ааҕан-суоттаан хамыыһыйа быһааран уопсайга киирэллэр”, - диэн ХИФУ устудьуоннарын тэрилтэтин дириэктэрин солбуйааччы Пётр Борисов сырдатта.

Устудуьоннартан уопсайга киирэргэ сайабылыанньаны үөрэх сылын устата хомуйаллар. Ол курдук, хас биирдии уопсайга миэстэ халбаҥныы турар, ким барар, ким үөрэҕиттэн уурайар, онон миэстэ тахсар түгэнигэр эрдэ кыайан хапсыбатах устудьуон уопсайга киирэр кыахтаах. Уопсайга олорорго, үөрэнэргэ бары усулуобуйа баар. Хас биирдии секцияҕа астанар, суунар-тараанар хостор бааллар.

«Миэхэ уопсайбар 500 тахса устудьуон олорор. Быйыл сайын устата үчүгэй өрөмүөн үлэтэ барда. Эһиилги Азия оҕолоро оонньууларынан сибээстээн, хостору уонна общественнай сирдэри кырааскалаатылар. Хосторго барыларыгар түннүктэр уларыйдылар», - диэн ХИФУ 6-В №-дээх уопсайын сэбиэдиссэйэ  Людмила Хабарова кэпсээтэ.

Анна-Сахаайа Степанова 66 корпус уопсайыгар үөрэххэ киириэҕиттэн- маҥнайгы куурустан олорор. Быйыл өрөмүөн ыытыллан сүргэбит көтөҕүллэ сылдьар диэн санаатын үллэстэр:

«Быйыл үчүгэй өрөмүөннэх, бэлэм уопсайга киирбиппит. Истиэнэбит кырааскаламмыт, саҥа түннүктээх. Олус үчүгэй, астынныбыт ахан».

Уопсай хас биирдии устудьуоҥҥа иккис дьиэтин кэриэтэ. Онон олорорго сөптөөх усулуобуйа баар буоллаҕына, үөрэх таһаарыылаах, ситиһиилээх буолар.