Дьокуускайга суол бөдөҥ өрөмүөнэ салҕанар
Хатаска киириигэ ГАИ поһуттан Владимировка диэки хайысхаҕа суол кэҥээн саҥардыллыбыта үгүс айаннааччыны үөрдэр. Бу Умнас республикатааҕы суол баараҕай өрөмүөнэ бара турар. Суол 11 килэмиэтириттэн сүүрбэсиһигэр диэри уопсайа 8 килэмиэтирдээх суол учаастага саҥардыллан, кэҥээн, түөрт балаһалаах буолара күүтүллэр. Өрөмүөн үлэтэ ааспыт сыл атырдьах ыйыттан ыла барар. Никита Петров Амма суола тэрилтэҕэ маастарынан үлэлиир. Бу суол оҥоруутугар үлэлэспитэ ыйтан орто. Манна билигин улахан техникэ суол кытыытын оҥорууга үлэлиир:
"Бу манна эскаватор откос уонна суол кытыытын оҥоро сылдьар. Постка диэри тиийэн баран, суол анараа өттүнэн төттөрү барыаҕа. Разбивкалыахпыт, онтон сырдатар остуолбалары туруоруохтара. Салҕыы сир арҕаһын бэлэмнээтэхпитинэ, аспаал ууруохпут".
Манна айаны-сырыыны харгыстаабат инниттэн, өрөмүөн үлэтэ суолу бүтүүннүү саппакка ыытыллар. Бу суолунан Покровскайтан, Мохсоҕоллоохтон тутуу матырыйаала тиэллэр буолан, аспаалы хас да этаабынан халыҥатан уураллар. Былаан быһыытынан, аспаал халыҥа 18 см буолуохтаах. Ортотунан балаһалары араарар ограждениелаах, суол икки өттүттэн туһаанаах сырдатыылаах буолуоҕа, онон уот баҕаналарын туруоруохтара. Сатыы сылдьааччыларга эмиэ усулуобуйа оҥоһуллуоҕа, ол курдук тротуардар, светофордар, автобус тохтобуллара киириэхтэрэ.
Саха сиригэр 2019 сылтан "Куттала суох хаачыстыбалаах массыына суоллара" национальнай бырайыак салгыы түһүмэҕэ олоххо киирэр. Ол чэрчитинэн, Дьокуускай суолларын тэҥэ, регионнааҕы Умнас, Нам, Амма, Харбалаах, Бүлүү, Тиксии суоллара чөлүгэр түһэриллэн саҥардыллаллар. Маныаха суол хаачыстыбалаахтык оҥоһулларын кэтээн көрүүгэ улахан болҕомто ууруллар. Холобура Нам суолун өрөмүөнүгэр кэтээн көрүү тиһигин быспакка тэриллэр.
"Бу эбийиэккэ “строительный контроль” диэн оонньоппуппут. Ол күн ахсын манна баар. Кини бэдэрээччит үлэтин олоччу хонтуруоллуур. Эҥкил баар буоллаҕына, көрөн бэлиэтээһин суруйан, тутатына уларыталлар", - диэн СӨ массыына суолларын салалтатын хапытаалынай тутуу салаатын сүрүн инженерэ Надежда Яковлева иһитиннэрдэ.
Умнас суолу тэҥэ, Намныыр суол өрөмүөнэ салҕанар. Былаан быһыытынан, Нам суолун салгыы кэлэр сылларга, Үс Хатыҥтан Сыырдаахха диэри учаастагын өрөмүөннүөхтэрэ. Ону тэҥэ, Кангаласс бөһүөлэгэр киирии суолун эмиэ оҥорор сорук турар. Бу курдук 2030 сылга диэри өрөспүүбүлүкэ суолларын сыллата төһө кыалларынан саҥардан иһиэхтэрэ.