ХИФУ кыһыл дьупулуомнаахтары чиэстээтэ

Быйыл үрдүк үөрэх кыһатын 3000 кэриҥэ оҕо бүтэрэр. Олортон 400-чэтэ устудьуон үөрэхтэригэр үрдүк ситиһиилээх туйгуннар кэккэлэригэр киирдилэр. Киэҥ сиргэ аатырбыт, биир бастыҥ университет буолан, устудьуоннарын ситиһиитэ күнтэн күн саҥаттан саҥа саҕахтары арыйар. Үөрэх уонна билим эйгэтигэр чаҕылхай ситиһиилээх оҕолору сыллата устудьуон күнүгэр уонна үөрэх дьылын түмүгэр ректор эҕэрдэлиирэ үгэс буолла.

Анатолий Николаев, М.К. Аммосов аатынан ХИФУ ректора: "Сыллата 400 тахса оҕо кыһын дьупулуомунан бүтэрэр. Кыһыл дьупулуом, биллэн турар, устудьуон таһымын көрдөрөр, үлэҕэ киирэригэр улахан көмө буолар. Ону сэргэ устудьуон дьупулуому таһынан эбии идэ баһылаан тахсарын ситистибит".

Хотугулуу-Илиҥҥи федеральнай университет онно эбии Миирнэйгэ, Нерюнгригэ уонна Анаадырга филиаллаах. Оттон бу үөрэх кыһаларыгар устудьуон кыһыл дьупулуому ыларыгар 4-5 сыллааҕы үөрэх уопсай сыаналара 75% куруук "туйгун" сыана буолара ирдэнэр, онтон хаалбыт 25% "4" сыана буолуон сөп. Ол эрээри кууруһу түмүктүүр үлэ, быраактыка, госэкзамен уонна дьупулуомнай үлэ булгу "5" сыана буолара наада. Бу дойду үрдүнэн олоҕурбут биир тиһилик буолар.

Олеся Слепцова, М.К. Аммосов аатынан ХИФУ выпускнига: "Түөрт сыл үөрэнэрим тухары араас таһымнаах олимпиадаларга кытынным. Наар ситиһиилээх төннөөччүбүт. Олимпиадаларбытыгар куруутун өйөбүл буолар университеппытыгар махталбыт улахан".

Үөрэххэ киирбит оҕо тута 5 сүрүн хайысханан үрдүк истипиэндьийэни ылыан сөп. Ол курдук 2 симиэстэри куруук туйгун сыанаҕа уонна Дойду таһымнаах олимпиадаларга кыайбыт буоллаҕына, үөрэх үрдүкү истипиэндьийэтин ылар. Наукаҕа сыл устата араас таһымнаах кэмпириэнсийэлэргэ кыттан баал хомуйсан ылар, оттон спортка уонна култуураҕа дойду таһымнаах араас күрэхтэргэ таһыччы ситиһиилээх буоллаҕына эмиэ баал эбилллэр. Саамай үрдүкү истипиэндьийэ үөрэххэ уонна наукаҕа буолар, оттон арыый кыра спортка, култуураҕа уонна актыбыыстарга.

Исписэлиис буолан үлэҕэ киирэргэ дьупулуом хаачыстыбата оруола улахан. Үрдүк үөрэх кэмигэр көрдөрбүт хаачыстыбаларын үлэҕэ, олоххо хайдах сыһыаннаахтарын бэлиэтииллэр. Оттон үөрэхтэрин салгыы сылҕыыр дьоҥҥо туйгун дьупулуом ааны арыйар "күлүүс" быһыытынан буолар.

Өр сылга үлэлэммит ситиһии, сыра-сылба туоһута - устудьуон туйгун дьупулуома буолар. Быйылгы выпускниктар көччөх гына көтүппүт университеттарыгар, эриэктэргэ уонна  бары үлэһиттэргэ үрдүк махталларын анаатылар.