Дьокуускай 13 оскуолатыгар хапытаалынай өрөмүөн барар

Дьокуускай куорат 13 №-дээх оскуолатыгар үлэ күөстүү оргуйар. Манна хапытаалынай өрөмүөн үлэтэ тэтимнээхтик ыытыллар. Муус устар ыйтан саҕалаан билиҥҥи туругунан үлэлэрин сүрүн чааһын түмүктээн, эбийиэк 80% бэлэм. Оскуола дьиэтэ 2001 сыллаах тутуу, үлэҕэ киириэҕиттэн ыла улахан өрөмүөн үлэтэ ыытыллыбакка  турбута. Быйыл дьэ өр кэтэһиилээх өрөмүөннэрэ саҕаланан, оскуола саҥалыы тыыннанан, тупсубута харахха быраҕыллар.

Галина Васильева, Дьокуускай куорат 13№-дээх оскуолатын дириэктэрэ: “2023 сылга өрөмүөннэнэр оскуолалар испииһэктэригэр киирэн күүстээх үлэ бара турар. Ол курдук 120 мөлүйүөнтэн тахса сууммалаах өрөмүөн. Ону таһынан 15 мөлүйүөҥҥэ компьютердары, аактабай саалаҕа, остолобуойга, көрүдүөрдэргэ саҥа миэбэл ылыллыахтаах”.

Быйылгы дьылга хапытаалынай өрөмүөн үлэлэрин хаһааҥҥытааҕар да эрдэ саҕалаабыттара. Онон инники сылларга курдук балаҕан ыйын бүтүүтэ буолбакка атырдьах ыйын саҥатыгар оскуоланы бүтэрэн, сууйан-тараан туттарыахтара. Билиҥҥи туругунан эбийиэккэ 15 киһи үлэлиир. Инженернай ситимнэри, уоту-күөһү, канализацияны бүтэрэн, аны дьиэ ис-тас бараанын оҥорууга түбүгүрэ сылдьаллар. Сотору кэминэн истиэнэлэри кырааскалаан, араас уруһуйдарынан киэргэтиэхтэрэ.

Николай Бубякин, "Вертикаль" ХЭТ сүрүн инженерэ: “Хапытаалынай өрөмүөҥҥэ оскуола ис-тас өттө барыта оҥоһуллар. Ону сэргэ уота-күөһэ, уутун – хаарын ситимэ толору уларыйар”.

Өрөмүөн үлэтин хаамыытын кэтээн көрөөччү органнары кытары тэҥинэн төрөппүттэр эмиэ хонтуруоллууллар. Бырайыактааһын үлэтигэр, оскуолаларын тупсарыыга тэҥинэн үлэлэһэн, оҕолоро аны күһүн тупсаҕай оҥоһуулаах оскуолаҕа үөрэнэ киирэллэригэр дьулуһаллар.

Жанна Гончарова, төрөппүт: “Төрөппүттэр өттүлэриттэн хонтуруол күн аайы барар. Хапытаалынай өрөмүөнү олус өр күүппүппүт. Төрөппүттэр кылаас  салайааччыларын кытта оскуола ис дизайнын толкуйдаабыппыт”.

Оскуолаҕа саҥа миэбэл, үөрэнэр тэриллэр кэлэ тураллар. Аны атырдьах ыйыгар ылыллыбыт маллара барыта кэлэн бүтэн, миэстэлэрин булуохтаахтар. Оскуолаҕа билиҥҥи туругунан 885 оҕо 30 кылааһынан арахсан үөрэнэллэр.

Быйыл уопсайа киин куоракка бэдэрээлинэй үбүлээһин көмөтүнэн  13 оскуолаҕа хапытаалынай өрөмүөн үлэтэ ыытылла турар. Уопсайа 1 миллиартан тахса сууммаҕа үлэ барар. Мантан 116 мөлүйүөнэ Дьокуускай куорат үбүлээһинэ. Бары эбийиэктэри атырдьах ыйыгар бүтэрэн, аны балаҕан ыйыгар оҕолор саҥардыллыбыт үөрэх кыһалырыгар киирэн билиини сомсуохтара.