Ил Дархан Сайсаар уокуругар тутулла турар эбийиэктэри көрдө

Ил Дархан Айсен Николаев киин куоракка Сайсаар уокуругар тутулла турар эбийиэктэри көрдө. Ол курдук, бастаан Ильменскай уулуссатыгар элбэх хайысхалаах спортивнай сааланы тутуу хайдах барарын билистэ. Саҥа тутулла турар спортивнай саалаҕа үүнэн эрэр спортсменнары спортивнай уонна художественнай гимнастикаҕа дьарыктыахтара. Эбийиэк күн бүгүн, 30% бэлэм. Бэдэрээччит эһиил ыам ыйыгар эбийиэги туттарар былааннаах. Бу саҥа тутуу эһиил Азия оҕолорун көрсүөҕэ.

"Вилюйскай уулуссаҕа элбэх хайысхалаах спортивнай комплекс тутуутун саҕалаатыбыт. Кини сыала-соруга спортивнай уонна художественнай гимнастиканы сайыннарар диэн тутуллан эрэр. Эһиил буолаары турар Азия   оҕолоругар бу эбийиэк эмиэ үлэлиэхтээх. Кэлэр сыл ыам ыйыгар үлэҕэ киллэриэхтээхпит", - диир тутуу бэдэрээччитэ Александр Ханин.

Үлэ бөлөҕө салгыы Винокурова уонна Лонгинова уулуссаларын быһа охсуһуутун өрөмүөнүн көрдө. Суол өрөмүөнүн үлэтэ барыта бүтэн, уота-күөһэ киирэн, балаҕан ыйын бүтүүтэ бэлэм буолуоҕа  диэн үлэһиттэр этэллэр. Бүгүҥҥү күҥҥэ, суол өрөмүөнэ 40% бэлэм.

"Бүгүҥҥү туругунан, Чайковского уулуссаттан 300 митэтирэ кэриҥэ аспаал бастакы дьапталҕата уурулунна. Маны кытта ууну ыытар лоток оҥоһулла сылдьар. Уонна бордюрдары монтажтааһын. Аспааллааһын балаҕан ыйа түмүктэниэр диэри барыта бүтүөхтээх", - диэн "Главстрой" тэрилтэ сүрүн үлэһитэ Артём Кычкин кэпсээтэ.

Биир бэлиэ бырайыагынан, Сайсары күөл тулатын тупсарыы буолар. Билигин манна хас да бөлөҕүнэн үлэ барар.  Инникитин кытыл дьон сынньанарыгар табыгастаах, эргиччи сынньанар түөлбэҕэ кубулуйуоҕа. Итиэннэ суолу саҥардыахтара, сырдатыы, көҕөрдүү үлэтин ыытыахтара.

"Быйыл үлэҕэ 4 учаастакка араарбыдыт күөлбүтүн. Бу күһүҥҥэ диэри ипподром утары биир гыммыт түөрдүн оҥоробут. Эһиил муостаттан саҕалаан, Триумф бүтэһигэр диэри учаастагын Азия оҕолоро оонньууларын иннинэ оҥоруохпут. Биһиги былырыыҥҥыттан саҕалаан күөл тула баар этээстээх  дьиэлэр территорияларын өрөмүөннүү сылдьабыт. Ол курдук, Сергеляхское 1 уонна утары турар 4 дьиэни өрөмүөннээбиппит, быйыл Ойунского 41, 41/1 дьиэлэри өрөмүөннүү сылдьабыт. Биир, икки сылынан Сайсары күөлбүт тула тупсарыы таһыма үөһээ тахсыаҕа диэн эрэннэрэбит", диэн Дьокуускай куорат баһылыга Евгений Григорьев  иһитиннэрдэ.

Маны таһынан, Сайсары күөлү тупсарыы бырагыраамматынан, күөл тула дьон хаамар, бэлисипэттиир ыллыктар оҥоһуллуохтара. Саҥа эбийиэктэр, спортивнай былаһааккалар, оҕо оонньуур сирэ тутуллуоҕа. Ийэ скверыгар саҥардыы, өрөмүөн үлэтин ыытыахтара.

"Сайсары күөлбүт маастар-былааҥҥа киирбитэ. 2030 сылга диэри куоракка куруутун тупсарыы тэриллэр. Бу бырайыак 3 сыл иһигэр оҥоһуллуохтаах. Дьиҥэ, олус улахан бырайыак. Дьон хаамар суола барыта уларыйар, билэсипиэт суола баар буолар. Уонна Ийэ болуоссатын саҥардан оҥоруохпут", - диир  Сайсары уокуругун баһылыга Владимир Слепцов.

Онон сотору кэминэн, ытык Эбэ кытыла саҥалыы оҥоһуллан, олохтоохтор уонна ыалдьыттар сөбүлээн сылдьар уонна сынньанар сирдэрэ буолуоҕа.