Тоҕус күн устата саахымат бэстэбээлэ ыытылынна
Тоҕус күн устата саахымаччыттар уонна дуомаччыттар дьиэлэригэр саахымат бэстэбээлэ ыытылынна. Түргэн оонньууга уопсайа 96 киһи кыттыыны ылла, 1-2 миэстэни оскуола оҕолоро, Альберт Постников уонна Владислав Жирков, бэйэлэрин тустарыгар суруннулар. Иккис күн иккис аҥаарыгар суһал түргэн ооньууга 47 киһи кытынна. 15 бастыҥ саахымаччыт уонна былырыыҥҥы састааптан 5 кыттааччы түмүктүүр түһүмэххэ күөн көрсөн, төгүрүччү тиһилигинэн оонньоотулар.
"Биһиги сайдыыбыт бэйэтин хаамыытынан баран иһэр. Өрөспүүбүлүкэбит оройуоннарыттан элбэх кыттааччы кэлбитэ үөрдэр. Биһиги инникитин тэрээһиннэри ыытарбытыгар бу төһүү күүс буолар", - диэн күрэхтэһии сүрүн судьуйата Гаврил Винокуров иһитиннэрдэ.
Саха сиригэр аан маҥнайгытын саахымакка доруобуйатынан хааччахтаах оҕо кыттыыны ылла. Кини иккис миэстэ буолла. Тэрийээччилэр маннык туһалаах эксперимены ыытаннар салгыы доруобуйатыттан тутулуга суох барыларын компьютернай кылааска түмүөхтэрин баҕараллар. Ыраах улуустартан сылдьар кыттааччылар айаҥҥа үп-харчы кыаллыбат буолан, тастан олорон кыттар баҕалаахтарын бэлиэтээтилэр. Сөптөөх бырайыак тэриллэн, компьютернай кылаас арыллара буоллар диэн тэрийээччилэр баҕа санаалаахтар.
"Шахматынан оонньуур үчүгэйэ диэн, математикаҕа туһалаах. Досканы барытын көрөргө быдан үчүгэйдик табыллар. Тактиканы үөрэтэбин, хайдах түстэхтэринэ, мин хайдах түһэрбин. Эрдэттэн 10 хардыы оҥорорбун ", - диир 6-с кылаас үөрэнээччитэ Наташа Михайлова.
Классическай, ол эбэтэр уһун көрүҥҥэ уопсайа 72 киһи кыттыыны ылла. Манна бастаабыт муҥутуур кыайыылаах Өрөспүүбүлүкэ чемпионатыгар барар путевканан наҕараадаланна. Чемпионакка былырыыҥҥы састааптан 6 киһи, маҥнайгы лиигэттэн 3 киһи, бэстэбээлтэн 1 киһи уонна бэдэрээссийэ быһаарыытынан 1 оонньооччу кыттыахтара.
"Эдэр сылдьан саахыматынан, дуобатынан дьарыктанар этим. Маннык улахан турнирдарга оҕолор куруутун миэстэлэһэллэр. Мин оҕолорго хотторор буолбуппун. Элбэх турнир ыытыллар, онон оҕолор сайдыахтара дии саныыбын", - диэн саахымаччыт Леонид Данилов санаатын үллэһиннэ.
Бу бэстэбээлгэ уопсайа 4 маастар уонна 10 хандьыдаат кытыннылар. Оҕолор улахан дьоҥҥо иннилэрин биэрбэт буолан эрэллэрэ - бу саха сиригэр саахымат көрүҥэ үрдүк таһымҥа тахсыбытын бэлиэтэ буолар. Киһи өй үлэтинэн, ол эбэтэр саахыматынан, дуобатынан дьарыктаннаҕына, өр сылларга диэри чэбдик, мындыр өйдөөх буоларын аҕа саастаах кыттааччылар бэлиэтээтилэр.
Компьютернай кылаас арыллара буоллар, тас дойду гроссмейстердарын кытта уопут атастаһыыта олохсуйуо этэ. Оччоҕо киэҥ иэҥнээх Өрөспүүбүлүкэбит хайа баҕарар муннугуттан баҕалаах кыттааччы бэйэтин тургутан көрөрүгэр көмө буолуоҕа. Сайдыыны кытта тэҥҥэ хардылаан, таптыыр спортпутун саҥа компьютернай таһымҥа таһаарыах диэн баҕа санааларын эттилэр.