Быйылгы быыбарга 9 улууска баһылыктары таллыллар
Нам улууһун киинигэр, биир саамай бөдөҥ 353 нүөмэрдээх быыбардыыр учаастагар, сарсыардаттан киһи толору. Оттон тустаах оройуоҥҥа быйылгы быыбар ураты - манна Нам улууһун аҕа баһылыгын талаллар. Төһө да таһырдьа күн-дьыл тымныы турдар, хахсаат тыаллаах да буоллар, эдэрдиин-эмэнниин гражданскай иэстэрин төлүү кэлэр дьон үгүстэр.
"Халлаан тыаллаах да буоллар, син биир кэлэбит, иэспситин төлүүбүт. Хайаан да быыбарга кыттыахха сөп. Элбэх сиэннэрдээхпин, быыбардыыллар бары", - диир Нам улууһун олохтооҕо Анастасия Слепцова.
"Быыбардыы кэллим бүгүн, бэйэм куоласпын биэрдим. Кыайыылаах дьон кыайдыннар", - диэн этэр Нам улууһун олохтооҕо Василий Осипов.
"Үөрэ-көтө быыбарга кытынным. Бэйэм кандидаттарбар куоласпын биэрдим", - Нам улууһун олохтооҕо Иван Иванов.
Нам улууһа бу да быыбарга көҕүн көрдөрөдө. Бастакы күн дьон күргүөмүнэн кэлэн куоластаатылар диэн быыбардыыр хамыһыйа иһитиннэрэр. Нэһилиэктэртэн куоластааһын бастакы күнүгэр Арбын, Искра олохтоохторо үчүгэй көрдөрүүлээхтэрин бэлиэтиэххэ наада.
"Билигин бары биир сомоҕо буоланнар, биир санаанан сиэттэрэннэр, улууспутугар сайдыы уонна Өрөспүүбүлүкэбитигэр киэн далааһыннаах хамсааһыннар буолалларыгар бэйэлэрин баҕа санааларын биллэрэллэр. Улууспут үрдүнэн уопсайа 3 таһымнаах быыбардар буола тураллар. Ол курдук, региональнай быыбар, улуус баһылыгын талааһына уонна улуус сэбиэтигэр депуттатары талыы буола турар. Ону таһынан Түбэ, Хатырык, Фрунзе нэһилиэктэригэр баһылыктарын талаллар. Уонна Никольскайга нэһилиэк сэбиэтин депуттарын", - диэн Нам улууһун территориальнай быыбардыыр хамыыһыйатын бэрэссэдээтэлэ Николай Парников иһитиннэрдэ.
Уопсайа Нам улууһугар 15772 куоластааччы баар, улууска 27 быыбардыыр кииҥҥэ 163 киһи үлэлээтэ.
Нам улууһун биир тарбахха баттанар нэһилиэгэр чулуу уолбут, судаарыстыбыннай деятель Максим Аммосов дойдутугар, быйылгы быыбарга нэһилиэк аҕа баһылыгын таллылар. Онон дьон эмиэ көхтөөхтүк кэлэн гражданскай позициятын этиннэ. Библиотекарь идэлээх, Хатырык нэһилиэгин олохтооҕо Татьяна Местникова биир бастакынан кэлэн куолаһын биэрдэ:
"Бүгүн биһиэхэ бүтүн дойду үрдүнэн, хас биирдии киһи гражданскай эппиэтинэһин толорор тутаах күнэ буолар. Ону биһиги туора турбакка, бэйэбит гражданскай позициябытын этэ, быыбардыы кэлэн турабыт. Уонна бу быыбарга биһиэхэ нэһилиэккэ эмиэ сүрүн суолталаах, олохтоох нэһилиэнньэ бэйэтин инникитин, баһылыгын талынар күнэ. Биир да быыбары көтүппэккэ, өрүүтүн көхтөөх кыттыыны ылабыт".
Уопсайынан, Нам улууһугар быыбар хаамыыта туох да кэһиитэ суох ааста, хас биирдии учаастакка ирдэбил быһыытынан кэтээн көрөөччүлэр олордулар. Хамыһыйа чилиэттэрэ үлэлэрин үрдүк таһымнаахтык толордулар.
Бу курдук өрө күүрүүлээхтик Өрөспүүбүлүкэҕэ биир бэлиэ политическай күннэр аастылар. Нам улууһун олохтоохторо биир кэлим куоластыыр күннэргэ кэлэн санааларын этиннилэр, куоластарын биэрдилэр.