Киин куоракка Аан дойдутааҕы йога күнүн бэлиэтээтилэр
Түгэх индуизм бөлүһүөпүйэтиттэн силиһин-мутугун тардар Индия култуурата билиҥҥи кэмҥэ балысханнаахтык тэнийдэ. Дьон бастаан сис, уллаҥах көннөрө кэллибит дииллэр, оттон утаа доруобуйаны эрэ буолбакка, киһи чараас уйулҕатын, өйүн-санаатын чэбдигирдэргэ диэн сылдьаллар. Ол эрээри билигин йога төрүт өйдөбүлэ симэлийэн, билиҥҥи ыччакка атын быһыылаахтык бэриллэн эрэр. Дириҥ устуоруйалаах даршан биир көрүҥэ туһалаах анал өрүттэрин сүтэрбэтин туһугар, йога оскуолалара кыһаналлар.
Йога дьарыгын эрэ буолбакка, бастатан туран түөрүйэтин, сөптөөх туһаныллыытын билиһиннэрэллэр. Ыһыах күнү кытта тэҥҥэ, йога күнэ биир күн ыытыллаллар. Күн саамай уһуур күнүгэр киһи элбэх энергияны иҥэринэн хаалыахтаах. Ону Индия норуота эмиэ дьүөрэлии тутан бу күнү йога, ол эбэтэр энергия бэрсиитин күнүнэн анаабыт.
"Улахан комплекс тэрийэбит, онтон техникалары көрдөрөбүт, викторина ыытабыт. Үчүгэйдик дьарыктаммыт киһиэхэ бириис биэрэбит. Киһиэхэ туһалаах, куту-сүрү көтөҕөр, чөл оҥорор", - диир "Джива-Шакти" йога оскуолатын үөрэнээччитэ Вилена Холмогорова.
Дьокуускайга йога күнүн номнуо тохсус сылын бэлиэтииллэр. Ол курдук бастакы сыл Туймаада стадиоҥҥа 400 тахса, оттон иккис сыл 300, оттон кэлин уларыйыыта суох куруутун 250 кэриҥэ киһини хомуйбуттарын статистика көрдөрдө. 2020-2022 сылларга дьарыктаныан баҕалаахтар элбээннэр, онлайн кууруһу тэрийэн ыытар буолбуттара, билигин номнуо илэ көрсөн туһалаах сүбэни биэрэн, бэйэлэрин оскуолаларыгар күннэтэ йога уруоктарын ыыталлар.
"Бүгүҥҥү күннээххэ бу куоракка баар йога кулуубтара маастар кылаастарын биэриэхтэрэ, уопуттарын үллэстиэхтэрэ. Биһиэхэ Саха сиригэр бастакынан йога устуудьуйатын Мария Ли тэрийбитэ. Ол эрэн, биирдиилээн киһи йоганан дьарыктаммыта ыраатта", - диэн СӨ спортка миниистирин солбуйааччыта Гаврил Мохначевскай иһитиннэрдэ.
Йога элбэх көрүҥүттэн Хахта йога сүрүннээн ыытыллынна. Манна терапевтическэй хамсаныыттан саҕалаан, тыыныы гимнастикатыгар тиийэ эрчилиннилэр. Маастар кылааска хас биирдии киһи бэйэтэ туспа көбүөрдээх кэлбит, онно эбии тэрийээччилэр ааттарыттан утах, уонна көхтөөх кыттааччыларга туһалаах бириис түҥэтилиннэ.
"Йоганан дьарыктаныы хамсаныыга, эккэ-хааҥҥа туһалаах дии саныыбын. Кэнники сылларга уҥуох, былчыҥ ыарыыта дэлэйэн эрэр, бу ыарыылартан хамсаныы эрэ быыһыыр. 700 кэриҥэ былчыҥы уонна сүһүөхтэри хамсатыахха наада", - диэн йога тренерэ Дмитрий Горохов этэр.
Киһи чөл туруктаах буоларыгар бу көрүҥ улахан оруоллаах. Бу тэрээһиҥҥэ кытта кэлбит аҕа саастаах дьон систэрин уҥуохтара көнөтө, биир атахтарыгар өр тирэнэн тураллара эдэр дьону олус сөхтөрдө. Олортон биирдэстэ 71 саастаах Усуйаана улууһуттан сылдьар Иван Слепцов буолла:
"Хас сарсыарда аайы Кыайыы болуоссатыгар тиийэн эти-хааны эрчийэбин. Йоганан кыралаан дьарыктанабын. Спордунан дьарыктанар киһиэхэ доруобуйа өттүнэн, эккэ-хааҥҥа сайдыыны биэрэр. Эбиитин сүүрэбин уонна скандинавскай хаамыынан дьарыктанабын. Бу ыарыыттан көмүскэнии буолар".
Манна мустубут дьонтон үксүлэрэ 5 сылтан уһуннук дьарыктаммыттар, онтон атыттара бу көрүҥү бэйэлэригэр саҥа арынан, инникитин өссө дириҥэтэн үөрэтэр баҕа санаалаахтар.