Щепкиннар саҥа сатааптара кэллэ

Саха өрөспүүбүлүкэтигэр бэлиэ күн. Бу курдук Саха тыйаатырын уус-уран салайааччыта Андрей Борисов бэлиэтээтэ. Чахчы уһун тохтобул, 20 сыл кэннэ, национальнай студияҕа анал миэстэ көрүллэн, сахабыт устудьуоннара дойду чаҕылхай, талааннаах артыыстарыгар үөрэнэн, идэ ылан уопут иҥэринэн кэллилэр. Инникитин саха норуотун, култууратын, тылын баайын киэҥ далааһыннаахтык аан дойдуга билиһиннэрэр ыччаты бу күн уруйдуу көрүстүлэр.

Андрей Борисов, Саха тыйаатырын уус-уран салайааччыта: "Щепкины бүтэрбит оҕолортон элбэх салайааччы үүнэн таҕыста. Ол аата театральнай институт биһиги норуоппут култууратыгар сабыдыала улаханын көрдөрөр".

Бэс ыйа бүтүөр диэри биэс түмүктүүр испэктээктэрин дьон уонна саха тыллаах тыйаатырдар иннилэригэр сыанаҕа таһаарыахтара. Бу түмүгүнэн, от ыйын бастакы күннэригэр биэс тыйаатырынан үлэлии барыахтара. Көрсүһүү маҥнайгы күнүгэр номнуо ким ханнык тыйаатырга киириэн сөптөөҕүн интэристээх режиссердар көрө  кэлбиттэр.

Александра Михайлова, М.С. Щепкин аатынан үрдүкү театральнай училище выпускнига: "Сүүрбэ буолан бүтэрэн кэллибит уонна биһигини кытта түөрт преподавателларбыт кэлсибиттэрэ. Дойдубутугар биэс үөрэҕи түмүктээбит үлэлэрбитин көрдөрүөхтээхпит. Онтон ол түмүгүнэн тыйаатырдарынан араараллар".

Москватааҕы Щепкин училищетыгар национальнай труппа уоннуу сыл арыттаах арыллар. Оттон, Дьокуускайга Арктическай институту 130 артыыс үөрэнэн бүтэрбитэ. Бастакы бэрэсидьиэн Михаил Николаев ыйааҕынан бу маннык артыыстары бэлэмнээн таһаарар үөрэх арыллыбыта идэлээх артыыстары бэлэмниир кыаҕы биэрдэ диэн режиссердар бэлиэтииллэр. Быйылгы студия 20 сыл буолан баран артыыстары таһаарда , ити уһун бириэмэ арытыгар Арктическай үнүстүүт баар буолан театр эйгэтэ тэтимин ыһыктыбакка кэллэ диэн көрсүһүүгэ ахтан аастылар.

Анатолий Николаев - Саха тыйаатырын дириэктэрин солбуйааччыта: "Оҕолорбут биһиэхэ туох эрэ саҥаны, атын көрүүнү аҕалбыт буолуохтаахтар. Саҥа диэн саҥа буоллаҕа дии. Бу күннэргэ туохха үөрэммиттэрин көрүөхпүт, онтон ханна бараллара биллиэ".

Түөрт сыл устата үөрэппит салайааччылара Дьокуускайга кэлэн, саха устудьуоннарын тыйаатырдар иннилэригэр отчуоттаатылар. Нууччалыы тыллаах киһи кыайбат ырыатын сахалар тахсан толорон, көрөөччүлэри улаханнык соһуппуттарын киэн тутта бэлиэтээтилэр.

Ньургун Никитин, М.С. Щепкин аатынан үрдүкү театральнай училище выпускнига: "Күн аайы биэстии чаас артыыс маастарыстыбатыгар үөрэнэр этибит. Сарсыарда тоҕустан киэһэ тоҕуска диэри үөрэнэрбит. Бастаан утаа ыарахан этэ. Кэлин тэтимҥэ киирэн судургутук кыайар буолбуппут".

Бу үөрүүлээх күн кыһыл көмүһүнэн саха ускуустубатын устуоруйатыгар үйэлэргэ суруллан хаалыа.