Үгэскэ кубулуйбут ырааһырдыы үлэтэ, хомунуу салҕанар

Маассабай субуотунньуктар ыам ыйын саҥатыттан саҕаланан бараллар. Ааспыт өрөбүллэргэ 203-с микрооройуоҥҥа кытылы хомуйуу үлэтэ тэрилиннэ. Манна уопсайа 50 тахса үлэһит тахсан бөҕү-сыыһы хомуйда.

Росприроднадзор, Өлүөнэ өрүс салалтата уонна Лена регион водхоз буолан субуотунньукка таҕыстылар. Көмүөл мууһа кэлиэн иннинэ ууну күөйэр анал инженернэй тутуу тас өттүтүгэр, куорат бөхтөөх сирдэрин хомуйдулар. Мантан хойутаттахха уу таһыма үрдээн, бу анал тутуу анараа өттүгэр баар бөх-сах Жатай, Нам улууһун территорияларыгар тиийэр кутталлаах. Хомуллубат түгэнигэр бөх ис иһиттэн аллан ытык өрүспүтүн киртитэ туруоҕа. Хомойуох иһин, сылын аайы маннык кыһалҕалары көрсөбүт.

"Халаан уутун кыратык сырдаттахха, Өлүөнэ өрүс аллараа кирбиитэ Ленскэй улууһугар Витимҥэ киирбитэ. Гидромет этэринэн, куорат аттыгар ыам ыйын 19 күнүн диэкки кэлиэхтээх. Ол аата уу таһыма үордүөхтээх, бу бөҕү хомуйбатахпыт эбитэ буоллар, барытын илдьэ барыахтаах этэ", - диэн  Өлүөнэ өрүс тардыытын ууга салалтатын салайааччыта Пётр Аргунов этэр.

Дьокуускай куораты халаан уутуттан уонтан тахса сыл устата ууну-мууһу күөйэр анал инженернэй тутуу көмүскээн турда. 2001 сыллаахха Арассыыйа Бэдэрээссийэтин уурааҕынан Ленскэй, Өлүөхүмэ уонна Дьокуускай куораттарга улахан дамбалары оҥоруохха диэн дьаһал ылыммыта. Бу 2001 сыллаахтан 10 бэтэрээ сыллары ыллахха, уопсайа 625 мөлүйүөн бараммыта. Дамба үрдүгэ иккис кылаастаах тутуу буолар. Муҥутуур үрдүгэ Балтийскай систиэмэнэн 95 миэтирэ, оттон абсолютнай кээмэйин ылар эбит буоллахха, 1034 см тэҥнээх диэн бэлиэтииллэр.

Дьокуускай куорат ууга барар кутталлах таһыма 824 см буолар. Ол курдук урукку көрдөрүүлэри ылан көрөр эбит буоллаххына, 2010, 2011 сылларга бу анал тутуу суоҕа эбитэ буоллар, куораппыт ууга былдьаныа этэ. Кэмигэр сөптөөх быһаарыыны ылынар манан табыгастааҕын бу холобурунан көрдөрүөххэ сөп. Бүгүҥҥү субуотунньукка хомуллубут бөх-сах куорат сыбаалкатыгар быраҕыллыаҕа. Биирдии киһи хас эмэ куулунан бөҕү хомуйан,  дойдутугар бэриниитин манан көрдөрдө.

"Уосайа 50 кэриҥэ киһи буолан субуотунньукка таҕыстыбыт. Бүгүҥҥү сүрүн сыалбыт диэн, халаан уута кэлиэн иннинэ Дьокуускай куорат кытыытын, күөх хонуу өттүн ыраастыы таҕыстыбыт. Дьокуускай куорат олохтоохторугар халаан уутун иннинэ олорор сирбитин ыраастыырга ыҥырабыт уонна бэйэбит холобур буолан көрдөрөбүт", - диир Өлүөнэ өрүс тардыытын ууга салалтатын салайааччытын солбуйааччыта Федот Пермяков.

Сааспыт кэлэн кыһыны быһа хаар анныгар кыстаабыт бөхпүт киһи хараҕар быраҕыллар буолла. Уулуссаҕа сытарын ааһан, өрүспүтүгэр түһэр кутталы эмиэ үөскэтэр