Владимир Ларионов төрөөбүтэ 85 сылыгар аналлаах XI Евразийскай симпозиум
Сахалартан бастакы академик, Владимир Ларионов, төрөөбүтэ 85 сылыгар аналлаах XI Евразийскай симпозиум ыытылла турар. Тэрээһин сыалынан Сибииргэ уонна чуолаан Арктика оройуоннарыгар үлэлиир усулуобуйаны тэрийэргэ, массыына уонна үлэ тэрилэ бөҕө матырыйаалынан хааччыллыыта буолар.
Тымныы кыһыны тулуйар бөҕө матырыйаалтан үлэ тэрилин оҥоруу, тыйыс усулуобуйаҕа сыбаарка үлэтэ хайдах ньыманан ыытыллыахтааҕын туһунан симпозиум тула кэпсэтии ыытыллар. 2002 сыллаахха бастаан ыытыллар симпозиумҥа Владимир Ларионов Арассыыйа учуонайдарыгар саха сиригэр үлэ-хамнас, көмүһү, алмааһы уонна да атын сиртэн хостонор баайы хостуурга бэйэтин үлэтин билиһиннэрбитэ. Онтон ыла тиһигин быспакка, икки сылга биирдэ ыытыллар бүтүн арассыыйатааҕы тэрээһин сылтан сыл кэҥээн, үгүс учуонайдары хабан үлэлиир.
«Бүгүн Аан дойду, Россия, Өрөспүүбүлүкэ сайдыыта барыта технологиялары кытта сибээстээх. Иннэ гынан саҥа матырыйааллары, технологиялары туттуу, биһиги дьоммутугар-сэргэбитигэр туһалаах диэн тураммыт, бу симпозиуму ыытабыт», - диэн РНА СС Саха сиринээҕи чинчийэр киинин генеральнай дириэктэрэ Михаил Лебедев иһитиннэрэр.
Маннык тэрээһин үтүө түмүктэринэн арассыыйаҕа оҥоһуллан тахсар тимири уонна да атын матырыйааллары туһанан үлэ тэрилин оҥоруу буолар. Ол курдук Россия бөдөҥ көмүһү хостуур, оҥорон таһаарар хампаанньалара, Владимир Ларионов улахан массыыналарга оҥорбут чинчийиитин үтүө түмүгүн олоххо туһаналлар.
«Россияҕа оҥоһуллар матырыйааллары, техниканы күүскэ туттуохпутун наада. Ол чааһыгар урукку курдук тас дойду матырыйаалларын туһаммакка, үксэ бэйэбит матырыйаалбытын туттар кыһалҕа тахсан кэллэ. Син биир олохпут уларыйан иһэр, ол быһаарыыта эмиэ элбэх буоллаҕа дии», - диир РНА СС Саха сиринээҕи чинчийэр киинин наукаҕа дириэктэрин солбуйааччы Николай Голиков.
Симпозиум 4 күн устата ыытыллыаҕа. Уопсайа саха сириттэн 200, арассыыйа атын куораттарыттан 15 учуонай кэлэн кыттыыны ыла сылдьаллар. Маны таһынан, кэтэхтэн 20 кыттааччы баар. 5 секцияҕа хайдыһан 200 тахса дакылааттары кэпсэтиэхтэрэ, бүгүҥҥү күҥҥэ сытыытык турар кыһалҕалары ырытыһыахтара.
«Саамай сүрүн кыһалҕабыт – Хоту кыһалҕата. Үчүгэйдик олорор гына социальнай боппуруостары, техника үчгэйдик үлэлиирин туһугар, саҥа матырыйааллары, массыыналары оҥорор туһугар. Уонна сэрэхтээх буолууга информационнай технологияны космоска хайдах туттарарга», - диэн этэр Физика уонна техника кыһалҕаларын үөрэтэр үнүстүүт сүрүн научнай үлэһитэ Олег Слепцов.
Тыйыс тымныыга сыбааркаламмыт оҥоһуу төһө уйумтуотун, тимири уһаарыы төһө кыраадыска ыытылыннаҕына уһун үйэлээх буоларын кэлии ыалдьыттар кэлэн иһиттилэр. Уонна маны таһынан симпозиум чэрчитинэн, "Энергетика северных территорий" диэн научно-практическай конференция ыытыллыаҕа. 93 саастаах учуонай Никита Соломонов бу тэрээһиҥҥэ көхтөөх кыттыыны ылла.
«Саха ыччатын техникаҕа таһаарыт киһинэн буолар - кини. Кини науката, общественнай үлэтэ ,депутата даҕаны, барыта биир сыалга», - диир биология наукатын доктора Никита Соломонов.
Сылтан сыл арассыыйа наукатын хайысхалара кэҥээн сайдан иһэллэрин, бу тэрээһин бэлиэтээтэ. Арктика хоту улуустарыгар үлэ таһаарыылаахтык барарыгар Владимир Ларионов оҥорбут өҥөтө төһүү күүс буолар.