Саха сиригэр итирик туруктаах суоппар элбээбитэ бэлиэтэнэр
Бу көстөр каадырдарга "Бүлүү" федеральнай трассатын 60 килэмиэтиригэр кыра уйуктаах "Тойуота Спасио" массыына улахан таһаҕаһы тиэйэр "Вольво Трак" массыынаны кытта харсыһан, улахан суол саахалын таһаарда. Быһылаан видеота социальнай ситимнэринэн тэлийэ көттө. Биир күн буолаат тутатына, Томмот бөһүөлэгин таһыгар эмиэ суол саахала бэлиэтэннэ. Ити курдук бу күннэргэ утуу-субуу улахан суол быһылааннара тахсыбыттарын туһунан иһитиннэриилэр тахса тураллар.
«Дьокуускай Вилюйскай тракт 60 килэмиэтиригэр 99 сыллаах төрүөх эдэр уол иномарка массыына ыытан иһэн, утары суолга киирэн биэрэн грузовой массыынаны кытта харсыһыыны таһааран, олохтон туораабыта. Уонна бу бэҕэһээ Өрөспүүбүлүкэ үрдүнэн Алдаҥҥа, Үөһээ Бүлүүгэ уонна Дьокуускай куоракка буолла. Итирик туруктаах суоппар буруйдаах Үөһээ Бүлүүгэ таҕыста. Бэҕэһээ күнүс 11 чаас саҕана дьахтар суоппар массыынаны ситэн ааһаары харсыһыыны таһааран эчэйии ылла. Бэйэтэ итирик туруктааҕа бэлиэтэннэ», - диэн суолга-иискэ куттала суох буолууну хааччыйар СӨ государственнай инспиэксийэтин пропагандаҕа старшай инспиэктэрэ Күннэй Иванова иһитиннэрдэ.
Сыл саҕаланыаҕыттан киһи эчэйиилээх 519 суол саахала таҕыста, 49 киһи олохтон туораата уонна 676 киһи араас таһымнаах эчэйиилэри ыллылар. Үксүгэр саахал итирик туруктаах уруулга олорууттан тахсар, онон аһыы утаҕы иһиини аччатыы биллэриллэн, ГИБДД инспектордара суолга хонтуруол ыыталлар.
Итирик туруктаах суоппар элбээбитин хомолтолоох статистика көрдөрөр, ол курдук аһыы утаҕы испит суоппар буруйуттан 59 суол быһылаана бэлиэтэннэ, 9 киһи суорума суолланна уонна 74 киһи эчэйэн балыыһаҕа көрдөрдө.
Аахсыйа кэмигэр суоппардары кытта өйдөтүү-сэрэтии үлэтэ ыытылынна, өйдөбүнньүк кумааҕы туттарылынна. Бу аахсыйаҕа кыттыспыт тимир көлөлөөхтөр бары кэриэтэ аһыы утаҕы утарар, итирик туруктаах уруулга олорор сэрэхтээҕин өйдүүр дьон буоллулар.
Хомолтолоох суол быһылааннара суоппар суол быраабылатын тутуспат буолуутуттан эмиэ тахсар. Суолга дьалаҕай сыһыан, болҕомтото суох буолуу, кыра даҕаны сыыһа туттуу иэдээҥҥэ тириэрдиэн сөп. Онон суоппардар эппиэтинэстээх буолалларыгар госавтоинспекция инспектордара санаталлар.