Сахабыт сирин улуустарыгар "Зёма" устудьуоннар этэрээттэрэ
Устудьуоннар түмсүүлэрэ бу сайын устата хас да улууһу кэрийэ сылдьан, нэһилиэктэргэ көмөлөһөллөр. Сүрүннээн анал байыаннай дьайыы кыттыылаахтарыгар уонна кинилэр дьиэ кэргэттэригэр тиийэн, түргэн-тарҕан хамсаныыннан араас үлэни кыайа туталлар.
"Мэҥэ Хаҥаласка биһиги 90 кэриҥэ оҕо буолан кэллибит, Өрөспүүбүлүкэ араас улуустарыттан мустаммыт. Холобур, бу Хара нэһилиэгэр 21 оҕо кэлэн үлэлии сылдьабыт. Баамытынньык скверин ыраастыыбыт. Оҕолор баҕа өттүнэн кэлэллэр", - диир актыбыыс Камила Лыткина.
Саха сиригэр аан бастакыннан оҥоһуллубут, Аҕа дойду улуу сэриитигэр кыттыбыт дьон паамытынньыга Хара нэһилиэгэр турар. Бу бүтэһик сылларга сирэ линзалаах буолан күөрэ-лаҥкы баран, ууллан, киһи сатаан хаампат буолуор диэри синньибит. Нэһилиэк дьаһалтата бэйэтин күүһүнэн иккитэ төхтөрүйэн туран оҥорбут, ол эрэн кыайтарбатах.
"Билигин проектаннары кытта кэпсэтэн бараммыт, кинилэр сүбэлэринэн, барытын манна хаһыахтаахпыт. Буорун түөрэ хаһан хатырык кутабыт, ол хатырык үрдүгэр полистерол ууран, буор кутан түмүктээн, тратуарнай билииккэ ууруохтаахпыт. Бу 2024 сылга былааннанар", - диэн Хара нэһилиэгин баһылыга Дария Назарова кэпсээтэ.
Устудьуоннар анал байыаннай дьайыы кыттыылаахтарыгар эмиэ көмлөһөллөр. Хара нэһилиэгэр 2 дьиэ кэргэҥҥэ тустаах көмөнү оҥордулар. Тутуу матырыйаалын хомуйан, дьиэни ханаппаакылыырга үлэлэһэллэр. Онтон саҥардыы дьиэ туттуохтаах Андрей Степановка тиийэн кырааскалыырга көмөлөстүлэр. Маннык аадырыстаах көмө баарыттан, дойдуларын көмүскүү сылдьар дьон санаалара көтөҕүллэр.
"Бу олус үчүгэй оҕолор бааллар эбит, соһуйдум даҕаны, үөрдүм даҕаны кэлэн көмө оҥорбуттарыттан. Бу саҥа кыбаартал, суолбут аспаал, нэһилиэкпит үчүгэйдик көмөлөһөр. Дьаһалта биһигини өйүүр, анараатах да көмө бөҕө оҥоһулла турар", - диэн анал байыаннай дьайыы кыттыылааҕа Андрей Степанов санаатын үллэһиннэ.
Устудьуоннар бу сайын устата Сахабыт сирин кэрийэ сылдьан, нэһилиэктэр киэркэйэллэрин, тупсалларын туһугар, итиэннэ анал байыаннай дьайыы кыттыылаахтарын дьиэ кэргэттэригэр көмөлөһөллөр. Өссө да былааннара киэҥ. Салҕыы этэрээт хамандыыра Данил Фёдоров "Быйыл биһиги 9 улууска сырыттыбыт. Өссө 3 хаалла – Бүлүү, Таатта, Ньурба” диэн этэр.
Бу маннык аахсыйа чэрчитинэн, улуустар тыын кыһалҕаларын быһаараллар, араас тутуу, өрөмүөн үлэлэрин ыыталлар. Итиэннэ ырааһырдыы уонна көҕөрдүү үлэлэрэ бараллар.