Евгений Григорьев былырыыҥҥы былаһааккалары бэрэбиэркэлээтэ
Киин куорат салалтатын сүрүн болҕомтотугар былырыын тутуллубут саҥа былаһааккалар тураллар. Ол курдук бу күннэргэ "Уһук-Илиҥҥи уокурукка 1000 тиэргэн" диэн бырагырааманан оҥоһуллубут сирдэргэ бэрэбиэркэ саҕаланна. Аан бастаан Автодорожнай уокуругу көрдүлэр. Манна былырыын 4 тэлгэһэни "Основа" хааччахтаммыт эппиэтинэстээх тэрилтэ, куонкуруһу кыайан, өрөмүөн үлэтин ыыппыта.
Игорь Портнягин, бэдэрээччит: “Автодорожнай уокурукка киирсэн түөрт былаһаакка биир хантараагынан табыллан оҥоһулунна. Ол курдук Птицефабрика оройуонугар, Автодорожнай, Чкалова уулуссаларга уонна Сэргэлээххэ тутуллубуттара. Үбүлээһин уопсай суммата 67 мөлүйүөн буолбута. Уу сүүрэр сирэ суох диэбиттэрэ, ону иҥнэри гынаммыт, уу ханан да хоммот”.
Бастатан туран, бэдэрээччит өрөмүөн үлэтин төһө хаачыстыбалаахтык оҥорбутун көрдүлэр. Саҥа былаһааккалар бары да тупсаҕай оҥоһуулаахтар эрээри, биирдиилээн сирдэргэ оҕо оонньуур былаһааккаларыгар, дьон хаамар тротуардарыгар алдьаныылар бааллара билиннэ. Ол эрэн бэдэрээччит ону барытын бэйэтин үбүгэр өрөмүөннүөхтээх.
Дьокуускай куорат баһылыга Евгений Григорьев нэһилиэнньэни кытары көрсөн уонна ыытыллыбыт үлэни көрөн баран, саҥа оҥоһуллубут былаһааккалары көрүү-истии мөлтөҕүн, олохтоохтор да салайар хампаанньалар эппиэтинэһэ суох сыһыаннаһыыларын ыйда.
Евгений Григорьев, Дьокуускай куорат баһылыга: "Көрөргүт курдук, салайар хампаанньалар сорохторо үчүгэйдик, сорохторо куһаҕаннык үлэлииллэр. Мөлтөх үлэлээх хампаанньалары, дьоҥҥо көмөлөһөммүт, үлэлэрин тохтотон атын хампаанньалары аныахпыт. Онтон бэдэрээдинэй хампаанньалар мэктиэ быһыытынан итэҕэстэри көннөрүөхтэрэ".
Саҥа тутуллубут былаһааккалар муниципальнай бас билиигэ киирбэттэр. Көрүү-истии өттүн олохтоохтор бэйэлэрэ дьаһайыахтаахтар, эбэтэр былаһаакаларын салайар хампаанньаларга туттарыахтаахтар. Оччоҕуна эрэ бэрээдэк олохтонор, дьиэ таһынааҕы сир ыраас буолар. Онон көрүүтэ-истиитэ мөлтөх былаһааккалары уокурук салалтата тус хонтуруолугар тутуохтаах.
Пётр Попов, Автодорожнай уокурук салайааччыта: “Былырыын бу былаһааккалар судаарыстыба үбүн суотугар тутуллубуттара. Муниципальнай тэриллии туттарбыт эбийиэгэ олохтоохтор хонтуруолларыгар туттарыллыахтаах”
Өскөтүн былырыын 30 тэлгэһин өрөмүөннээбит эбит буоллахтарына быйыл киин куоракка өссө 38 тэлгэһэни оҥорор сорук турар. Саҥардыы тутуллубут былаһааккаларга 3 сыллаах мэктиэ олохтонор, онон олохтоохтор хаачыстыбата суох үлэ ыытыллыбыт буоллаҕына, хаттаан оҥотторуу ирдэһэр бырааптаахтар.