Доруобуйаларыгар хааччахтаах оҕолорго туһаанаах усулуобуйаны тэрийии

Мөлтөхтүк көрөр уонна истэр оҕолору оскуолаҕа киирэргэ бэлэмнээһин боппуруостарын төгүрүк остуолга дьүүллэстилэр. Тэрээһин атырдьах ыйынааҕы үөрэҕирии үлэһиттэрин республикатааҕы мунньаҕын чэрчитинэн ыытыллынна. Манна көрөллөрүгэр уонна истэллэригэр хааччахтаах оҕолору үөрэтэр оскуола-интернат исписэлиистэрэ, педагогтара, ону тэҥэ, оскуола иннинээҕи үөрэх тэрилтэлэрин бэрэстэбиитэллэрэ кытыннылар.

"Биһиэхэ бу куорат иһигэр эмиэ инник анал үөрэхтээх, специалистардаах уһуйааннар бааллар, истэрэ мөлтөх оҕолорго “Оленёнок» диэн баар, харахатарынан мөлтөх оҕолору иитэр “Подснежник” диэн оҕо саада баар. Кини специалистара биһигини кытта наар үлэлэһэллэр", - диэн мөлтөхтүк истэр, көрөр оҕолору үөрэтэр коррекционнай оскуола-интернат дириэктэрин үөрэтэр үлэҕэ солбуйааччы Валентина Захарова кэпсээтэ.

Саха сиригэр бу хайысхаҕа, соҕотох үөрэх кыһата доруобуйаларыгар хааччахтаах оҕолору көрөр-истэр буолан, кинилэр уопсастыба олоҕор эрэллээхтик үктэнэллэригэр киин болҕомтону уурар. Кэпсэтиигэ саҥардыллыбыт үөрэх систиэмэтин усулуобуйатыгар турар ирдэбиллэри ырыттылар, төрөппүттэргэ сүбэ-ама биэрдилэр. Оскуола-интернат педагогтара этиллибитин курдук, туһааннаах оҕо саадтарын кытта ыкса үлэлэһэллэр.

"Олох көрбөт уонна уһуйааҥҥа кыайан киирбэт оҕолору кытта үлэлиибит. Кииммитигэр төрөппүтү уонна оҕотун ыҥыраммыт, чопчу бу оҕо туох кыһалҕалааҕын, хайдах үөрэнэн, сайдан тахсарыгар улахан күүс-көмө буолабыт. Манна куоракка эрэ баар оҕолору кытта буолбатах, тыаҕа баар оҕолору кытта эмиэ сибээстэһэ сатыыбыт. Дистанционнай ньыманан, интернетынан, төлөпүөн да нөҥүө", - диир мөлтөхтүк истэр, көрөр оҕолору үөрэтэр коррекционнай оскуола-интернат библиотекатын сэбиэдиссэйэ  Лидия Платонова.

Бүгүҥҥү күҥҥэ оскуолаҕа икки сүүстэн тахса оҕо үөрэнэр. Онтон сотору кэминэн, маҥнайгы кылааска 25 оҕо киирэрэрэ күүтүллэр. Дьокуускай олохтооҕо Нина Ефремова үс оҕолоох ийэ, кырата истибэтинэн инбэлиит, быйыл бу оскуола-интернакка үөрэнэ киириэхтээх.

"Оҕом истибэтинэн инбэлиит. Сылы быһа “Оленёнок» диэн уһуйааҥҥа сылдьан, специалистары кытта дьарыктаммыппыт. Билигин бу коррекционнай оскуолаҕа киирээри бэлэмнэнэ сылдьабыт. Төгүрүк остуолга информация билээри кэлэн олоробун", - диэн Дьокуускай олохтооҕо Нина Ефремова эттэ.

Оҕону кыратыттан бэйэтин көрүнэ, тулалыыр эйгэни, атын дьону-сэргэни кытта алтыһа үөрэтэллэригэр төрөппүт оруола улахан. Сорох инбэлиит оҕолоох дьиэ кэргэн төттөрүтүн оҕотун тас эйгэттэн харыстаан, аҥардас дьиэҕэ эрэ олордон иитэргэ күһэллэр. Бу оҕо сайдыытын атахтыыр диэн специэлиистэр этэллэр. 

"Оҕо эмиэ сайдар кэмнээх. Ол бириэмэтэ ааһан хааллаҕына, ыараханнык ылынар буолар. Онон ол үөрэнэр, үчүгэйдик, чэпчэкитик ылынар кэмин аһарбакка, дьонноро маҥнай доруобуйатыгар хааччахтааҕын билбит буоллахтарына, тутатына оскуолаҕа аҕала сатыахтарын наада. Оччоҕуна дьэ, оҕо сайдыыта үчүгэйдик барар", - диэн мөлтөхтүк истэр, көрөр оҕолору үөрэтэр коррекционнай оскуола-интернат учуутала Анна Егорова сүбэлээтэ.

Маннык ис хоһоонноох мунньах сыллата тэриллэр. Онтон доруобуйаларыгар хааччахтаах оҕо ахсаана аччаабат, онон кинилэргэ туһаанаах усулуобуйаны тэрийэн үөрэтиигэ үлэ тиһигин быспакка барар.