Хаҥалас улууһун Булгунньахтаах нэһилиэгэр туризм эйгэтэ биллэ сайынна

"Берег легенд" турбаза Хаҥалас улууһугар бастакынан тутуллубута. Онтон кэлин, саҥа сынньанар дьиэлэргэ урбаанньыт Мария Борисова саҥа таһымы биэрэн, элбэх салайааччыларга холобур буолбута. Саха сиригэр бастакы глэмпинг парк - ол эбэтэр балаакка дьиэ пааркатын тутан, Өрөспүүбүлүкэ туризымыгар аныгылыы саҥа сүүрээни киллэрбит киһинэн буолар. Бу туһунан олохтоохтор киэн тутталларын 1 Малдьаҕар баһылыга бэлиэтиир.

«Билигин биһиги үөрэрбит-көтөрбүт диэн, Берег легенд билигин сайдар суолга турда. Эбиитин өссө саҥа эбийиэктэри олоххо киллэрээри сылдьар. Холобур, дьиэ кэргэн оҕолоох кэллэҕинэ, оҕо сынньанар, оонньуур сирэ, бассейн баар. Уонна мангальнай суоната, сынньанар сир уо.д.а бырайыактар олоххо киирэ туруохтара», - диэн  1 Малдьаҕар нэһилиэгин баһылыга Айталина Васильева иһитиннэрэр.

Тутуу сылааһы балаҕан ыйын ортотугар диэри тутар кыахтаах. Уотунан толору хааччыллыбыт, итии уонна тымныы уунан суунар сирдээх. Хас дьиэ аайы мангал, иһиккэ-хомуоска, оннооҕор утуйар таҥаска тиийэ хааччыйаллар. Балаакка дьиэ күҥҥэ 4000, мансардалаах афрейм дьиэ 5000, оттон улахан дьиэ 6000 солкуобай. Харабылланар чааһынай миэстэ буолан, ыалдьыттыы кэлбит дьон туох да санаа баттыга суох эттиин-сиинниин, дууһалыын толору сынньаналлар.

«Бэйэм Бүлүүттэн төрүттээхпин, манна бу сайыҥҥы кэмҥэ үлэлии кэллим. Үчүгэй айылҕалаах дойду эбит уонна сынньалаҥ баазата турар сирэ олус табыгастаах эбит. Бэйэм да астынным ахан, айылҕаны кытта алтыспатаҕым ырааппыт», - диэн "Берег Легенд" турбаза администратора Илья Иванов кэпсиир.

Кыһыҥҥы бириэмэҕэ сынньалаҥ дьиэ үлэтин тохтоппокко үлэлиир. Оһох оттор мас барыта эрдэттэн бэлэмнэнэн турар, кэл да отун - тута дьиэҥ сылыйа охсор. Оттон быйыл икки дьиэҕэ автономнай ититии киирэрин туһунан иһитиннэрдилэр. Оччоҕуна кэлбит ыалдьыттар дьыл кэмиттэн тутулуга суох, кэрэ айҕылаах Булгунньахтаах сиригэр хаһан баҕарар сылаас дьиэҕэ кэлэр кыахтаныахтара.

Булгунньахтаах нэһиэлигин эдэр кэскиллээх ыччата Анатолий Габышев бэйэтэ туур-операторынан үлэлии сылдьан, сынньана кэлбит туристарын хонон-өрөөн ааһалларыгар дьиэ тутуохха баар эбит диэн санааттан, былырыыҥҥыттан мас үрдүгэр гостиница дьиэ тутуутун бэйэтин дьиэ кэргэнин кытта саҕалаабыта.

«Быйыл федеральнай бырагырааммаҕа Саха сирэ бастакытын кытынна, “Туризм и гостеприимсто” национальнай бырайыакка. Онно 8 мөлүйүөннээх граны сүүйдүлэр», -  диир СӨ туризмы сайыннарар агентство салайааччыта Дмитрий Громов.

Хас биирдии кэлбит ыалдьыт тутулла сылдьар 4 миэтэрэ үрдүккэ турар дьиэлэри сөҕө көрөр. Анатолий Габышев төрөппүттэрэ бу бааза тутулларыгар улахан күүс-көмө буолбуттарын аҕата Василий Габышев кэпсиир:

«Тутуубут барыта хаптаһын уонна каркаас уонна икки өттүттэн ититээри изоспааннааммыт туттубут. Канадскай технологияҕа ханыылыы. Кыһыны быһа уот тардаммыт үчүгэй. Сылытарбыт истиэнэҕэ ыйанар обогреватель, олунньу ыйтан кыайар».

Киэҥ нэлэмэн Сахабыт сиригэр туризм сайдыыта сылтан сыл саҥа таһымҥа тахсан иһэрин сынньана кэлбит дьон бэлиэтээн ааһар. Туризм сайдыытыгар Өрөспүүбүлүкэҕэ 67 мөлүйүөн сууммалаах бэдэрээлинэй грант ыларга сайаапкалары атырдьах ыйын 14 күнүгэр диэри туризм министиэристибэтин аадырыһыгар  күүтэллэр. Хас биирдии баҕалаах, үлэһит  киһи граҥҥа  кыттан баҕатын олоххо киллэриэн сөп.