Казань куоракка Аан дойдутааҕы Науруз театральнай бэстэбээл саҕаланна
Манна талааннаах, киэҥник биллибит режиссер Сергей Потапов туруоруутугар "Уйбаанчык" испэктээгэ туруоҕа. Бу туруоруу ис хоһооно, хайа баҕарар киһи сүрэҕинэн-быарынан аһарар, сэрии тиэмэтэ буолар. Сүрүн оруоллары Иннокентий Лебедев - Амикан уонна Амгаяна Нестерова оонньоон толоруохтара, ону тэҥэ уонча артыыс Дойду таһымнаах испэктээккэ кыттар чиэскэ тигистэ. Сүрүн уратыта диэн бу испэктээк хаамыыта тыыннаах доҕуһуолунан барыаҕа. Ырыа аргыстаах артыыстар ырыаны таптыыр татар норуотугар улахан бэлэх оҥоруохтара.
"Эстрада тыйаатырын бастакы кыттыыта буолар. Үчүгэйэ бастакы, иккис миэстэ диэн суох. Түүр омуктар бары мустан убайдыы-бырааттыы, эдьиийдии-балыстыы курдук көрсөллөр уонна бэйэлэрин тыйаатырдарын көрдөрөллөр", - диир режиссёр Сергей Потапов.
Бэстэбээл ыытыллар биир сүрүн сыала атын тыйаатырдары кытары уопут атастаһыы уонна артыыстар таһымнарын үрдэтии буолар. Биир төрүттээх түүрдэр хайа баҕарар национальнай туруорууну, бэйэтин омугун устуоруйатыгар тэҥнээн чугастык ылынара саарбахтаммат.
"Наурузка биһиги биир испиктээги бэлэмнээн барабыт. Ол гынан баран, Казаньҥа барбычча, тифло кэнсиэрбитин эмиэ илдьэ баран эрэбит. Мин билэрбинэн, тифло тэрээһин икки араастаах. Биһиэнигэр көрөөччүлэр харахтарыгар хара мааска кэтэн олороннор испиктээкили, кэнсиэри көрбөккө истэллэр уонна араас таарыйыынан, сытынан билиэхтээхтэр", - диэн эстрада тыйаатырын уус-уран салайааччыта Мария Герасимова кэпсээтэ.
Тифло концерт улаханнык тараҕана илик буолан, атын тыйаатырдарга бу туруоруу улахан холобур буолуоҕа. Маннык ураты испиктээги маҥнай Эстрада тыйаатыра туруорбута. Ол кэнниттэн кэлин атын тыйаатырга эмиэ баар буолбутун бэлиэтииллэр. Сотору кэминэн, операҕа эмиэ ити көрүҥ киирээри сылдьар диэн режиссер бэлиэтээтэ. Доруобуйатынан хааччахтаах көрөөччүгэ тифло комментатор сыанаҕа туох көстүү буола турарын, киһи сэттэ иминэн билэригэр кыах биэрэр. Ардах түһэрин көрөөччү илиитигэр хаапыланан, тыал үрэрин тыалынан сипсийэн көрдөрөллөр.
"Бу тыйаатыр бэстибээлигэр мин бастакы кыттыым, олус долгутуулаах. Уйбаанчык диэн испиктээкилгэ Маайыс оруолун толоробун. Уйбаанчык диэн 18 саастаах эдэр уол, кини Аҕа дойду сэритиигэр баран, бастакы киирсиигэ киирэн өлөр. Онно кини кыыһын оруолун толоробун", - диэн эстрада тыйаатырын артыыһа Амгаяна Нестерова иһитиннэрдэ.
Хас ыытыллар бэстэбээл эбэһээт анал биир тыйаатырга ананар, оттон быйыл бэстэбээл Хотугу Кавказ тыйаатырдарыгар ананна. Барыта 7 сиринэн 29 испэктээк туруоҕа. Бу тэрээһин тэрийээччитинэн Галиасгар Камал аатынан Татар академическай тыйаатыра буолар. Режиссердар бэлиэтииллэринэн, аҕыйах ахсааннаах норуоттар бэйэлэрин устуоруйаларын олус үрдүктүк туталлар. Бу буолар омук быһыытынан уратылара, сайдар инниклэрэ.