«Агростартап» граныгар 92 мөлүйүөн көрүлүннэ
Быйылгы дьылга саҥа саҕалааан эрэр фермердэргэ “Агростартап” граныгар 92 мөлүйүөн 200 тыһыынча көрүлүннэ. Оттон олортон 33 мөлүйүөнэ дойду үбүлээһиниттэн буолар, оттон 59 мөлүйүөнү өрөспүүбүкэ Ил Дархана Айсен Николаев бааһынай хаһаайыстыбаҕа көрдө. Урукку сыллары кытта тэҥнээн көрдөххө, 2022 сыллаахха 60 мөлүйүөн эрэ тыырыллыбыта.
Айал Тимофеев, ТХМ сүөһүнү иитиигэ департаменын солбуйааччы: «Сылтан сыл куонкуруспут уларыйан иһэр. Быйыл баалы ааҕыы тиһигэ уларыйда. Өрүүтүн ыччаттарга улахан болҕомтону уурабыт. СВО-ҕа сылдьар дьон аймахтарыгар баал эбиллэр. Быйылгаттан муниципальнай тэриллии бас билиитигэр турар эбийиэги атыылаһар кыах баар буолла».
2019 сылтан дойду уонна өрөспүүлүкэ үбүттэн 370-чэ мөлүйүөн көрүллэн, билигин 130-тан тахса киһи "Агростартап" гранын ылан туһанан сылдьар. Быйыл сиппит-хоппут бизнес-былааннаах, үчүгэй бырайыактаах уопсайа 20-чэ киһи граҥҥа тиксиэҕэ. Сылтан сыл кыттааччылар саастара эдэримсийэн иһэрэ тэрийээччилэри үөрдэр. Ыччат дьон бааһынай хаһаайыстыбаны ылсан үлэлэттэҕинэ дойдубут сайдыыта инникилээх диэн бэлиэтииллэр.
Александр Артемьев, СӨ бааһынай хаһаайыстыбаларын уонна кээпэрэтииптэрин холбоһугун президенэ: «Сыллата күрэх тыҥааһыннаах буолан иһэр. Кыттааччылара таһымнара үрдүүр».
Грант күрэҕэр 1 миэстэҕэ барыллаан 5-тии киһи кыттар. Сыллата баҕалаах элбиир. Онуоха куонкурсу аһардарга ирдэбилгэ уларыйыылар киирдилэр. Ол эбэтэр бэйэтэ сирдээх-уоттаах, тиэхиньикэлээх киһи кыайар кыахтанар. Быйылгы кыттааччыларга иккистэрин-үһүстэрин холонон көрөөччүлэр бааллар. Бу сырыыга сыыһаны-халтаны көннөрөн ылар эрэллээхтэр.
Денис Иванов, Амматтан "Агростартап" кыттыылааҕа: «Мин ыҥырыаны иитии бырайыагынан кыттабын. Бу теманан магистратураҕа диссертация көмүскээн турабын. Онтон бу научнай чинчийиибин аспирантураҕа салгыыр санаалаахпын».
Сергей Иванов, Үөһээ Бүлүү улууһун тыа хаһаайыстыбатын салалтатын салайааччыта: «Ыраах суола суох нэһилиэктэртэн үһүс сылларын кытта сатыыллар. Баллары ылан көрдөххө саамай үрдүгэ 70-75 буолар эбит. Онтон биһиэннэрин киэнэ ыраах суола суох сир буолан бааллара кыра буолар. Онон итинник ньыманан сыаналаабакка, бырайыак кэскиллээҕин көрөллөрө буоллар».
Кыттааччылар баалларын эрдэттэн Тыа хаһаайыстыбатын министиэристибэтэ суоттаан биэрэр. Хамыһыйа мунньах бириэмэтигэр баалы үрдэппэккэ, кыччатыаҕын эрэ сөп буолар. Грант ылбыт фермердэр 5 сыл устата үлэ миэстэтин таһааран 18 ый устата көрүллүбүт харчыны туһаныахтаахтар.
Александра Цыпандина, Амма улууһун бааһынай хаһаайыстыбаларын уонна кээпэрэтииптэрин бэрэссэдээтэлэ: «Биһиги сыл аайы бу күрэххэ кыттабыт. Быйыл атына диэн элбэх эдэр дьон киирдэ. Онтон биһиги наһаа үөрэбит. Тоҕо диэтэр тыа сирин сайдыыта ыччаттан тутулуктаах».
"Агростартаптан" маҥнайгы үктэли ылан салгыы дьиэ кэргэн граныгар үлэлэһиэхтэрин наада диэн тэрийээччилэр сүбэлииллэр. Онуоха хаһаайыстыба 3 сыл үлэлээтэҕинэ эрэ дьиэ кэргэн граныгар киирсэр.