СПИД, ВИЧ уонна Гепатит ыарыыларыгар сыл ахсын ыытыллар босхо акция
Саха сиригэр ВИЧ, СПИД ыарыылар сытыытык тураллар. Уһук-Илиҥҥи уокурукка ыалдьааччы ахсаанынан 4 миэстэҕэ сылдьар. Бу соччото суох көрдөрүү буолар. Маннык сыстыганнаах ыарыыны эрдэттэн булар, нэһилиэнньэҕэ сэрэтэр үлэни ыытар соруктаах, көһө сылдьар пууннар бу сайын устата 10 тахса акцияны тэрийдилэр. Бүтэһик сылаас күннэри баттаһа, акция аны Комсомол болуоссатыгар ыытыллар.
"Биһиги Комсомольскай болуоссакка акция оҥоро кэллибит. СПИД, ВИЧ, Гепатит, сифилис уонна туберкулез ыарыытын булууга. Маннык акцияларга дьон көхтөөхтүк кыттар. Кэлэн анаалыстарын туттараннар түмүктэрин билэллэр, туох да уочарата суох түргэнник туттараллар", - диир СПИД ыарыыны сэрэтэр өрөспүүбүлүкэтээҕи киин балыыһа клиническэй эпидемиология салаатын сэбиэдиссэйэ Дмитрий Донской.
Саха сиригэр 34 улуус уонна 2 куорат уокуруга баарыттан, 33 бу ыарыы тарҕаммыт. Уопсайа учуотка 1000 тахса киһи турар. Сыллата ыытыллар ууһатар уорганнар уонна хаан нөҥүө бэриллэр ыарыылары сэрэтии, булуу акциятыгар, аны сэллик ыарыытын эмиэ билиэххэ сөп буолла. Өскөтүн туберкулез ыарыытын ФЛГ аппаратынан көрүөххэ сөп эбит буоллаҕына, манна хаан аналиһынан тутатына билиэххэ сөп. Аан дойду үрдүнэн саамай киэҥник тарҕаммыт СПИД, ВИЧ ыарыыны эрдэтинэ булан, эмтээһин үлэтин сөпкө бириэмэтигэр ыытар тоҕоостооҕун, нэһилиэнньэҕэ тириэрдии билиҥҥи туругунан, үрүҥ халааттаах аанньааллар сүрүн соруктара буолар.
Анаалыһы ылыы ыарыыта суох ааһар. Быраас түргэн-тарҕан хамсаныынан тутатына 5 ыарыыны экспресс-тест нөҥүө быһаарар. Хаан ылыллыбытын кэнниттэн, 15 мүнүүтэнэн анаалыс түмүгэ биллэр. Барыта атын дьонтон кистэнэр, онон олохтоохтор акцияҕа көхтөөхтүк кытталлар.
"Бүгүн пааркаҕа баран иһэн алхас көрдүм. Анаалыһы босхо туттарыахха сөп эбит диэн. Мин санаабар, куорат олохтоохторугар бу акция олус үчүгэй. Билиҥҥи кэмҥэ, ыксалга холобур, киһи бэйэтэ кэлэн ханнык баҕар балыаһаҕа, клиникаҕа, поликлиникаҕа туттарар бириэмэтэ суох буолуон сөп. Ол иһин маннык түргэнник көрдөрөн ааһар үчүгэй", - диэн Дьокуускай куорат олохтооҕо Сайаана Чикачёва үллэһиннэ.
Бу маннык акция нөҥүө ыарыыны эрдэ булан, эмтээһин үлэтин сөпкө бириэмэтигэр саҕалаан, киһи доруобуйатыгар улахан хорумньу тахсыбатын туһугар туһуланар. Анаалыһы тутар көһө сылдьар пуун атырдьах ыйын 30 күнүгэр диэри сарсыарда 10 чаастан күнүс 3 чааска диэри үлэлиэҕэ, онон ким баҕалаах бэйэтин доруобуйатын тургутуон сөп.