Ыраахтан-чугастан мустубут дьон Туймаада ыһыаҕар тоҕуоруһа муһунна
Былыр-былыргыттан илдьэ кэлбит төрүт үгэспит, алгыс, билигин өссө күүскэ сөргүтүллэн күннээҕи олох сиэрэ буолла. Ол курдук ыһыахха мустубут ыалдьыттар куйаас күнү ахсарбакка Алтан сэргэ тула уочараттаан сыллааҕы алгыстарын ыллылар. Сахаларга күн ураты уһуур кэмигэр, Айыылардыын алтыһар тоҕоостоох, ол иһин оҕолуун кырдьаҕастыын өйдүүн-санаалыын ыраастаннылар.
"Биһиги дьөһүөлдьүттэр алгысчыттар арыалдьыттара буоллабыт. Ыһыахха кэлбит дьону ыраастыыбыт, арчылыыбыт. Ыһыах диэн саха киһитигэр саҥа дьыл курдук буоллаҕа ди. Дьон этэҥҥэ сылдьарыгар үрдүк айыылартан көрдөһөбүт", - диир дьөһүөлдьүт Александр Яковлев.
Туймаада ыһыаҕын үөрүүлээх арыллыыта Килбиэннээх үлэ, Албан аат сылыгар ананна. Үлэ бэтэрээннэрин, дьоруойдарын бу күн үрдүктүк айхаллаан көрүстүлэр. 10 тыһыынчаттан тахса киһи мустан ыһыах үөрүүлээх арыллыытын кыттыылааҕа буоллулар. Олоҥхо дойдутун олоҕун уруйдуу Орто дойду олоҕун көрдөрүүтэ сыанаҕа турда.
"Быйыл Туймаада ыһыаҕын үөрэ-көтө бырааһынньыктаан эрэбит. Дьон-сэргэ бары кэлэн, алгыс истэн, күн бастакы сардаҥаларын көрсөн, күүс-уох ылыналлар", - диэн Дьокуускай куорат баһылыга Евгений Григорьев эттэ.
Быйылгы Туймаада ыһыаҕа Дьөһөгөй Айыыга - саха атыгар ананна. Ыһыах бэлиэтин, кугас аты, сарсыарда күн тахсыаҕыттан күн киириэр диэри оһуокай түһүлгэтигэр баайдылар. Кинини уруйдуу Сахабыт сирин бастыҥ оһуокайдьыттара, тыл илбиһин иҥэриммит Дархан этээччилэр сылы айхалыы көрүстүлэр. Бу оһуокай Афанасий Алексеев Аар Дархан этээччи тиэмэтигэр ананна.
"Мин оһуохайынан саха киһитэ, үҥкүүһүт буолан киэн туттабын. Оһуохайы кыра оҕо саастан, бу детсад, оскуола сааһыттан, эдэр оҕолор кэлэн үнкүүлүөхтэрин наада", - диэн этэр СӨ уонна РФ үтүөлээх артыыһа Афанасий Афанасьев.
Сахабыт өрөспүүлүкэтин Ил Дархана Айсен Николаев ыһыах устата бары түһүлгэлэри кэрийэн, хас биирдии тимир ууһун, саха асчытын, ииһин кытта илэ көрсөн үлэлэрэ хайдах бара турарын сиһилии билистэ. Дойдубут кэскилэ күнтэн күн сайдан, кыаҕыран, тэтимирэн иһэрин үрдүк болҕомтолоохтук бэлиэтээтэ.
Ыраахтан чугастан, тас дойдуттан сахалар ыһыахтарын көрө-истэ, сэргэҕэлии элбэх норуот муһунна. Бу буолар култуурабыт, үгэспит баайын туоһута. ЮНЕСКО аан дойдутааҕы шедевринэн биллэриллибит олоҥхобут, киэҥ сиргэ сураҕырбыт күннээх оһуохайбыт сахалар эрэ сүрэхтэрин буолбакка, кэлбит ыалдьыттары улаханнык сөхтөрдө.
Ыһыах күн устата араас быыстапкалар көрдөрүүгэ турдулар, олортон биирдэстэрэ 11 төгүлүн ыытыллар "Саха инновации - 2023" буолла. Өрөспүүлүкэттэн урбаанньыттар уонна айти парк резиденнэрэ мустан, бэйэлэрин оҥоһуктарын көрдөрүүгэ уурудулар. Көрөөччүлэр бу 30 көрдөрүүттэн техникэ уонна наука сайдыыта ханнык таһымҥа сылдьарын илиилэринэн тутан-хабан, амсайан бардылар.
Уохтаах кымыһынан Аал уоту күндүлээн, түптэ буруотун унаарытан сахалар күҥҥэ сүгүрүйүүлэрэ үрдүк таһымнаахтык ааста. Хас эмэ түһүлгэнэн үллэстэн олорон ким күрэхтэһии, ким ырыа-тойук көрдүлэр-иһиттилэр. Сахалыы таҥас-сап мааныта, ас эгэлгэтэ хас биирдии кэлбит киһи кутун тутта.
Ыһыах диэн хас биирдии сахаҕа ураты суолталаах бэлиэ күн. Бу күн киһи уйулҕата күүрэн, сүһүөхтээн туран сүгүрүйэн алгыс ылынар кэрэ кэмэ.