Неврология 80 сыла
Сибэкки дьөрбөтө тутуурдаах, араас судаарыстыбыннай наҕараадалаах Өрөспүүбүлүкэ невролог быраастара. Быйыл Неврологическай сулууспа тэриллибитэ 80 сыла. Сахабыт сирин медицинатын сайдар кэмнэрэ ааспыт үйэ 40-50 сылларыгар буолбута. Оччолорго Неврологическай сулууспа төрүттэнэн күн-бүгүн хас биирдии улуус ахсын невролог быраастар нэһилиэнньэни көрөн-истэн, чөл доруобай туруктаах буолалларыгар үлэлии-хамныы сылдьаллар. 3 күн устата Сахабыт сирин невролог быраастара түмсэн уопут атастастылар.
Татьяна Эверстова, Өрөспүүбүлүкэтээҕи 2 №-дээх балыыһа неврологическай салаатын невролог-бырааһа: “Биһиги балыыһабытыгар тымыр – сүрэх ыарыыларын эмтиибит, ону таһынан инсульт кэннэ чөлүгэр түһүүнү эмиэ ыытабыт. Салаабыт 24 койка миэстэлээх. Бу саас чөлүгэр түһэрии салаата аһыллыбыта. ”
1943 сыллаахха Дьокуускай куорат өрөспүүбүлүкэтээҕи балыыһа терапевтическай салаатын иһинэн 18 миэстэлээх ниэрбэни эмтиир салаа арыллыбыта. Ол салаа билигин Өрөспүүбүлүкэтээҕи 2-с нүөмэрдээх балыыһа неврология ыарыыларын эмтиир салаата буолан турар, манна билиҥҥи туругунан 32 миэстэҕэ өрөспүүбүлүкэ бары муннуктарыттан кэлэн суһал эмтэниини ааһаллар.
Сахайаана Баланова, Өрөспүүбүлүкэтээҕи 2 №-дээх балыыһа неврологическай салаатын дьуһуурунай невролог-бырааһа: «Ньиэрбэ араас ыарыыларын эмтиибит. Бу ыарыыларынан киһи хас баҕар сааһыгар ыалдьыан сөп. Сүрүннээн умнуган буолууну, таттарар ыарыыны эмтиибит».
Төгүрүк суукка устата быраастар палаталары кэрийэ сылдьан ыарыһахтары көрөллөр. Олоххо буолар араас оһоллорго түбэһэн, доруобуйаларын айгыратан Сахабыт сирин араас муннуктарыттан кэлэн бу салааҕа эмтэниини ааһаллар. Кинилэр быраастар истиҥ сыһыаннарын, кыһамньылаах үлэлэрин үрдүктүк сыаналыыллар. “Олорор усулуобуйалара, аһыыр астара барыта үчүгэй”,- диэн Амма улууһуттан кэлэн эмтэнэ сытар аҕам саастаах Александра Петровна кэпсиир. Кини сиһин өлөрөн бу балыыһаҕа киирбитэ нэдиэлэттэн орто.
Бу салааҕа сыллата 1000-тан тахса ыарыһах кэлэн эмтэнэр. Аҥардас Өрөспүүбүлүкэтээҕи 2-с нүөмэрдээх балыыһаҕа ниэрбэни эмтиир икки салаа баар, манна кинилэри суһаллык эмтээн, чөлүгэр түһэрии үлэтин эмиэ ыыталлар.
Татьяна Эверстова, Өрөспүүбүлүкэтээҕи 2 №-дээх балыыһа неврологическай салаатын невролог-бырааһа: “Ыйга 60 киһини эмтиибит. Биһиэхэ эмтэммит дьоммутун Москва, Новосибирск, Санкт-Петербург куораттарга эпэрээссийэҕэ ыыталыы сатыыбыт”.
80 сыл тухары ниэрбэ ыарыытын эмтиир ньымалар, саҥаттан саҥа аныгы технологиялар киирэннэр билигин да сайдыы салҕанар.