Кыһыҥҥы спорт көрүҥнэрин сезона саҕаланна

Шортрекистар сарсыардааҥҥы дьарыктара. Бу спорт көрүҥэ дьоҕуру, түргэн, сымса буолууну эрэйэр. Артур Филиппов шорт-трегынан умсугутуулаахтык дьарыктаммыта бэһис сыла буолла. Кини Уһук Илин  уокуругун күрэхтэһиилэригэр сүүмэрдэммит хамаанда састаабыгар кыттан бириистээх миэстэни ылар. Дьаныардаах дьарыктаныы эрэ түмүгэр ситиһии кэлэр диэн этэр.

"Саамай сүрүнэ шорт-трекка болҕомтолоох буолуу уонна күүстээх дьарык. Шорт-трекка 8 сааспыттан сылдьабын, сөбүлүүбүн. Владивостокка сборга элбэхтэ сылдьыбытым", - диир Классическай гимназия 6-с кылааһын үөрэнээччитэ, шорт-трекист Артур Филиппов.

Шорт-трек кыһыҥҥы олимпийскай спорт көрүҥэ буолар.  Бу көрүҥ Республикаҕа кэнники сылларга күүскэ сайдан эрэр. Спорт маастарыгар нуорманы толорор кыахтаах спортсменнар тахсан эрэллэр. Манна эдэр спортсменнар утумнаах дьарыктара, эрчийээччи сатабыла, маастарыстыбата  улахан  суолталаах.

"Сезоммут саҕаланна. Бастакы этаппыт Владивостокка алтынньы ый бүтүүтэ саҕаланар. Уһук илиҥҥэ оҕолорго 9-11 саастарыттан саҕаланар. Уонна 11-13 диэри, онтон улахаттар диэн 13 саҕалаан 16 саастарыгар диэри. Уһук илин чемпионнара бааллар, икки кыыс супер финалга Россияҕа сүүмэрдээһини ааһаннар Россияҕа кыттыбыттара", - диэн СӨ шорт-трекка аҕа тренерэ Станислав Никитин кэпсээтэ.

Үөрэх дьыла саҕаланыытыгар хас сыл аайы спорт кыһыҥҥы көрүҥнэригэр, ол иһигэр шорт-трекка, хоккейга  оҕолору сүүмэрдииллэр. Мууска сүүрүөн  баҕалаах оҕо элбээн иһэр. Манна 8 саастарыттан саҕалаан дьарыктыыллар. Дьокуускай куорат олохтооҕо Нина Яковлева шорт-трекка быйыл уолун суруйтарда. Дьарыктаммыппыт аҕыйах хонно, ол эрэн элбэҕи саҥаны биллибит, доҕоттордоннубут диэн этэр:

"Бэйэтэ баҕаран туран көрдөспүтэ, ол иһин суруттарбыппыт. Тренердарбыт тутатына кэлин диэбиттэрэ. Кэргэним эрийбитигэр, бүгүн кэлэҕит дуо диэбиттэр. Биһиги докумуоммутун хомуйаат кэлбиппит. Оҕобут иккис күнүн үчүгэйдик дьарыктана сылдьар".

Эһиил Саха сиригэр Аан дойдутааҕы VIII Азия оҕолорун оонньуулара ыытыллыахтара. Киин куорат 16 спортивнай эбийиэктэригэр өрөмүөн, саҥардыы үлэтэ бара турар. Онон билигин шортрекистар "Эллэй Боотуртан" "Сулус" физкультурнай чэбдигирдэр кииҥҥэ кэлэн, сарсыарда аайы туспа бириэмэнэн дьарыктаналлар.  Табыгастаах буоллун диэн, кэлэр нэдиэлэттэн "Эллэй Боотуртан" автобус оҕолору таһыахтах. Оттон "Сулус" киин  спортсменнарга утары баран, эбии бириэмэ биэрэргэ улэлэһэр.

"Былаан быһыытынан, балаҕан ыйын 1 күнүттэн катога арыллыбыта, үлэтин саҕалаабыта. Көрөргүт курдук биһиэхэ хоккей, шорт-трек, фигурнай хаҥкылааһын дьарыктара саҕаланнылар. Түгэни туһанан нэһилиэнньэни ыҥырыам этэ, кэлэҥҥит дьарыктанын, эккитин-хааҥҥытын чэбдигирдин, спорду өрө тутун диэн. Дьиэ кэргэҥҥитин кытта сынньана таарыйа спордунан дьарыктаныаххытын сөп. Билигин "Эллэй Боотур" Азия оҕолорунан сибээстээн өрөмүөҥҥэ турар. Онон манна кэлэн күннэтэ дьарыктаналлар", - диэн "Сулус" физкультурнай чэбдигирдэр киин дириэктэрэ Пётр Черкашин иһитиннэрдэ.

"Эллэй Боотур", "Туймаада" стадион, "Самородок" киин эһиилги Азия оҕолорун көрсөргө бэлэмнэнэллэр. Билигин муус дыбарыаһын кирилиэһин, тэлгэһэтин өрөмүөннүүр үлэ ыытыллар. Дьиэ ис бараанын тупсарарга эмиэ сыл түмүгэр диэри үлэ ыытыллыаҕа. Оттон киин куоракка уопсайа 16 спортивнай эбийиэккэ тупсарыы, өрөмүөн үлэтэ ыытыллар. Оттон эдэр спорсменнар дьарыктара тохтооботун туһугар, усулуобуйаны олохтууллар.