Өрөспүүбүлүкэтээҕи төрүт аһы, таҥаһын-сабы, киэргэли сөргүтэр бэстибээл

Таба, убаһа, ынах этэ, тоҥ балык - бу барыта түҥ былыргыттан сахалар күн бүгүҥҥэ диэри илдьэ кэлбит маанылыыр астара буолар. Билиҥҥи үйэ тэтимигэр саха аһа кэлии астарга баһыйтаран, сороҕор умнулла да быһыытыйар. Ол иһин маннык бэстэбээл ыытыллара, куорат олохтоохторугар төрүт астарын умнубаттарыгар улахан туһалаах диэн кэлбит ыалдьыттар бэлиэтииллэр.

"Бу бэстибээлгэ биһиги саҥа кэллибит уонна саха аһын дэлэтэргэ, баар арааһын көрөргө олус туһалаах бэстибээл эбит. Таба буһара туралларын көрдүбүт, ону амсайыахпыт. Сыл ахсын буолара буоллар, үчүгэй буолуо этэ. Араас күрэхтэһии бөҕөтө", - диэн бэстибээл ыалдьыттара Альбина, Андрей Софроновтар кэпсээтилэр.

Уһук илиҥ уонна сибиир кухняларын сайыннара  сылдьар саха сирин шеф-повара Николай Атласов, эргиччи буспут саха дьиҥнээх деликатес аһын табаны, кэлбит дьоҥҥо амсатта. Бу иннинэ сибинньэни, сылгыны уонна улахан нельма балыгы бэйэтинэн буһаран турар. Саха кухнята барыта маннааҕы бэйэ аһыттан, кыһыннары үлэлиир бэйэ теплицатын отуттан, оҕуруотун аһыттан  астаныахтаах диэн шеф-повар бэлиэтиир:

"Саха кухнятын туһунан бастаан кэлии дьоҥҥо кэпсиэххэ наада. Холобура, ас нөҥүө киһи култууратын, төһө минньигэһин көрдөрөргө үлэлии-хамсыы сылдьабыт. Ол курдук, маннык элбэх бэстибээллэр буолуохтаахтар. Мин санаабар, бэстибээл нөҥүө киһи элбэҕи билэр. Айбыт киһини кытта кэпсэтэн, хайдах, тоҕо, туох сыаллаах оҥордун диэн. Уонна онтон олоҕуран сайдыы барыа".

Саха деликатеһынан аатырбыт кыһыллыбыт балык "Кыһын Саха сириттэн саҕаланар" бэстэбээлтэн дьон үрдүк биһирэбилин ылан тарҕаммыта. Оттон кэлин "Вкусы Якутии" бэстибээллэргэ кыттан, билигин саха эрэ дьоно буолбакка, кэлбит ыалдьыттарга үрдүктүк кэрэхсэнэр саха бастыҥ аһынан биллэр. Ол иһин инникитин төрүт аһы киэҥ эйгэҕэ таһаарыы - бастатан туран, бэстэбээллэртэн силиһин-мутугун ылар.

"Бары сүрүн куорат ресторатардарын таһаараммыт, Саха сирин аһыттан киһи биир илиигэ тута сылдьар саха аһын оҥоруохха сөп эбит дуу, суох дуу диэн гастро бэстибээл тэрийдибит. Бэстибээлбит аҥардас ас эрэ өттөүгэр эбитэ буоллар, табыллыа суоҕа этэ. Ол иһин биһиэхэ оҕуруот астарын атыылыыллар, Саха сиригэр оҥоһуллубут кэһии гынар оҥоһуктар бааллар. Уонна биһиэхэ Дугуйдаан Винокуров ыалдьыттаата, саха дьоно дьөһөгөйгө хайдах сыһыаннаах буолуохтаахпытын кэпсээтэ. Кинини кытта куорат олохтоохторо бииргэ атынан хатаһылаатылар", - диэн  СӨ туризмы сайыннарар агентство салайааччыта Дмитрий Громов сырдатта.

Тэрээһин чэрчитинэн акробатическай нүөмэрдэр, хатарба сиэһинэ, сибиинньэ сүүрдүүтэ күрэхтэрэ ыытылыннылар. Ол курдук, кыра 6 сибинньэ оҕолоро сүүрүүгэ күрэхтэстилэр. Бэриллибит бириэмэ иһигэр 5 куруугу сүүрэн, хаһыылаах-ыһыылаах интэриэһинэй киирсиини көрдөрдүлэр.

"Биһиги миссиябыт, саха култууратын сайыннарыы уонна саха маастардарын үлэлэрин өрө таһаарыы. Бэстибээл саха уустарын, астарын киэн эйгэҕэ биллэрэргэ туһалаах", - диэн этэр бэстибээл кыттыылааҕа Евгения Борисова.

Киһи тутан эрэ аһыы сылдьарыгар, Хатарба лэппиэскэттэн турар сахалыы бургеры бу бэстэбээлгэ боруобалаатылар. Иһигэр чир балыгы, таба уонна убаһа этин куттаран сиэххэ сөп. Кээмэйинэн киһи сирэйин саҕа буолан, биир толору аһылыгы солбуйар.

Манна кэлбит ыалдьыттар илии тутуурдаах, өттүк харалаах дьиэлэригэр бардылар. Саха төрүт аһа-үөлэ дьоҥҥо-сэргэҕэ киэҥник тарҕанан, сайдар инники кэскиллээҕин кэрэһэлээтэ.