Оҕолорго “Бэргэн оонньуулара” аан маҥнайгытын ыытыллар

Олохтоох оҥорон таһаарааччы көҕүлээһининэн уонна кини туруорбут анал бирииһигэр өрөспүүбүлүкэтээҕи многоборье көрүҥэ оҕолорго ыытылла турар. Бастакы сайыҥҥы оонньууга уопсайа 12 улуустан 96 оҕо сайаапка биэрэн 5 көрүҥҥэ кытта кэллилэр. Спортивнай кулууптартан  эбэтэр биирдиилээн сайаапкаламмыт оҕолор эмиэ бааллар.

Иван Белолюбскай, СӨ төрүт многоборье көрүҥэр бэрэссэдээтэлэ: "Оҕолор маннык төрүт көрүҥнэринэн дьарыктаналлара уонна күрэх ыытыллара олус үчүгэй. Бэлиэтээн эттэххэ, оҕолорго күрэхтэһии олус аҕыйах. Онтон бу бастакытын ыытыллар “Бэргэн оонньуулара” атын да күрэхтэр тэриллэллэригэр төһүү күүс буолуо диэн эрэнэбит".

Кыра уолаттарга уонна кыра кыргыттарга уопсайа үс көрүҥ ыытыллыа. Ол курдук үс төгүл үс, тутум эргиир уонна 400м сүүрүү буолар. Орто саастаах уонна улахан уолаттар 5 көрүҥҥэ күрэхтэһиэхтэрэ. Үс төгүл үс, тутум эргиир, 400м сүүрүү, хапсаҕайдаан тустуу уонна мас тардыһыыта буолуоҕа. Маннык тэрээһин оҕо спортка бастакы саҕалааһыныгар улахан тирэх уонна  өйөбүл буолар.

Иван Горохов, күрэхтии сүрүн судьуйата: "Төрүт многоборьенан дьарыктанар оҕо дэгиттэр кыахтаах буолар. Кини быһый, сымса, уһун тыыннаах, имигэс буола улаатар".

Төрүт многоборьеҕа кыттар оҕо дэгиттэр буолар. Биирдиилээн көрүҥҥэ үчүгэй спортсменнар атын көрүҥҥэ көрдөрүүлэрин тупсараары кэлэллэр. Өскөтүн оҕо сорох көрүҥҥэ мөлтөх көрдөрүүлээх буоллаҕына, муҥутуур кыайыылаах аатыгар киирсэрэ уустуктаах. Ол иһин оҕону кыра сааһыттан төрүт оонньуу бары көрүҥэр сыһыара иитэллэрэ сөптөөх суол буолар.

Алика Кириллина, "Бэргэн оонньуулара" күрэх кыттыылааҕа: "Хотугу многоборьенан дьарыктанабын, онтон төрүт многоборьены сэҥээрэн дьарыктаммытым иккис сылым. Бэйэм көрүҥмэр өрөспүүбүлүкэ чемпионабын. Бу күрэхтэһиигэ тутум эргиирбин 60 оҥоруохпун баҕарабын уонна сүүрүүбүн эмиэ олох үчүгэй бириэмэни көрдөрүөхпүн наада".

Дьокуускай куораттан, Ньурбаттан, Мэҥэ Хаҥаластан, Кэбээйиттэн, Хаҥаластан, Амматтан, Чурапчыттан уонна да атын улуустартан саха төрүт оонньуутугар сүгүрүйээччилэр муһуннулар. Кыттааччылар эрдэттэн бэлэмнэнэн тренердэрин кытта кэлбиттэр. Ол эрээри сорох кыттааччылары өйүүр халыҥ хамаанда - кини дьиэ кэргэнэ буолла.

Күрэхтэһии многоборье ирдэбилинэн барда. Кыттааччылар төһө да саастарынан кыра буоллуннар, булгуччу туох баар быраабыланы барытын тутуһаллар. Бастакы көрүҥҥэ ыстаныыга 3 холонууттан биир бастыҥ көрдөрүүлэрин сурунуохтара. Оттон тутум эргиири бэриллибит 2 мүнүүтэ иһигэр хаста эргийэллэринэн ааҕыахтара.