Ойуур баһаара уҕараабат

Көтөр аал лүөччүгэ Павел Ядрихинскай  ханна көтөрүн биир идэлээхтэрин кытары быһаарсар. Кинилэр үлэлэрэ саҥа баһаар ханна тахсыаҕын суоҕун билии буолар. Быйылгы баһаар кэмэ саҕаланыаҕыттан, кинилэр көмөлөрүнэн үгүс уот булулунна. Бүгүн эмиэ улахан иэҥҥэ 5 оройуону хабан үлэ ыытыллыаҕа.

Павел Ядрихинский, Дьокуускайдааҕы "Авиалесоохрана" салаатын үлэһитэ: "Киин оройуоннарга быйыл авиация көмөтүнэн баһаардары булуталаабыппыт. Онно тута парашютистары түһэртиибит, кинилэр биир күн иһинэн умулуннараллар. Итинник гынан баһаар кыра эрдэҕинэ умулуннарабыт. Ол иһин биһиэхэ сыстар сирбитигэр балаһыанньа этэҥҥэ. Күн аайы кыра сөмөлүөттэринэн кэтээн көрүүнү оҥоробут. Икки маршруттаахпыт. Холобура, бастакыга Дьокуускайы, Намы уонна Уус Алданы көрөбүт. Онтон иккискэ киин куорат сорох өттүн уонна Мэҥэ Хаҥалас киирэллэр".

Чахчы тустаах салаа учаастагар улахан баһаар тура илик, онон уолаттар атын отделенияларга көмөҕө туруналлар. Билигин парашютист - баһаарынайдар улахан аҥардара тыаҕа уоту умуллара сылдьаллар. Сорохторо манна саҥа баһаарга бараары кэтэһэн олороллор. Малларын -салларын бэлэмнэнэллэр, парашюттарын бэрийэллэр.

Николай Копырин, Дьокуускайдааҕы "Авиалесоохрана" салаатын үлэһитэ: "Билигин уолаттарбыт Уус Майаҕа уонна Хандыгаҕа үлэлии сылдьаллар. Ол иннинэ Тополинайга умуруорууга сылдьыспыттара. Аттынааҥы отделениеларга күүс-көмө буолабыт. Сорохтор билигин аммаҕа сылдьаллар. Уопсайынан 60 байыастаахпыттан 50 баһаарга сылдьаллар".

Ол курдук, Уус Майа улууһугар билигин 13 баһаар турар, уопсайа 83 тыһыынча 171 гектар иэннээх сиргэ. Онтон күн бүгүн 3934 гаата умулларыллынна. Уопсайа 400-тан тахса киһи уонна 4 техника үлэлиир.

Алексей Гоголев, СӨ экологияҕа министиэристибэтин ойуур кэтэбилин уонна харыстабылын департаменын салайааччыта: "Билигин бары күүһү Уус Майа улууһугар уурабыт. Ардах түһэн Аммаҕа хас да баһаартан байыастарбыт босхолоннулар. Кинилэри эмиэ Уус Майаҕа илдьиэхпит. Өлүөхүмэттэн босхоломмуттары Алдаҥҥа ыыталыахпыт. Маны сэргэ ыалыы регионнартан кэлэн көлөһө сылдьаллар. Забайкальеттан, Бурятияттан кэллилэр. Ону таһынан Архангельскайтан дьон көрдөөбүппүтүгэр, 50 киһи кэллэ”.

Билигин баһаар тахса турар сирдэригэр 4 уонна 5 кылаастаах уот туруон сөптөөх куттала турар. Онон бары күүс кэтиир - маныыр  үлэҕэ ууруллар.