Жатайдааҕы уу суудунатын оҥорон таһаарар собуот тутуута салҕанар

Билиҥҥи туругунан эбийиэк 60% бэлэм.  Тутуу хаамыыта бытаарбыта билиннэ, онон сибээстээн анал хамыһыыйа тиийэн үлэни билистэ, кэккэ боппуруостары ырытыстылар.

Жатайдааҕы хараабыллары тутар собуокка үлэ тэтимнээхтик ыытыллар. Манна урукку хараабыллары өрөмүөннүүр собуоту саҥаттан тутан, хас да улахан баараҕай эбийиэги үлэҕэ киллэриэхтэрэ. Билиҥҥи туругунан, тутуу 63 быраһыана бүтэн турар. Уопсайа 4 бэдэрээччит 160 тахса киһини үлэлэтэ сылдьар. Бу маннык улахан эбийиэк Саха сиригэр суох, онон дьиэни тутуу, араас инженернай ситимнэрин тардыы кэккэ ыарахаттары үөскэтэр.

"Инженернай өттүнэн конструктива улахан. Элбэх сварщик, техника даҕаны ирдэнэр. Ону таһынан ис өттүнэн вентеляцията, турбата туһунан бырайыак быһыытынан ыарахаттардаах", - диэн Жатайдааҕы хараабыллары тутар собуот сүрүн инженерын солбуйааччы Евгений Самсонов этэр.

Саха Өрөспүүбүлүкэтин бырабыытылыстыбатын бэрэссэдээтэлин солбуйааччы Дмитрий Садовников уонна Россия Государственнай дууматын депутата Галина Данчикова собуот тутуутун хаамыытын билистилэр. Ол курдук собуот бастакы түһүмэҕин тутуутугар болдьохтон хаалыылар бааллара билиннэ, итиэннэ федеральнай бүддьүөттэн көрүллүбүт үп ситэ туһаныллыбатаҕынан сибээстээн, аны эһиилги үлэлэргэ федеральнай хааһынаттан харчы кэлиитэ ыарахаттардаах буолууһук диэн Галина Данчикова эттэ. Онон үлэлэри тэтимирдэн, бу сыл бүтүөр диэри көрүллүбүт үбү толору туһанан, тутуу бастакы түһүмэҕин бүтэрэр соругу туруорда.

"Саха сиригэр сайыммыт кылгас, бу кэмҥэ түргэн үлэлэр ааһыахтаахтар. Бетоннааһын, хоруобуйа оҥоруу, суолу бөҕөргөтүү. Итиитии киирбитэ сорох өттүгэр, ону барытын көрөбүн", - диир Жатайдааҕы хараабыллары тутар собуот өрөмүөннүүр сыаҕын кэтээн көрөөччүтэ Ньургун Асекритов.

Тутуу болдьохтон хаалыыта сыана үрдээһиниттэн уонна үлэһит дьон тиийбэтиттэн диэн собуот салалтата, бэдэрээччиттэр иһитиннэрдилэр. Өскөтүн,  бырайыакка 2018 сыллаах сыана ыйылла сылдьар эбит буоллаҕына, билиҥҥи сыана уруккатааҕар таһыччы атын. Сүрүннээн сварщиктар, альпинистар, геодезистар уонна инженердар тиийбэттэр. Билигин тутуу үлэтигэр 160 киһи баар эбит буоллаҕына, өссө 250 тахса киһини ылар сорук турар. Оччоҕуна 2 сменанан үлэлээн, инники этиллибит болдьохторун ситэр кыахтаналлар.

Тутуу үлэтин көрүү түмүгүнэн аны эһиилги, 2024 сыллаах федеральнай бүддьүөккэ, Жатайдааҕы собуокка эбии үбү көрөргө үлэ ыытыллыахтааҕын бэлиэтээтилэр. Онон Саха Өрөспүүбүлүкэтин тыраанспарга министиэристибэтэ бу үөскээбит кыһалҕаны быһаарар соруктаах.

Билигин аан бастаан, бу сыл бүтүөр диэри тутуу бастакы түһүмэҕин бүтэрэн үлэҕэ киллэриэхтээхтэр. Ол кэнниттэн федеральнай бүддьүөттэн үп көрүлүннэҕинэ тутууну салҕаан, 2025 сылга диэри собуот тутуллан бүтэн, толору үлэлиир кыамтатыгар тахсыахтаах.