Быйыл орто уонна үрдүк үөрэххэ бүддьүөт миэстэтэ элбэх

Үөрэххэ туттарсыы саамай үгэннээн турар кэмэ. Билигин орто уонна үрдүк анал үөрэххэ киирээччилэр үксүлэрэ докумуоннарын туттаран, ханна хапсар сирдэринэн сөбүлэҥнэрин биэрээри толкуйдана сылдьаллар. От ыйын 20 күнүгэр диэри бакалавриакка туттарсыы, онтон то ыйын 31 күнүгэр диэри магистратураҕа сайабылыанньалары ылыы болдьоҕо түмүктэнэр.

Гаврил Торотоев, ХИФУ Хотугулуу-Илиҥҥи норуоттар тылларын уонна култуураларын үөрэтэр институт дириэктэрэ: «Быйылгы дьылга биһиэхэ кэккэ уратылар бааллар. Ол курдук анал байыаннай дьайыы кыттыылаахтара туттарсар кыахтаахтар, кинилэр оҕолоро эмиэ ураты балаһыанньалаахтар. Инньэ гынан кинилэргэ туспа куонкурус баар. Итини сэргэ Хотугулуу-Илиҥҥи олимпиадаҕа кыайбыт оҕолор биһиги институппутугар быһа үөрэххэ киириэхтэрин сөп».

Өрөспүүбүлүкэбит саамай бөдөҥ үрдүк үөрэҕин кыһатыгар Хотугулуу-Илиҥҥи федеральнай университекка 4436 бүддьүөт миэстэтэ көрүллүбүт. Буоларын курдук медицина, педагогическай уонна айти хайысхаларга саамай элбэх сайабылыанньа киирбит. Саха тылын уонна хотугу аҕыйах ахсааннаах норуоттар тылларын, литератураларын, култуураларын үөрэтиигэ эмиэ үгүс элбэх бүддьүөт миэстэтэ көрүллэр.

Туяра Понамарёва, тутар хамыыһыйа эппиэттээх сэкирэтээрэ: «Хотугулуу-Илиҥҥи норуоттар тылларын уонна култуураларын үөрэтэр института 15 хайысхаҕа бакалавриакка уонна 8 хайысхаҕа магистратура устудьуоннары ылар. Быйылгы үөрэх дьылыгар “единое окно” диэн киирбитэ. Ол онон оператордар үлэлииллэр. Туттарсааччы хайа баҕар институкка кэлэн дөкүмүөннэрин туттарыахтарын сөп».

Бүтүн өрөспүүбүлүкэ үрдүнэн 3 үрдүк үөрэх кыһатыгар уопсайа 5623 бүддьүөт миэстэ көрүллүбүт. Онтон орто анал үөрэххэ 6712 миэстэ тыырыллыбыт  бу былырыыҥҥыны кытары тэҥнээтэххэ 300 миэстэнэн үрдээбит. Саха сиригэр уопсайа 42 орто үөрэх кыһатыгар устудьуоннар туттарсаллар, билиҥҥи туругунан 6000 сайабылыанньа киирэн сытар.  Докумуону тутуу атырдьах ыйын 15 күнүгэр диэри ыытыллыаҕа.

Владислав Хабаров, идэҕэ урутаан бэлэмниир киин дириэктэрэ: «Быйыл Үөрэх министиэристибэтин туруорсуутунан быйыл хайа да сыллааҕар элбэх миэстэ орто үөрэх кыһаларыгар көрүлүннэ. Ол курдук 300 тахса мисэтэнэн элбээтэ. Онон 9 кылаас эбэтэр 11 кылаас кэннэ туттарсар оҕолорго улахан кыах биэрдилэр».

Онтон төлөбүрдээх үөрэххэ туттарсыы от ыйын 25 күнүгэр диэри ыытыллыаҕа. Тус сыаллаах үөрэххэ туттарсыы эмиэ араастаһар. Билиҥҥи туругунан 300-кэ сайабылыанньа киирэн турар.