Көрбөттөр биллиилээх хартыыналары тутан-хабан көрөр кыахтаннылар

Аан бастакытын национальнай художественнай түмэлгэ илии иминэн хараҕынан мөлтөхтүк уонна олох көрбөт дьоҥҥо аналлаах быыстапка үөрүүлээх быһыыга-майгыга арыллынна. Бу күн мусуой уораҕайыгар искусствоҕа сыстыан баҕалаах - доруобуйаларын туругунан хааччахтаах үгүс дьон түмүстэ.

Сардана Посельская, СӨ НХТ научнай-просветительскай салаатын сэбиэдиссэйэ: "2023 сыл саҥата художественнай мусуой граан кыайбыта. Онон Саха сиригэр биллэр куруутун көрдөрүүгэ турар хартыыналары мөлтөхтүк уонна олох көрбөт дьоҥҥо анаан тутан-хабан көрөр макеттары оҥоттордубут".

Инклюзивнай быыстапка Алишер Усманов "Особый взгляд" диэн ааттаах аһымал пуондатын нөҥүө ыытыллыбыт граанынан дьон дьүүлүгэр турда. Ол курдук, түмэл куурутун турар экспозициятыттан Петр Романов, Виктор Петров, Марианна Лукина, Андрей Чикачев, Владимир Карамзин Саха сирин аатырбыт худуоһунньуктарын хартыыналарынан турда.

Уопсайа биэс тутан-хабан көрөр хартыына быыстапкаҕа турда. Маннык биир макеты оҥорууга ортотунан икки ый барар эбит. Туттуллар матырыйаала скульптурнай пластик.

Быыстапкаҕа турбут үлэлэр Москва куоракка Михаил уонна Ольга Шу мастарыскыайдарыгар таҥыллан тахсыбыттар. Хас биирдии макет А3 форматтаах, дьиҥ хартыынаттан кээмэйэ кыра. Ол эрэн доруобуйаларын туругунан хааччахтаах дьоҥҥо дьиҥнээх бэлэх кэриэтэ. Сүүстэ истибиттээҕэр биирдэ көрбүт ордук диэн өйдөбүллээх. Кыра сааһыгар эмискэ көрбөт буола сыһан баран, эпэрээссийэ нөҥүө арыый эмэ көрөр буолбут, 77 хаарын уулларбыт Зоя Колодезникова бу күн кэлэн быыстапканы көрө дуоһуйбут. Сэргэхсийбит.

Зоя Колодезникова, быыстапка ыалдьыта: "Көрбөт дьоҥҥо илиилэрин иминэн тутан көрөллөрүгэр олус табыгастаах хартыыналар оҥоһуллубуттар. Өссө да маннык бырайыактар кэҥии  утрдуннар, биһигини ыҥыра турдуннар".

Художественнай түмэл ыкса Дьокуускайдааҕы көрбөттөр библиотекаларын кытары үлэлэһэр, онон бу күн ыалдьыттар бары кэриэтэ библиотека ааҕааччылара. Манна хас да бөлөҕүнэн арааран экскурсовод макеттар туһунан сиһилии кэпсиир.

Айталина Корнилова, Дьокуускайдааҕы көрбөттөр библиотекаларын салайааччыта: "Бу тэрээһиҥҥэ бибилиотекалар эмиэ олус бэлэмнэнэн кэллибит. Кырдьыга да,  биһиги ааҕааччыларбыт сүрэхтэринэн көрөр дьоннор. Кинилэр тутан-хабан, истэн ылыналлар".

Онон бу кэмтэн ыла Национальнай художественнай түмэлгэ илии иминэн хартыыналары көрүөххэ сөп.