Быһааччыларга киэҥ хабааннаах үөрэх тэрилиннэ
Бөртөлүөт кэлэн түһээтин кытары быыһааччылар тутатына таһаҕастарын тиэйбитинэн бараллар. Кинилэр малларын хомунан бөртөлүөккэ киирэллэригэр аҕыйах мүнүүтэ бэриллэр. Бары миэстэлэрин булан олорбуттарын кэннэ, эрчиллии буолуохтаах сиригэр көтөллөр.
Этэрээт хамандыыра үөрэх хайдах быһыылаахтык барыахтааҕын быһаарар. Барыта эрдэтинэ толкуйдаммыт сценарийынан ыытыллар. Аан бастаан ыркый ойуур быыһыттан кыра киһи түһүөн сөптөөх сирин көрдүүллэр. Дьокуускай куорат эргин Тулагы-Киллэм нэһилиэгин сиринэн көтөн баран өрүс уҥуор Мэҥэ Хаҥалас улууһугар көттүлэр. Манна тустаах эрчиллиилэри оҥорорго табыгастаах сири буланнар бастакы киһи быанан аллараа түһэр.
Тустаах эрчиллии быыһааччылар үөрүйэхтэрин сүтэрбэттэригэр, итиэннэ сатабылларын тургутар сыаллаах ыытыллар. Бөртөлүөттэн түһүү күүстээх эрчиллиини, үрүдүктэн куттаммат буолууну эрэйэр. Онон мээнэ киһи ылсыбат дьыалата.
Илья Зуев, ЫБММ Саха сиринээҕи салалтатын быыһыыр сулууспатын 1-кы кылаастаах быыһааччыта: «Десантниктар МИ-8 б6рт6л86ттэн түһэллэр. Бүгүн икки дьарыгы оҥоруохпут. Ол курдук кытаанах сиргэ түһүөхпүт уонна ууга түһүү сатабылларын тургутуохпут. Туһааннаах эрчиллии эрэ кэннэ быһааччылар үөһэттэн түһүүгэ көҥүл ылаллар».
Кылгас кэмнээх тохтобул кэмигэр быыһааччылар тыыларын бэлэмнииллэр уонна ууга кэтэр анал танастарын таҥналлар. Билигин биир саамай ыарахан тургутуктарын толоруохтара.
Ууга түһүү быыһааччыларга биир саамай уустук көрүҥ буолар. 15 мүнүүтэ ууга сытан бараннар бары биир сиргэ чөмөхтөнөллөр. Онтон бөртөлүөт төттөрү кэлэн кинилэри күөлтэн ылар. 40-ча миэтирэ үрдүктэн лебедканан анал киһи түһэн барыларын биирдии-биирдии бөртөлүөккэ таһаартыыр. Онтон эмиэ бу эрчиллиилэрин хаста даҕаны төхтүрүйэн туран толороллор.
Александр Максимов, ЫБММ Саха сиринээҕи салалтатын быыһыыр сулууспатын 1-кы кылаастаах быыһааччыта: «Маннык түһүүлэри оҥорор биэһиэхэ улахан ыарахана суох. Наар эрчиллэ сылдьар дьарыкпыт. Сатабылбытын сүтэрбэт сыалтан маннык үөрэхтэри оҥоробут».
Уопсайа бүгүҥҥү эрчиллиигэ 11 десантник кытынна. Бары уопуттаах, хас да сыл быыһааччынан үлэлээбит дьон буолаллар. Бу маннык бөртөлүөтүнэн түһүүнү сүрүннээн ойуур баһаардарыгар уонна халаан кэмигэр ууга былдьаммыт нэһилиэнньэлээх пууннарга туһаналлар. Онон десантниктар үөрүйэхтэрин сүтэрбэттэрин туһугар бу маннык хабааннаах эрчиллиилэр сылы эргиччи ыытыллаллар.