Дойдуга биллэр харах быраастара уопут атастаһа кэллилэр
Чурапчы улууһун олохтооҕо Антонина Полятинская диагноһа глаукома. Дойдутугар харах бырааһыгар көрдөрө тиийбитигэр, тутатына куоракка эпирээссийэҕэ ыыппыттар. Бу күннэргэ хаҥас хараҕын эпирээссийэлэтэр. Ол иннинэ быраастар икки хараҕын лазердаабыттар. Эпирээссийэ ситиһилээхтик ааһыа диэн эрэнэр. Бу сыллар устата медициинэ эйгэтэ сайдан, билигин саха сирин олохтоохторо ханна да ыраах барбакка, бэйэлэрин дойдуларыгар эпирээссийэ оҥотторор кыахтаахтар.
"Бастакытын лазерга барбыта, тоҕо диэтэр хараҕым глаукома, дабылыанньата улаханнык тахсыбыт. Биһиги хантан билиэхпитий. Бастакы лазер кэнниттэн, хараҕым номнуо сырдыы түспүтэ. Биир күн ааспытын кэнниттэн иккистээн киллэрэн оҥорбуттара. Билигин көрөрүм бэйэтин нуорматыгар түстэ. Балыаһа олус үчүгэй, ып-ыраас, үлэһиттэр, быраастар сыһыаннара эмиэ олус үчүгэй. Киһи киирэн туохха да кыһаммакка сытар, күҥҥэ түөртэ аһаталлар, астара барыта мип-минньигэс, киһи тотор", - диэн Чурапчы улууһун олохтооҕо Антонина Полятинская кэпсээтэ.
Республикатааҕы харах балыыһатыгар сылга 7 тыһыынча киһи эмтэнэр, ыарыһахтарга уустук эпирээссийэни кытта оҥороллор. Күннэтэ биир бырааска 100 кэриҥэ киһи көрдөрүнэр. Харах балыыһатын эмчиттэрэ өрүү араас таһымнаах үөрэтиини ааһаллар, таһымнарын үрдэтэллэр. Маны тэҥэ, атын куораттартан быраастары уопут атастаһар сыаллах ыҥыраллар. Билигин Саха сиригэр Москва куораттан харах бырастара кэлэ сылдьаллар.
"Биһиэхэ аатырбыт Святослав Николаевич Федоров аатынан МНТК “Харах микрохирургиятын” генеральнай дириэктэрэ Дмитрий Геннадиевич Арсютов кэллэ. Бэйэтэ ыарыһахтарга консультация оҥоруоҕа. Дмитрий Геннадиевич биһиги офтальмологтарбытыгар балаҕан ыйын 6 күнүгэр маастар кылаас ыытыахтаах. Тыыннаах хирургия онлайн ньыманан билиҥҥи кэм эрэһииминэн көстүөҕэ. Уопут атыстаһарга олус наадалаах тэрээһин", - диир Республикатааҕы харах балыыһатын кылаабынай бырааһын солбуйааччы Ираида Гаврильева.
Ыалдьыттар түөрт күн устата төгүрүк остуолга кыттыахтара, итиэннэ олохтоохторго харах эпирээссийэтин оҥоруохтара. Маны таһынан семинар чэрчитинэн, харах быраастара бүгүн ккин куоракка оҕо дыбарыаһын тиэргэнигэр олохтоохтору көрүөхтэрэ. Оттон балаҕан ыйын 6 күнүгэр Республикатааҕы улахан конференция ыытыллыаҕа, манна барыта 100 тахса харах бырааһа кыттара былааннанар.
Кэнники сылларга харах балыыһата аныгы кэм ирдэбилинэн туттар ньымаларын тупсаран, саҥа технологиялары баһылыыллар, онон харах ыарыытын эмтээһинэ Республикаҕа тупсан, үрдүкү таһымҥа тахсыбыт диэн ыалдьыттар бэлиэтииллэр.
Харах балыыһата билигин кэҥээн, ситимнээх үлэни ыытар. Харах ыарыытын эмтииргэ саҥа оборудаабанньа баар буолбута улахан кыаҕы биэрэр. Итиэннэ көһө сылдьар анал массыына нэһилиэнньэҕэ медицинскэй көмөнү, тутатына харах эпэрээссийэтин тиийэ оҥорор. Быйыл анал массыына 20 улууһунан сылдьан 5 тыһыынча киһи хараҕын эмтээтэ.