Дьокуускайга оскуола дьаарбаҥкатыгар ыытыллар аһымал аахсыйалар

Балаҕан ыйын бастакы күнэ бу тигинээн кэллэ. Сыллата Хомсомуол болуоссатыгар оскуола табаардарын атыылыыр дьаарбаҥка атырдьах ыйыттан саҕалаан үлэлиир. Манна оскуолаҕа наадалаах таҥаһы-сабы, тэрили биир сиртэн атыылаһар кыах баара үгүс дьоҥҥо табыгастаах. Саҥа үөрэх дьылын көрсө, үгэс быһыытынан, бу дьаарбаҥкаҕа урбаанньыттар кыра дохуоттаах, кыаммат, кырыымчык үптээх дьиэ кэргэн оҕолоругар көмөлөһөллөр.

"Билигин оҕо дьиэлэрэ уонна элбэх кыаммат ыаллар бааллар. Олор сыл ахсын “Азбукаҕа” элбэх сурук суруйаллар. Ол курдук, биһиги дьүөгэбинээн Мария Константиновналыын ахсыс сылын “Домик добра” диэн аахсыйаны саҕалаан, дьаарбанка урбаанньыттара уонна атыылаһаачылара буолан хомуйан, тэрилтэҕэ туттаран, көмөбүтүн биэрэбит", - диир "Азбука" хампаанньа салайааччыта Нина Семёнова.

Сыл ахсын тэрээһиҥҥэ "Домик добра" уонна "Оҕоҕун оскуолаҕа бэлэмнээ" диэн аһымал аахсыйалар ыытыллаллар. Манна тэрийээччилэр атах таҥаһыттан саҕалаан көстүүмүгэр, уруучука, тэтэрээт курдук үөрэх тээбиринигэр тиийэ биэрэллэр. Биирдиилээн дьон эмиэ баҕа өттүнэн кыттан, бэйэтин кылаатын киллэриэн сөп. Бу күннэргэ аахсыйаҕа хомуллубут көмөнү, үбү элбэх оҕолоох ыалларынан түҥэтиэхтэрэ. Наадыйар дьиэ кэргэн испииһэктэрин социальнай харалта тэрилтэ нөҥүө ылаллар.

"Бу сыллар тухары биһиги элбэх оҕолҕо көмөлөстүбүт. Чопчу кыаммат оҕолорго, соҕотох хаалбыт аҕаларга көмө оҥоробут. Былырыын Добрые дела хамсааһын 150 тыһ. хомуйаннар, соҕотох аҕаларга атах таҥаһын, истээх таҥаһы ыларга көмөлөспүттэрэ. Сахабыт сирин уонна Дьокуускай дьоно олус үтүө санаалаахтар, элбэх оскуола табаара ууруллар", - диэн "Бриллиантовые нотки" фестиваль кэмитиэтин төрүттээччи Мария Андреева кэпсиир.

Уонунан балаакка кэчигирээн маҕаһыын элбэх, эгэлгэ табаар. Сорох сыанатынан, сорох хаачыстыбатын көрөн атыылаһар. Евдокия Пудова 1994 сыллаахтан оскуола табаарынан эргинэр атыыһыт, сүрүннээн улаатан эрэр оҕолор танастарынан дьарыктанар:

"Соҕурууттан атыылаһарга ыараабыт, биһиги син биир чэпчэки сыананы тута сатыыбыт. Чэпчэтии оҥоробут, элбэх оҕолоохторго, ким көрдөһөргө барытыгар”.

Табаар үксэ Россия уонна Кыргызстан оҥорон таһаарааччыларын киэнэ. Төрөппүттэр оҕолорун үөрэххэ бэлэмниир түбүгэр сылдьаллар. Үксүлэрэ эрдэ барытын ылынан бэлэмнэр. Оттон сорох дьон чуолаан улуус олохтоохторо анаан-минээн кэлэллэр. Александр Пермяков Чурапчы улууһуттан кэлэ сылдьар,түөрт оҕолоох аҕа. Быйыл орто уола бастакы кылааска киирэр.

"Спортивнай көстүүм көрө сылдьабыт, рюкзакыпытын барытын ыллыбыт. Кыра хаалла. Суумма өттүн көрбөтүм даҕаны, туох наадалаах диэбиппитин, оҕоҕо үчүгэй буоллун диэн ыллыбыт", - диэн Чурапчы улууһун олохтооҕо  Александр Пермяков санаатын үллэһиннэ.

Дьаарбаҥка балаҕан ыйын түөрт күнүгэр диэри үлэлиирэ күүтүллэр. Атыы-эргиэн түмүктэнэрэ аҕыйах хонук хаалан, билигин сыана кэм түһэн турар. Атыыһыттар оскуола форматыгар, спортивнай көстүүмнэргэ, атах таҥаһыгар чэпчэтии оҥороллор