Нөөрүктээйи нэһилиэгин түмэлэ хаҥыыр

Дойду үрдүнэн киэҥник биллибит старовер атыыһыт Апексим Кушнарёвка уонна да атын старовердарга анаан көмүс тарбахтаах иистэнньэҥнэр кукла композициятын көрдөрүүгэ туруордулар. Бу дьүһүйүүнү туруорбут "Сыахай" түмсүүтүн чилиэнэ Людмила Осипова куукуланы оҥоруунан дьарыктаммыта номнуо 10-с сылыгар барда.

Людмила Осипова, "Сыахай" түмсүү чилиэнэ: "Афанасий Бродников үбүлүөйдээх сылын көрсө кинини мөссүөнүн куукулаҕа түһэрдим. Барытын баататтан оҥордум".

Култуура уонна успуорт эстафетатын чэрчитинэн старовердар туһунан билиини үйэтитиигэ Апексим уонна кэргэнэ Екатерина Кушнаревтар куукулалара быйыл лауреат үрдүк аатын ыларга тигистэ. Маны таһынан, Мэҥэ Хаҥалас уустарын түмсүүтүгэр бастакы үрдэли дабайбыт композиция элбэх киһи үрдүк сыанабылын ылбытын бэлиэтээтилэр. Дьиҥнээх олоро сылдьыбыт киһини маарыҥнатан оҥорор ыархаттардаах диэн маастар үллэстэр.

Людмила Осипова, "Сыахай" түмсүү чилиэнэ: "Биир куукула ортотунан икки нэдиэлэ оҥоһуллар. Манна туой, араас кырааскалар туттуллаллар, ис өттүн папье-машенан быһыытын-таһаатын таһаарабыт. Онтон таҥаһын-сабын историяҕа сөп түбэһэр гына тигэбит".

Павловскай түмэлэ сылтан сыл бэйэтин композициятын байытан иһэр. Араас акция чэрчитинэн, бэлэх да быһыытынан манна 17 үйэттэн саҕалаан билиҥҥи үйэҕэ тиийэ араас көрдөрүү баар. Холобур быһыытынан дизайнер Августина Филиппова тикпит таҥастарын куукулаларга дьүһүйэн түмэл пуондатыгар бэлэхтээтилэр.

Наталья Максимова, Павловскайдааҕы кыраайы үөрэтэр түмэл салайааччыта: "Колосова Юлия Егоровна оскуола иһинэн куруһуокка оҥорбут куукулалара тураллар. Кини Августина Филиппова айбыт таҥастарын куукула оҥортообута. Итиэннэ күрэххэ бастаабыта. Ол оҥоһуктарын биһиги түмэлбитигэр бэлэхтээбитэ".

Өссө биир дьоһун бэлэх быһыытынан ааттаах-суоллаах худуоһунньук авторскай коллекцията буолла.

Саха норуотун, итэҕэлин хартыыналарыгар хоһуйбут, маһыгар суорбут маастар Афанасий Бродников хартыыналра Павловскай түмэлигэр бэлэх быһыытынан киирдилэр.

Нэһилиэк баай дириҥ устуоруйатын кэрэһэлиир быыстапка кэлэр көлүөнэни үөрэтэр сыаллаах ыытылынна. Саха сиригэр кэлэн олохсуйбут старовердарга махталларын туоһута - бу кинилэр туһунан норуокка киэҥник биллэрэн үйэтитии буолар. Онуоха биир үтүө холобурунан кинигэ таһаарыыта буолла.

Наталья Максимова, Павловскайдааҕы кыраайы үөрэтэр түмэл салайааччыта: "Саҥа кинигэр бэлэмнэнэн сылдьар. Маны краевед Михайлов Рудольф Карлович түмэн суруйда. Кини национальнай архыыбы, Пушкин аатынан библиотеканы хасыһан улахан үлэни ыытта".

Иван Прокопьевич Игнатьев - Кинигэ Уйбаан аатынан кыраайы үөрэтэр түмэл нэһилиэк олоҕор быһаччы суолталаах. Улуус, нэһилиэк устуоруйатын тута сылдьар кырдьаҕас түмэл көлүөнэлэр ситимнэрин тутан олох хаамыытынан сылтан сыл байан, хаҥаан иһэр.