Баҕа өттүнэн тэриллибит аһымал ыстааптар үлэлэрэ салҕанар

Анал байыаннай дьайыыга араас хайысхалаах көмөнү онорууга, Өрөспүүбүлүкэтээҕи уопсастыбаннай хамсааһын ыстаабыгар үлэ күөстүү оргуйар. Тэрилтэлэртэн, улуустартан, түмсүүлэртэн уонна биирдилээн дьонтон көмө тохтообокко киирэ турар. Ыстаапка күҥҥэ уонтан тахса киһи ким бириэмэлээҕинэн кэлэр.

"Сетканы элбэҕи ыыттыбыт, тас кээмэйэ улахан буолан үксүн массыынан барда. Бу күннэргэ тирэх пууннарга тиийиэхтээх. Чүмэчини Мохсоҕоллоохтор оҥорон аҕалбыттара, мантан күһүн олус наадалаахтар. Окуопнай чүмэчини буржуйка оһох иһигэр уктахтарына, окуопаларын наһаа үчүгэйдик сылытар үһү. Манна кэлбит оҕолор көрөөт ылан бардылар, хаһан айаннаан тиийэрин кэтэһимээри", - диэн "Якутия с тобой" уопсастыбаннай хамсааһын бэрэссэдээтэлин солбуйааччыта  Анна Ефимова кэпсээтэ.

Ыстаапка эдэр ыччат да саастаах дьон бары кэлэн, биир сомоҕо буолан күүс-көмө буолаллар. Аҕам саастаах Галина Николаевна волонтердар ыстаабтара тэриллиэҕиттэн кэлэн көмөлөһөр.  Бары түмсүүлээхтик, биир санаанан салайтаран үлэлиибит диэн этэр.

"Барыта оҕолорум кэриэтэ, олору кытта сылдьарбыттан бэйэм сэргэхсийэбин. Туох эрэ туһаны аҕалабын дии саныыбын. Биһиги манна элбэхпит, үксэ эдэрдэр. Баара суоҕа, сэрии оҕолоро иккиэбит. Маастар  үөрэтиитинэн барытын сатыы үөрэнним, төһө да кырыйдарбын. Билигин плащ палаатка тигэ сылдьабыт, сүрдээх наадалаах. Бэҕэһээ тутатына кэлэн илиибититтэн ылан барбыттара, сөбүлээбиттэрэ", - диир Дьокуускай куорат олохтооҕо Галина Дьяконова.

Уопсастыбыннай кииҥҥэ кэлбит маллары суулаан, сааһылаан,  массыынаҕа тиэйэн, хомуурга ыҥырыллыбыт дьоҥҥо ыыталлар. Маны таһынан, ыстаапка байыаннай дьайыыга барааччылар кэлэн таҥас-сап ылан бараллар.

"Уолаттар гурууппаҕа эппиттэрэ,  көмөлөһөллөр, таҥас биэрэллэр диэн. Бу таҥас биэрдилэр, үчүгэй эбит көмө оҥороллоро. Антах да сырыттахпытына, сахалар бэйэбит бырабыытылыстыбабыт элбэх көмөнү оҥорор. Аһылык да кэлэр, таҥас да кэлэр. Барытын бэйэбитигэр да буолбатаҕын иһин, атын нуучча уолаттарбытын кытта ылсабыт-бэрсэбит. Этэҥҥэ, үчүгэйдик сылдьабыт", - диэн байыаннай дьайыы кыттыылааҕа эттэ.

Үлэһиттэр этэллэринэн хас биирдии киһи дойдулаахпын, мииигин өйүүр дьон баар диэн саныылларын курдук, маннык үлэ тиһигин быспакка ыытыллар.