Дьокуускай бастыҥ балыксыта ааттанна
Хахсаат тыалы, ардаҕы ахсарбакка Табаҕа тумуһугар дьон-сэргэ толору. Өлүөнэ эбэ кытылыгар Балыксыт күнэ ыытыллар. Күөх Боллох мичик гынарын билээри да, элбэх көмүс хатарыктааҕы ким туппутун, итиэннэ кэпсэтэ, санаа атастаһа, билсиһэ уопсайа 66 киһи бу күн кэллэ. Балыксыттар санаалара бөҕөх, настырыанньалара өрө көтөҕүүлээх
Станислав Карпов, балыксыт: "Олох кыра сааспыттан балыктыыбын. Бу күрэххэ килиэпкэ уонна чиэрбэҕэ хаптара турабын. Арааһыттан боруобалыыбын диэххэ сөп".
Бүгүҥҥү күрэх Дьокуускай куорат таһымнаах. Ол курдук, "Бастакы балык", "Саамай улахан балык", "Саамай эдэр балыксыт", "Кырдьаҕас, уопуттаах балыксыт" уонна "Сэдэх экземпляр" диэн уопсайа 5 анал аат иһин кииристилэр. Балык диэн баран муннукка ытаабыт дьоҥҥо анаммыт тэрээһини 4 улахан тэрилтэ көҕүлээн ыытта.
Яков Заровняев, СӨ экология министиэристибэтин миниистирин солбуйааччы: "1965 сыллаахтан Балыксыт күнэ ылыллар буолбут эбит. Ол эрэн биһиги киэҥник ылбат этибит. Быйыл миниистир уурааҕынан Дьокуускай куоракка балыксыт күрэҕин оҥордубут. Тэрээһиҥҥэ наука хайысхата үлэһиттэрэ, “Якутрыбвод”, рыбоохраналар кытыннылар. Онон уопсайа 60 тахса киһи күрэххэ кытынна".
Чахчы, төһө да күн-дьыл туруга балыктыырга сөбө суох да буоллар, бу күн Өлүөнэ эбэ барахсан күрэхтэһээччилэри матарбата. Бу күн көмүс хатырыктааҕы сэргээччилэр эрэ буолбакка, балыгы үлэ оҥостубут дьон кэлэн, эмиэ санааларын үллэстэн, үлэлэрин түмүгүн туһунан сырдаттылар.
Гаврил Иванов, СӨ экология министиэристибэтин балыгы хаптарыыны тэрийии салаатын салайаачытын солбуйааччы: "2020 сыллаахха Саха сиригэр балыктааһын быраабылата уларыйбыта. Онон билигин 500 тахса биирдиилээн бэйэ айаҕар балыктааччыларга аналлаах сирдээхпит. Биһиги министиэристибэбит научнай үлэлэри сакаастыыр. Ол федеральнай бюджеттан үбүлэнэр. Холобура, наука чинчийиитин түмүгүнэн эһиилгэттэн сууккаҕа хаптарар балык ахсаана элбиэҕэ".
Оттон 1,5 чаас устата күрэх ааһан, тэрээһиммит саамай сүмэтэ саҕаланар. Балыксыттар Күөх Боллох тугу мичик гыммытын көрдөрөн, ыйааһыннаан кыайыылаахтар билиннилэр. Манна даҕатан эттэххэ, бу күрэх эһиилгиттэн өрөспүүбүлүкэ таһымыгар тахсыаҕа.