Сайдыы суола сомоҕолоһууга сытар

Пуорум 10 тиэмэ тула хайдыһан ыытыллар. "Сир-уот сайдыыта", "Кыайыы иһин сомоҕолоһуу", "Общественай хонтуруол", "Экология", "Аһымал көмө", "Общественнай палаата үнүбэрсиэтэ", "Дьиэ кэргэн сыаннаһа", "Холбоһуктары кытта хардарыта үлэлэһии", "Норуоттар икки ардыларыгар сыһыан", "Учуутал уонна үөрэтээччи сыла". Бу уон араас былаһаакканы биир сүрүн сыал түмтэ: Арассыыйа күүһэ: сир иэнин кыаҕа - сайдыыга күлүүс. Балартан биирдэстэрэ Уһук Илиҥҥэ уонна сибииргэ туризм сайдыытын тула төгүрүк остуоллар, бырайыак кэпсэтиитэ буолла.

"Биһиги былаһааккабыт “Развитие территории” диэн. Ол аата баар сири биһиги хайдах байытабыт, дьоҥҥо хайдах табыгастаах оҥоробут диэн. Онтон сиэттэрэн биһиги Саха сиригэр бэлиэ тэрээһиннэр буоллун, араас бэстибээллэр буоллун, улахан интириэһи тардаллар. Онно эбии биһиэхэ 4 сулустаах гостиница да баар, 4 сулустаах эбийиэктэр айылҕа ортотугар да тутуллан тураллар", - диэн СӨ туризмы сайыннарар агентство салайааччыта Дмитрий Громов иһитиннэрэр.

Саха өрөспүүбүлүкэтигэр уопсайа 7 төрүт омук баарыттан, кэлии 100 тахса араас омук олороро бэлиэтэнэр. Барыларын эйэлээх биир халлаан анныгар түмэргэ, сыллата ону бөҕөргөтөр тэрээһиннэр ыытыллаллар. Сайдыылаах үйэҕэ омуктар тыл да, култуура да өттүнэн хайдах алтыһаллара уонна инниктин хайдах алтыһыахтаахтарын туһунан кэпсэтиһии ыытылынна.

"Биһиги былаһааккабыт модераторынан буолар Владимир Иванович Сорин. Кини РФ уопсастыбыннай палаататын, бу Россияҕа олорор омуктар бэйэ бэйэлэригэр сыһыаннарын хайысхатынан үлэлиир комитет салайааччыта буолар. Уопсайынан бу тэрээһин көҕүлээччитэ кини буолар. Ол иһин бэйэтинэн кэлэн бу былаһаакканы ыытар", - диэн ХИФУ наука уонна инновация департаменын дириэктэрэ Нинель Малышева кэпсээтэ.

Пуорум чэрчитинэн, "Сэргэлээх уоттара" култуура киинигэр "Саха өрөспүүбүлүкэтин таһаарыылаах социальнай бырайыактара" быыстапка тэриллэн үлэлээтэ. Документалист-режиссер Олеся Шишигина "Хорсуннар. Таптал туһунан", уонна "Мин үрдүбэр күн хаһан да киирбэт" киинэлэрэ кэлбит ыалдьыттарга көстүөҕэ. Хас биирдии кэлбит ыалдьыттарга уонна кыттааччыларга тэрийээччилэр кыра бэлэх тарҕаттылар.

Дойду регионнарын сомоҕолуур, олоҕун тупсарар сыалтан бу тэрээһиҥҥэ арассыыйа общественнай палаататыттан, өрөспүүбүлүкэ миниистирдирдэрэ, улуус баһылыктара бары мустан, биир интэриэстэрин ырытыстылар, уопуттарын атыстастылар.

"Сессия иһигэр билиҥҥи судаарыстыбыннай национальнай бэлиитикэ туругун туһунан кэпсэтибит. Сүрүн этиибит диэн, биһиги биир сомоҕо буолан, биир диэки көрөммүт, улуу Россиябыт инниктин үлэлээн өйүөхпүтүн наада", - диир СӨ тас сыһыаннаһыыга уонна норуоттар дьыалаларын миниистирэ Гаврил Кириллин.

Сайдыы суола сомоҕолоһууга сытар. Киэҥ иэннээх дойдубут иһигэр саха омук уратытын сүтэрбэккэ, атын омуктары кытта бииргэ алтыһан, үлэлэһэн, сайдыы суолугар сылдьарын илэ көрөн итэҕэйэн кэлбит ыалдьыттар улаханнык сөхтүлэр.