“Үрдэл" түөлбэ ыытар үлэтэ сыл ахсын инники кирбиигэ
Күн бүгүн, Бэрдьигэстээх биир бөдөҥ Үрдэл түөлбэтигэр киһитин ахсаана 1000 тахса, бу түөлбэҕэ кэлиҥҥи сылларга элбэх оҕолоох, эдэр ыал үксээтэ. Оҕолор аһаҕас халлааҥҥа сүүрэн-көтөн, оонньоон бириэмэлэрин атааралларыгар, үрдэллэр сүрүн болҕомтолорун уураллар. Ол курдук, бу күннэргэ "Детвора на спорт площадку" диэн президент фондатын граныгар кыайбыт бырайыактарынан, араас спортивнай оонньуулары сылы эргиччи ыытарга анаммыт, 478 тыһыынчаттан тахса солкуобай үптээх хонууну оҥорон саҕалаатылар. Уопсайа бу бырайыак 724 тыһ. тахса солкуобайдаах гран харчытын ылбыт. Эрдэ буорунан көрө сыппыт былаһаакка сирин бетоннаан тэҥнээтилэр. Түөлбэ "Өбүгэ оонньуутун тэрийии" бырайыагынан бетонун үлэтигэр, көрүллүбүт Ил Дархан гранын харчыта 180 тыһ. солкуобай туһаныллыбыт.
"Бу спортивнай дэгиттэр хонуу, кыһыннары-сайыннары үлэлиэхтээх диэн сүрүн сыалбыт-сорукпут этэ. Былаһааккабыт оҥоһулуннаҕына, оҕолорбутугар футбол, баскетбол, волейбол күрэхтэрэ буолуохтаахтар. Онтон кыһыҥҥы өттүгэр хоккейга күрэх", - диэн "Үрдэл" ТОС бэрэссэдээтэлэ Светлана Лю-Фа кэпсээтэ.
Оонньуур хонуу тэлгэтиллэр былаһаакката аан бастаан 2018 сыллаахха олохтоох көҕүлээһини өйүүр бырагыраамманан оҥоьһллубута, ол кэмтэн 5 сыл ааһа охсон, оҕо былаһааккатын иһинээҕи маллара эргэрэн, сорох сороҕо оонньуурга да сэрэхтээх буолбута, онон маннык уларытыы кэмигэр тоҕоостоох буолбут. Хонуу тэлгэтиллибит матырыйаала пластиктан оҥоһуллубут модульнай сабыылар, оҥорооччу бу матырыйаалы тоһуттар тымныыга, өҥүрүк куйааска туох да буолбатын мэктиэлиир. Онон үрдэллэр кыһыҥҥы өттүгэр тэлгэммит хонуу үрдүнэн уу кутан, хоккей оонньуурга муус килээҥки оҥоруохтара, модуль пластиктары Владивосток куораттан сакаастаан аҕалтарбыттар.
Түөлбэ оҕолоро, ордук уол аймах, саҥа хонууга футболлаары бу түгэни күүппүттэрэ ыраатта, үөрэх дьыла кэлэрэ улам-улам чугаһаан иһэр, онон уолаттар сынньалаҥ күннэри баттаһа, саҥа сиргэ сүүрэргэ-көтөргө бэлэмнэр. Ол да иһин туора турбакка, улахан дьону кытта тугу кыайалларынан тэбис тэҥҥэ үлэлэстилэр.
Бу курдук ким эрэ, хаһан эрэ оҥорон биэрэрин күүппэккэ, оннооҕор түөлбэ таһымыгар сөпкө дьаһаннахха үпкэ-харчыга тиксэн, дьоҥҥо-сэргэҕэ наадалаах, туһалаах үлэлэр барыахтарын сөбүн, Бэрдьигэстээх түөлбэлэрэ бэйэлэрин холобурдарыгар көрдөрөллөр. Үрдэл түөлбэ ыытар үлэтэ сыл ахсын инники кирбиигэ.