Социальнай үлэһит күнүгэр туһуланар нэдиэлэ буолан ааста
Сааһырбыт дьоҥҥо өйү сайыннарар дьарыктар. Социальнай үлэһит Татьяна Сергучева анал бырагырааманы таһынан бэйэтэ айылҕа матырыйаалларыттан оҥорбутун туһанар. Бу дьарык тарбах нөҥүө өй үлэтин чөлүгэр түһэрэрин таһынан, тэтиҥ мас эмтиир күүһүн дьайыыта эмиэ улахан. Социальнай үлэһит биир саамай сыралаах үлэ. Манна бэриниилээх, идэлэрин таптыыр эрэ дьон хаалаллар. Онтон Татьяна Афанасьевна 26 сылын аҕам саастаахтарга, доруобуйатынан хааччахтаахтарга көмөлөһөр.
"Социальнай эйгэ киһини тардар. Эн дьоҥҥо биэрэргин губка курдук ылыналлар. Култуураттан олус атын, онно эккирэтэ сылдьан көрдөһөр буоллаххына, манна кинилэр эйиигин эккирэтэ сылдьаллар", - диир "Эрчим" доруобуйаны бөҕөргөтүү киинин социальнай үлэҕэ исписэлииһэ Татьяна Сергучева.
Дьокуускай нэһилиэнньэтин социальнай өҥөнөн хааччыйар биир кэлим Киинэ барыта 15 хайысханан үлэлиир. Олортон биир тутаах салаанан бу Эрчим диэн социальнай реабилитация салаата буолар. Манна сыллата 360 аҕам саастаах дьон кэлэн барар. Альбина Николаева хаһыс да төгүлүн манна доруобуйатын көннөрүнэр, үөлээнээхтэрин кытта алтыһар.
"Үлэһиттэр олус үчүгэйдэр, кэпсэтэн-ипсэтэн, кыһалҕаҕын барытын ылсан көмө бөҕөлөрө. Тугу билбэппитин биллэрэ сатыыллар, доруобуйабытын чөлүгэр түһэрэ сатыыллар, сыһыаннара көрсүө", - диэн "Эрчим" доруобуйаны бөҕөргөтүү киинин сынньалааччыта Альбина Николаева кэпсээтэ.
Биирдии киирии аайы 15 киһи доруобуйатын бөҕөргөтүнэр, араас дьарыктары ааһар. Устар бөлөх кэлбит кэмигэр улахан аҥардара түмэлгэ, тыйаатырга сылдьар буолан биэрдилэр. Сүһүөхтэри эрчийэргэ үҥкүү хамсаныылара көмө буолаллар. Ити курдук 12 күн устата сынньалааччылары бары өттүнэн хабарга үлэһиттэр кыһаллаллар. Манна Аҕам саастаахтар оҕолорун кытары өйдөспөт түгэннэрини психологы кытта быһаараллар. Онтон Иллэҥ кэмҥэ Ырыа - тойук оройуттан тутуллар. Социальнай үлэһит Людмила Прокопьева эмиэ бу кииҥҥэ үлэлээбитэ 10 тахса сыл буолбут. Кини хас биирдиилэригэр сылаас сыһыаны иҥэрэр.
"Араас дьылаҕалаах, араас олох очурдарыгар тиксибит дьон кэлэн бараллар. Олор бастаан хайдах киирбиттэрэ, онтон сылдьан баран хайдах баралларыттан биһиги үөрэбит. Уонна кинилэр махталлара биһиэхэ муҥура суох. Үөрэн-көтөн, эмтэнэн баран салҕыы хаана эрэ сылдьар хаартыскаларын да көрдөхпүтүнэ, үлэһиттэр астынабыт", - диэн “Эрчим" доруобуйаны бөҕөргөтүү киинин социальнай үлэҕэ исписэлииһэ Людмила Прокопьева иһитиннэрдэ.
Дьокуускай үрдүнэн 700 тахса соҕотох кырдьаҕас олорор. Кинилэргэ Киин үлэһиттэрэ күүс-көмө буолаллар. Нэһилиэнньэ уйан араҥатыгар социальнай өҥөнү оҥоруу бэрт наадалаах, суолталаах үлэ. Анардас аҕам саастаахтарга эрэ буолбакка, олох ыарахан түгэнигэр түбэспиттэргэ эмиэ илиилэрин биэрэн күүс-көмө буолаллар.