Горнай улууһун Көтөт учаастагар 14 хаһаайыстыба сайылыыр
Бу курдук Христофоровтар сайылыктарыгар туттубут 6Х6 саҥа дьиэлэригэр киирээри сүргэлэрэ көтөҕүллэ сылдьар, өр сыллаах туруорсуу кэнниттэн Орто суртан 20 тахса эрэ килиэмиэтир тэйиччи сытар, федеральнай аартыктан чугас Көтөт сайылыгар бу күһүн электриичестибэ киириэхтээх. Хаһааҥҥыта эрэ сопхуостааһын саҕана олоҕо өрө күүрэн олорбут учаастак, ыһыллыы кэмиттэн улам уостан сайылыкка эрэ кубулуйбута, ол бэйэтэ билигин сыыйа иккис тыынын ылан, Көтөккө хас да саҥа дьиэ дьэндэйбит. Учаастакка олорооччу хас биирдии ыал билиҥҥитэ, дьоҕус генератордарынан уоттанан үүттэрин эрийэллэр. Сайылыкка дьон өссө элбиэҕин, электериичистибэ суоҕа атахтыыр.
"Көтөт учаастагар 14 хаһаайыстыба сайылыыр. Киһитин ахсаана оҕолуун-уруулуун сүүстэн тахса. Бары сүөһү-сылгы иитэннэр ньыр-бааччы олороллор. Быйыл Маҥаны нэһилиэк дьаһалтата электричество ситимин тардар тэрилтэни кытта дуогабар түһэристибит. Уопсай сууммата 7 мөлүйүөнтэн тахса, бу сыл үһүс кыбаарталын бүтүүтэ сайылыкка уот киириэхтээх", - диэн Маҥаны нэһилиэгин баһылыга Михаил Текеянов иһитиннэрдэ.
4 кыыһы атаҕар туруоран көччөх гынан көтүппүт Феодосия Бииктэр Христофоровтар сайылыктарын тиэргэнигэр сыл ахсын буоларын курдук, үүнээйи арааһа силигилээн эрэр, төһө да быйыл сайылыктарыгар хойутаан киирдэллэр, хаһаайка барыны бары энчирэппэккэ үүннэрэрдии туруммут.
Ураты кэрэ сирдээх Көтөт сайылыгын олохтоохторо сибиэһэй бэйэ аһынан аһыылларын таһынан, айылҕа бэрсэр быйаҥыттан, сир аһыттан сомсоллор, эбэлэригэр киирэн илим үтэн, туу быраҕан балыктаан эбинэллэр.
Хаһаайка араас дьиэ көтөрүн иитэрин туохтааҕар да ордорор, ол курдук күн бүгүн төбөнөн 39 көтөрү сайылатан турар, ол иһигэр индюктар, хаастар, кууруссалар, кустар, чоппуускалар уонна кус оҕолоро. Былырыын тахсыбыт кустара номнуо улаата охсон, быйыл уйаларын иһигэр бэйэлэрэ сымыыт баттыы сыталлар, кууруссалар күннэтэ 7-8 сымыыты биэрэ тураллар.
"Саҥа үөрэнээри инкубатордаабытым. Быйыл эбинэн 5 индюгу ыллым. Сорохторун кыстатыам, үһүн сиэм, боруобаҕа ылбытым. Үчүгэй, түргэнник ситэр ас диэн. Бэйэ кыахпынан баҕа өттүнэн атыылаһабын, аһын-үөлүн эмиэ ", - диир Көтөт сайылыгын олохтооҕо Феодосия Христофорова.
Христэпиэрэптэр былырыын сайын 4 ыанар ынахтаах буоллахтарына, биирин туттубуттар. Онтон үһэ хаалбытыттан, ааспыт сыл отун хаачыстыбата мөлтөҕүттэн, кыстык ыараханнык ааһан, биир ынахтара күөххэ үктэммэтэх.
"Кыһыны нэһиилэ туораатым, биир ынаҕым өлбүтэ, борооскулардаахпын. Бэйэм арыылыыбын, сакаастыыр дьоҥҥо биэрэбин, үүппүн эрийэн, сүөгэйдээн атыылыыбын, дьоммор ыытабын. Чоппуускаларым улааттахтарына, атыылаан кыра дохуот киллэриниэм", - диэн салҕыы Феодосия Христофорова кэпсээтэ.
Бу курдук сайыҥҥы үтүө күннэри баттаһа, тыа дьоно сайылыктарыгар тахсан дьиэ кэргэн бигэ туругун уһансан, үүнээйи олордон, хаһаайыстыба көрөн үлэлииллэр-хамсыыллар, сарсыҥҥы күнү эрэл санаалаах көрсөллөр.