Көҥүл тустууга Аан дойдутааҕы турнир 808 спортсмены муста
Оҕолорго Пинигин аатынан күрэхтэһии 90 сыллартан саҕалаан ыытыллар. Бастаан Өрөспүүбүлүкэ иһинэн спортсменнары түмэр эбит буоллаҕына, сылын аайы иэҥин кэҥэтэн, билигин номнуо Аан дойду таһымыгар тахсан турар. Беларусь, Казахстан, Монгол, Таджик, Кыргыс сириттэн, ону таһынан Арассыыйа 9 араас регионнарыттан уопсайа 808 спортсмен муһунна. Күрэхтэһии быйыл Арассыыйа сүүмэрдэммит хамаандатын Аан дойдутааҕы бырагырааматыгар киирбит, онон хамаандаҕа баар сэттэ оҕо кыттыыны ыла сылдьаллар.
«Тэтими түһэрбэккэ сыл ахсын кэҥэтэн, улаатыннаран иһэбит. Сыыспат буоллахпына, кыра саастаах уолаттарга 570 кэриҥэ оҕо кытынна. Онно бары 2009 сыллаахтартан кыра саастаах оҕолор 24 киилэттэн ыарахан ыйааһыҥҥа диэри 17 категорияҕа кииристилэр. Мин билэрбинэн, 6 оҕо Саха сириттэн, 5 оҕо Тываттан уонна Кыргызстантан 3 оҕо бастаата. Уоона биирдиилээн регионнартан эмиэ бааллар», - диир СӨ үтүөлээх тренерэ Степан Сивцев.
Турнир от ыйын 1 күнүттэн от ыйын 7 күнүгэр диэри ыытыллар. Сахабыт сирин үүнэн иһэр спортсменнара Өрөспүүбүлүкэбит араас улуустарыттан кыттыыны ыла кэллилэр. Саамай элбэх спортсмены Дьокуускай куорат - 91, Чурапчы улууһа - 59 кыттааччыны туруорда. Күрэхтэһии инниннэ тустууктар анал күүстээх, хас эмэ эргииринэн бэлэмнэниилэри ааспыттар. Ол туһунан бэлэмнээн илдьэ кэлбит тренердэрэ маннык санаалаахтар.
"Оҕолор кыһын устата дьарыктаммыттара, бэлэмнэрэ үчүгэй. Кыралары көрдөххө, өссө да үлэлиир хаалла. Улахаттар тустууларын көбүөр көрдөрүөҕэ. Бу күрэхтэһии кэнниттэн атырдьах ыйыгар “Боотурдар оонньуулара” буолуоҕа. Уонна сорохтор “Азия оҕолоругар” бэлэмнэниини саҕалыахтара. Онтон атыттар Россиянан тустуохтара", - диэн Сунтаар улууһун көҥүл тустууга тренерэ Владимир Данилов кэпсээтэ.
Уһун кыһыны быһа дьарыктаммыт үлэлэрин түмүгэ көбүөргэ быһаарыллар. Оҕолор туста тахсаары сылдьан долгуйар диэни умнан, туох баар ис туруктарын сааһыланан тахсаллар. Кыра саастан оҕоҕо эр санааны иитии - бу тренер киһи сүрүн сыала буолар.
Оҕолор улахан көбүөргэ сүрэхтэннэхтэринэ, өссө эбии уопутуран, тас дойду тустууктара ханнык тиэхиникэни, дьарыгы тутуһалларын үөрэтэн үүнэллэр-сайдаллар. Быйылгы турнирга кэлбит спортсменнар үчүгэй дьарыктаахтарын күрэхтэһии сүрүн судьуйата Николай Николаев бэлиэтээтэ:
"Саамай бэлэмнээх хамаанда Монголия диэххэ сөп. Кини 20 кыттааччылаах. 16 саастаахтарга диэри үчүгэй киирсиилэр буоллулар. Кыргызтарга, монголларга, кыттыбыт дьоҥҥо барыларын кэриэтигэр, чемпионнар бааллар".
Саха таптыыр тустуута - урут-уруккуттан дьон биһирэбилин ылбыт көрүҥ буолар. Тустуу түһүлгэтигэр мустубут оҕолор тэтимнэрин ыһыктыбакка дьаныардаахтык дьарыктанан, элбэх күрэхтэргэ кыттан, маастарыстыбаларын кэҥэтэн инникитин саха сирин аатырдар тустууктара буолан үүнэн тахсыахтара. Саха сирин спордун устуоруйатыгар кыһыл көмүһүнэн суруллубут Павел Пинигин аатынан түһүлгэ кэлэр кэнчээрини иитэн таһаарарга күүһү-кыаҕы биэриэҕэ.